১০. উদকসুত্তং

১০৩. ‘‘উদকো [উদ্দকো (সী. পী.)] সুদং, ভিক্খৱে, ৰামপুত্তো এৱং ৱাচং ভাসতি – ‘ইদং জাতু ৱেদগূ, ইদং জাতু সব্বজী [সব্বজি (পী.)], ইদং জাতু অপলিখতং গণ্ডমূলং পলিখণি’ন্তি. তং খো পনেতং, ভিক্খৱে, উদকো ৰামপুত্তো অৱেদগূযেৱ সমানো ‘ৱেদগূস্মী’তি ভাসতি, অসব্বজীযেৱ সমানো ‘সব্বজীস্মী’তি ভাসতি, অপলিখতংযেৱ গণ্ডমূলং পলিখতং মে ‘গণ্ডমূল’ন্তি ভাসতি. ইধ খো তং, ভিক্খৱে, ভিক্খু সম্মা ৱদমানো ৱদেয্য – ‘ইদং জাতু ৱেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি.

‘‘কথঞ্চ, ভিক্খৱে, ৱেদগূ হোতি? যতো খো, ভিক্খৱে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং পজানাতি; এৱং খো, ভিক্খৱে, ভিক্খু ৱেদগূ হোতি.

‘‘কথঞ্চ, ভিক্খৱে, ভিক্খু সব্বজী হোতি? যতো খো, ভিক্খৱে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং ৱিদিত্ৱা অনুপাদাৱিমুত্তো হোতি; এৱং খো, ভিক্খৱে, ভিক্খু সব্বজী হোতি.

‘‘কথঞ্চ, ভিক্খৱে, ভিক্খুনো অপলিখতং গণ্ডমূলং পলিখতং হোতি? গণ্ডোতি খো, ভিক্খৱে, ইমস্সেতং চাতুমহাভূতিকস্স কাযস্স অধিৱচনং মাতাপেত্তিকসম্ভৱস্স ওদনকুম্মাসূপচযস্স অনিচ্চুচ্ছাদনপৰিমদ্দনভেদনৱিদ্ধংসনধম্মস্স. গণ্ডমূলন্তি খো, ভিক্খৱে, তণ্হাযেতং অধিৱচনং. যতো খো, ভিক্খৱে, ভিক্খুনো তণ্হা পহীনা হোতি উচ্ছিন্নমূলা তালাৱত্থুকতা অনভাৱঙ্কতা আযতিং অনুপ্পাদধম্মা; এৱং খো, ভিক্খৱে, ভিক্খুনো অপলিখতং গণ্ডমূলং পলিখতং হোতি.

‘‘উদকো সুদং, ভিক্খৱে, ৰামপুত্তো এৱং ৱাচং ভাসতি – ‘ইদং জাতু ৱেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’ন্তি. তং খো পনেতং, ভিক্খৱে, উদকো ৰামপুত্তো অৱেদগূযেৱ সমানো ‘ৱেদগূস্মী’তি ভাসতি, অসব্বজীযেৱ সমানো ‘সব্বজীস্মী’তি ভাসতি; অপলিখতংযেৱ গণ্ডমূলং ‘পলিখতং মে গণ্ডমূল’ন্তি ভাসতি. ইধ খো তং, ভিক্খৱে, ভিক্খু সম্মা ৱদমানো ৱদেয্য – ‘ইদং জাতু ৱেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি. দসমং.

সড়ৱগ্গো দসমো.

তস্সুদ্দানং –

দ্ৱে সংগয্হা পৰিহানং, পমাদৱিহাৰী চ সংৱৰো;

সমাধি পটিসল্লানং, দ্ৱে নতুম্হাকেন উদ্দকোতি.

সড়াযতনৱগ্গে দুতিযপণ্ণাসকো সমত্তো.

তস্স ৱগ্গুদ্দানং –

অৱিজ্জা মিগজালঞ্চ, গিলানং ছন্নং চতুত্থকং;

সড়ৱগ্গেন পঞ্ঞাসং, দুতিযো পণ্ণাসকো অযন্তি.

পঠমসতকং.