১০. ৱেৰহচ্চানিসুত্তং

১৩৩. একং সমযং আযস্মা উদাযী কামণ্ডাযং ৱিহৰতি তোদেয্যস্স ব্ৰাহ্মণস্স অম্বৱনে. অথ খো ৱেৰহচ্চানিগোত্তায ব্ৰাহ্মণিযা অন্তেৱাসী মাণৱকো যেনাযস্মা উদাযী তেনুপসঙ্কমি; উপসঙ্কমিত্ৱা আযস্মতা উদাযিনা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নং খো তং মাণৱকং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো সো মাণৱকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা যেন ৱেৰহচ্চানিগোত্তা ব্ৰাহ্মণী তেনুপসঙ্কমি; উপসঙ্কমিত্ৱা ৱেৰহচ্চানিগোত্তং ব্ৰাহ্মণিং এতদৱোচ – ‘‘যগ্ঘে, ভোতি, জানেয্যাসি [ভোতি জানেয্য (সী. পী. ক.), ভোতী জানেয্য (স্যা. কং.)]! সমণো উদাযী ধম্মং দেসেতি আদিকল্যাণং মজ্ঝেকল্যাণং পৰিযোসানকল্যাণং, সাত্থং সব্যঞ্জনং কেৱলপৰিপুণ্ণং পৰিসুদ্ধং ব্ৰহ্মচৰিযং পকাসেতী’’তি.

‘‘তেন হি ত্ৱং, মাণৱক, মম ৱচনেন সমণং উদাযিং নিমন্তেহি স্ৱাতনায ভত্তেনা’’তি. ‘‘এৱং ভোতী’’তি খো সো মাণৱকো ৱেৰহচ্চানিগোত্তায ব্ৰাহ্মণিযা পটিস্সুত্ৱা যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘অধিৱাসেতু কিৰ, ভৱং, উদাযি, অম্হাকং আচৰিযভৰিযায ৱেৰহচ্চানিগোত্তায ব্ৰাহ্মণিযা স্ৱাতনায ভত্ত’’ন্তি. অধিৱাসেসি খো আযস্মা উদাযী তুণ্হীভাৱেন. অথ খো আযস্মা উদাযী তস্সা ৰত্তিযা অচ্চযেন পুব্বণ্হসমযং নিৱাসেত্ৱা পত্তচীৱৰমাদায যেন ৱেৰহচ্চানিগোত্তায ব্ৰাহ্মণিযা নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো ৱেৰহচ্চানিগোত্তা ব্ৰাহ্মণী আযস্মন্তং উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৱাৰেসি. অথ খো ৱেৰহচ্চানিগোত্তা ব্ৰাহ্মণী আযস্মন্তং উদাযিং ভুত্তাৱিং ওনীতপত্তপাণিং পাদুকা আৰোহিত্ৱা উচ্চে আসনে নিসীদিত্ৱা সীসং ওগুণ্ঠিত্ৱা আযস্মন্তং উদাযিং এতদৱোচ – ‘‘ভণ, সমণ, ধম্ম’’ন্তি. ‘‘ভৱিস্সতি, ভগিনি, সমযো’’তি ৱত্ৱা উট্ঠাযাসনা পক্কমি [পক্কামি (স্যা. কং. পী.)].

দুতিযম্পি খো সো মাণৱকো যেনাযস্মা উদাযী তেনুপসঙ্কমি; উপসঙ্কমিত্ৱা আযস্মতা উদাযিনা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নং খো তং মাণৱকং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. দুতিযম্পি খো সো মাণৱকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা যেন ৱেৰহচ্চানিগোত্তা ব্ৰাহ্মণী তেনুপসঙ্কমি; উপসঙ্কমিত্ৱা ৱেৰহচ্চানিগোত্তং ব্ৰাহ্মণিং এতদৱোচ – ‘‘যগ্ঘে, ভোতি, জানেয্যাসি! সমণো উদাযী ধম্মং দেসেতি আদিকল্যাণং মজ্ঝেকল্যাণং পৰিযোসানকল্যাণং, সাত্থং সব্যঞ্জনং কেৱলপৰিপুণ্ণং পৰিসুদ্ধং ব্ৰহ্মচৰিযং পকাসেতী’’তি.

‘‘এৱমেৱং পন ত্ৱং, মাণৱক, সমণস্স উদাযিস্স ৱণ্ণং ভাসসি. সমণো পনুদাযী ‘ভণ, সমণ, ধম্ম’ন্তি ৱুত্তো সমানো ‘ভৱিস্সতি, ভগিনি, সমযো’তি ৱত্ৱা উট্ঠাযাসনা পক্কন্তো’’তি. ‘‘তথা হি পন ত্ৱং, ভোতি, পাদুকা আৰোহিত্ৱা উচ্চে আসনে নিসীদিত্ৱা সীসং ওগুণ্ঠিত্ৱা এতদৱোচ – ‘ভণ, সমণ, ধম্ম’ন্তি. ধম্মগৰুনো হি তে ভৱন্তো ধম্মগাৰৱা’’তি. ‘‘তেন হি ত্ৱং, মাণৱক, মম ৱচনেন সমণং উদাযিং নিমন্তেহি স্ৱাতনায ভত্তেনা’’তি. ‘‘এৱং, ভোতী’’তি খো সো মাণৱকো ৱেৰহচ্চানিগোত্তায ব্ৰাহ্মণিযা পটিস্সুত্ৱা যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘অধিৱাসেতু কিৰ ভৱং উদাযী অম্হাকং আচৰিযভৰিযায ৱেৰহচ্চানিগোত্তায ব্ৰাহ্মণিযা স্ৱাতনায ভত্ত’’ন্তি. অধিৱাসেসি খো আযস্মা উদাযী তুণ্হীভাৱেন.

অথ খো আযস্মা উদাযী তস্সা ৰত্তিযা অচ্চযেন পুব্বণ্হসমযং নিৱাসেত্ৱা পত্তচীৱৰমাদায যেন ৱেৰহচ্চানিগোত্তায ব্ৰাহ্মণিযা নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো ৱেৰহচ্চানিগোত্তা ব্ৰাহ্মণী আযস্মন্তং উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৱাৰেসি. অথ খো ৱেৰহচ্চানিগোত্তা ব্ৰাহ্মণী আযস্মন্তং উদাযিং ভুত্তাৱিং ওনীতপত্তপাণিং পাদুকা ওৰোহিত্ৱা নীচে আসনে নিসীদিত্ৱা সীসং ৱিৱৰিত্ৱা আযস্মন্তং উদাযিং এতদৱোচ – ‘‘কিস্মিং নু খো, ভন্তে, সতি অৰহন্তো সুখদুক্খং পঞ্ঞপেন্তি, কিস্মিং অসতি অৰহন্তো সুখদুক্খং ন পঞ্ঞপেন্তী’’তি?

‘‘চক্খুস্মিং খো, ভগিনি, সতি অৰহন্তো সুখদুক্খং পঞ্ঞপেন্তি, চক্খুস্মিং অসতি অৰহন্তো সুখদুক্খং ন পঞ্ঞপেন্তি…পে… জিৱ্হায সতি অৰহন্তো সুখদুক্খং পঞ্ঞপেন্তি, জিৱ্হায অসতি অৰহন্তো সুখদুক্খং ন পঞ্ঞপেন্তি…পে…. মনস্মিং সতি অৰহন্তো সুখদুক্খং পঞ্ঞপেন্তি, মনস্মিং অসতি অৰহন্তো সুখদুক্খং ন পঞ্ঞপেন্তী’’তি.

এৱং ৱুত্তে, ৱেৰহচ্চানিগোত্তা ব্ৰাহ্মণী আযস্মন্তং উদাযিং এতদৱোচ – ‘‘অভিক্কন্তং, ভন্তে; অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য, চক্খুমন্তো ৰূপানি দক্খন্তীতি; এৱমেৱং অয্যেন উদাযিনা অনেকপৰিযাযেন ধম্মো পকাসিতো. এসাহং, অয্য উদাযি, তং ভগৱন্তং সৰণং গচ্ছামি, ধম্মঞ্চ, ভিক্খুসঙ্ঘঞ্চ. উপাসিকং মং অয্যো উদাযী ধাৰেতু অজ্জতগ্গে পাণুপেতং সৰণং গত’’ন্তি. দসমং.

গহপতিৱগ্গো তেৰসমো.

তস্সুদ্দানং –

ৱেসালী ৱজ্জি নাড়ন্দা, ভাৰদ্ৱাজ সোণো চ ঘোসিতো;

হালিদ্দিকো নকুলপিতা, লোহিচ্চো ৱেৰহচ্চানীতি.