৫. সংৱৰসুত্তং

৯৮. ‘‘সংৱৰঞ্চ ৱো, ভিক্খৱে, দেসেস্সামি, অসংৱৰঞ্চ. তং সুণাথ. কথঞ্চ, ভিক্খৱে, অসংৱৰো হোতি? সন্তি, ভিক্খৱে, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. তঞ্চে ভিক্খু অভিনন্দতি অভিৱদতি অজ্ঝোসায তিট্ঠতি, ৱেদিতব্বমেতং, ভিক্খৱে, ভিক্খুনা – ‘পৰিহাযামি কুসলেহি ধম্মেহি’. পৰিহানঞ্হেতং ৱুত্তং ভগৱতাতি…পে… সন্তি, ভিক্খৱে, জিৱ্হাৱিঞ্ঞেয্যা ৰসা…পে… সন্তি, ভিক্খৱে, মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. তঞ্চে ভিক্খু অভিনন্দতি অভিৱদতি অজ্ঝোসায তিট্ঠতি, ৱেদিতব্বমেতং, ভিক্খৱে, ভিক্খুনা – ‘পৰিহাযামি কুসলেহি ধম্মেহি’. পৰিহানঞ্হেতং ৱুত্তং ভগৱতাতি. এৱং খো, ভিক্খৱে, অসংৱৰো হোতি.

‘‘কথঞ্চ, ভিক্খৱে, সংৱৰো হোতি? সন্তি, ভিক্খৱে, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. তঞ্চে ভিক্খু নাভিনন্দতি নাভিৱদতি নাজ্ঝোসায তিট্ঠতি, ৱেদিতব্বমেতং, ভিক্খৱে, ভিক্খুনা – ‘ন পৰিহাযামি কুসলেহি ধম্মেহি’. অপৰিহানঞ্হেতং ৱুত্তং ভগৱতাতি …পে… সন্তি, ভিক্খৱে, জিৱ্হাৱিঞ্ঞেয্যা ৰসা…পে… সন্তি, ভিক্খৱে, মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. তঞ্চে ভিক্খু নাভিনন্দতি নাভিৱদতি নাজ্ঝোসায তিট্ঠতি, ৱেদিতব্বমেতং ভিক্খুনা – ‘ন পৰিহাযামি কুসলেহি ধম্মেহি’. অপৰিহানঞ্হেতং ৱুত্তং ভগৱতাতি. এৱং খো, ভিক্খৱে, সংৱৰো হোতী’’তি. পঞ্চমং.