৩. পৰিহানধম্মসুত্তং

৯৬. ‘‘পৰিহানধম্মঞ্চ ৱো, ভিক্খৱে, দেসেস্সামি অপৰিহানধম্মঞ্চ ছ চ অভিভাযতনানি. তং সুণাথ. কথঞ্চ, ভিক্খৱে, পৰিহানধম্মো হোতি? ইধ, ভিক্খৱে, ভিক্খুনো চক্খুনা ৰূপং দিস্ৱা উপ্পজ্জন্তি পাপকা অকুসলা সৰসঙ্কপ্পা [অকুসলা ধম্মা সৰসঙ্কপ্পা (স্যা. কং. পী. ক.) উপৰি আসীৱিসৱগ্গে সত্তমসুত্তে পন ‘‘আকুসলা সৰসঙ্কপ্পা’’ ত্ৱেৱ সব্বত্থ দিস্সতি] সংযোজনিযা. তঞ্চে ভিক্খু অধিৱাসেতি নপ্পজহতি ন ৱিনোদেতি ন ব্যন্তীকৰোতি [ব্যন্তিকৰোতি (পী.) ব্যন্তিং কৰোতি (ক.)] ন অনভাৱং গমেতি, ৱেদিতব্বমেতং, ভিক্খৱে, ভিক্খুনা – ‘পৰিহাযামি কুসলেহি ধম্মেহি’. পৰিহানঞ্হেতং ৱুত্তং ভগৱতাতি…পে….

‘‘পুন চপৰং, ভিক্খৱে, ভিক্খুনো জিৱ্হায ৰসং সাযিত্ৱা উপ্পজ্জন্তি…পে… পুন চপৰং, ভিক্খৱে, ভিক্খুনো মনসা ধম্মং ৱিঞ্ঞায উপ্পজ্জন্তি পাপকা অকুসলা সৰসঙ্কপ্পা সংযোজনিযা. তঞ্চে ভিক্খু অধিৱাসেতি নপ্পজহতি ন ৱিনোদেতি ন ব্যন্তীকৰোতি ন অনভাৱং গমেতি, ৱেদিতব্বমেতং, ভিক্খৱে, ভিক্খুনা – ‘পৰিহাযামি কুসলেহি ধম্মেহি’. পৰিহানঞ্হেতং ৱুত্তং ভগৱতাতি. এৱং খো, ভিক্খৱে, পৰিহানধম্মো হোতি.

‘‘কথঞ্চ, ভিক্খৱে, অপৰিহানধম্মো হোতি? ইধ, ভিক্খৱে, ভিক্খুনো চক্খুনা ৰূপং দিস্ৱা উপ্পজ্জন্তি পাপকা অকুসলা সৰসঙ্কপ্পা সংযোজনিযা. তঞ্চে ভিক্খু নাধিৱাসেতি পজহতি ৱিনোদেতি ব্যন্তীকৰোতি অনভাৱং গমেতি, ৱেদিতব্বমেতং, ভিক্খৱে, ভিক্খুনা – ‘ন পৰিহাযামি কুসলেহি ধম্মেহি’. অপৰিহানঞ্হেতং ৱুত্তং ভগৱতাতি…পে….

‘‘পুন চপৰং, ভিক্খৱে, ভিক্খুনো জিৱ্হায ৰসং সাযিত্ৱা উপ্পজ্জন্তি…পে… পুন চপৰং, ভিক্খৱে, ভিক্খুনো মনসা ধম্মং ৱিঞ্ঞায উপ্পজ্জন্তি পাপকা অকুসলা সৰসঙ্কপ্পা সংযোজনিযা. তঞ্চে ভিক্খু নাধিৱাসেতি পজহতি ৱিনোদেতি ব্যন্তীকৰোতি অনভাৱং গমেতি, ৱেদিতব্বমেতং, ভিক্খৱে, ভিক্খুনা – ‘ন পৰিহাযামি কুসলেহি ধম্মেহি’. অপৰিহানঞ্হেতং ৱুত্তং ভগৱতাতি. এৱং খো, ভিক্খৱে, অপৰিহানধম্মো হোতি.

‘‘কতমানি চ, ভিক্খৱে, ছ অভিভাযতনানি? ইধ, ভিক্খৱে, ভিক্খুনো চক্খুনা ৰূপং দিস্ৱা নুপ্পজ্জন্তি পাপকা অকুসলা সৰসঙ্কপ্পা সংযোজনিযা. ৱেদিতব্বমেতং, ভিক্খৱে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৱুত্তং ভগৱতাতি…পে… পুন চপৰং, ভিক্খৱে, ভিক্খুনো মনসা ধম্মং ৱিঞ্ঞায নুপ্পজ্জন্তি পাপকা অকুসলা ধম্মা সৰসঙ্কপ্পা সংযোজনিযা. ৱেদিতব্বমেতং, ভিক্খৱে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৱুত্তং ভগৱতাতি. ইমানি ৱুচ্চন্তি, ভিক্খৱে, ছ অভিভাযতনানী’’তি. ততিযং.