৪. পমাদৱিহাৰীসুত্তং

৯৭. ‘‘পমাদৱিহাৰিঞ্চ ৱো, ভিক্খৱে, দেসেস্সামি অপ্পমাদৱিহাৰিঞ্চ. তং সুণাথ. কথঞ্চ, ভিক্খৱে, পমাদৱিহাৰী হোতি? চক্খুন্দ্ৰিযং অসংৱুতস্স, ভিক্খৱে, ৱিহৰতো চিত্তং ব্যাসিঞ্চতি [ব্যাসিচ্চতি (সী. স্যা. কং.)]. চক্খুৱিঞ্ঞেয্যেসু ৰূপেসু তস্স ব্যাসিত্তচিত্তস্স পামোজ্জং ন হোতি. পামোজ্জে অসতি পীতি ন হোতি. পীতিযা অসতি পস্সদ্ধি ন হোতি. পস্সদ্ধিযা অসতি দুক্খং হোতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৱন্তি. ধম্মানং অপাতুভাৱা পমাদৱিহাৰী ত্ৱেৱ সঙ্খং গচ্ছতি…পে… জিৱ্হিন্দ্ৰিযং অসংৱুতস্স, ভিক্খৱে, ৱিহৰতো চিত্তং ব্যাসিঞ্চতি জিৱ্হাৱিঞ্ঞেয্যেসু ৰসেসু, তস্স ব্যাসিত্তচিত্তস্স…পে… পমাদৱিহাৰী ত্ৱেৱ সঙ্খং গচ্ছতি…পে… মনিন্দ্ৰিযং অসংৱুতস্স, ভিক্খৱে, ৱিহৰতো চিত্তং ব্যাসিঞ্চতি মনোৱিঞ্ঞেয্যেসু ধম্মেসু, তস্স ব্যাসিত্তচিত্তস্স পামোজ্জং ন হোতি. পামোজ্জে অসতি পীতি ন হোতি. পীতিযা অসতি পস্সদ্ধি ন হোতি. পস্সদ্ধিযা অসতি দুক্খং হোতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৱন্তি. ধম্মানং অপাতুভাৱা পমাদৱিহাৰী ত্ৱেৱ সঙ্খং গচ্ছতি. এৱং খো, ভিক্খৱে, পমাদৱিহাৰী হোতি.

‘‘কথঞ্চ, ভিক্খৱে, অপ্পমাদৱিহাৰী হোতি? চক্খুন্দ্ৰিযং সংৱুতস্স, ভিক্খৱে, ৱিহৰতো চিত্তং ন ব্যাসিঞ্চতি চক্খুৱিঞ্ঞেয্যেসু ৰূপেসু, তস্স অব্যাসিত্তচিত্তস্স পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৱিহৰতি. সুখিনো চিত্তং সমাধিযতি. সমাহিতে চিত্তে ধম্মা পাতুভৱন্তি. ধম্মানং পাতুভাৱা অপ্পমাদৱিহাৰী ত্ৱেৱ সঙ্খং গচ্ছতি…পে… জিৱ্হিন্দ্ৰিযং সংৱুতস্স, ভিক্খৱে, ৱিহৰতো চিত্তং ন ব্যাসিঞ্চতি…পে… অপ্পমাদৱিহাৰী ত্ৱেৱ সঙ্খং গচ্ছতি. মনিন্দ্ৰিযং সংৱুতস্স, ভিক্খৱে, ৱিহৰতো চিত্তং ন ব্যাসিঞ্চতি, মনোৱিঞ্ঞেয্যেসু ধম্মেসু, তস্স অব্যাসিত্তচিত্তস্স পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৱিহৰতি. সুখিনো চিত্তং সমাধিযতি. সমাহিতে চিত্তে ধম্মা পাতুভৱন্তি. ধম্মানং পাতুভাৱা অপ্পমাদৱিহাৰী ত্ৱেৱ সঙ্খং গচ্ছতি. এৱং খো, ভিক্খৱে, অপ্পমাদৱিহাৰী হোতী’’তি. চতুত্থং.