৯. ৱেৰম্ভসুত্তং

১৬৫. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… অধিগমায. উপৰি, ভিক্খৱে, আকাসে ৱেৰম্ভা [ৱেৰম্বা (সী. পী.)] নাম ৱাতা ৱাযন্তি. তত্থ যো পক্খী গচ্ছতি তমেনং ৱেৰম্ভা ৱাতা খিপন্তি. তস্স ৱেৰম্ভৱাতক্খিত্তস্স অঞ্ঞেনেৱ পাদা গচ্ছন্তি, অঞ্ঞেন পক্খা গচ্ছন্তি, অঞ্ঞেন সীসং গচ্ছতি, অঞ্ঞেন কাযো গচ্ছতি. এৱমেৱ খো, ভিক্খৱে, ইধেকচ্চো ভিক্খু লাভসক্কাৰসিলোকেন অভিভূতো পৰিযাদিণ্ণচিত্তো পুব্বণ্হসমযং নিৱাসেত্ৱা পত্তচীৱৰমাদায গামং ৱা নিগমং ৱা পিণ্ডায পৱিসতি অৰক্খিতেনেৱ কাযেন অৰক্খিতায ৱাচায অৰক্খিতেন চিত্তেন, অনুপট্ঠিতায সতিযা, অসংৱুতেহি ইন্দ্ৰিযেহি. সো তত্থ পস্সতি মাতুগামং দুন্নিৱত্থং ৱা দুপ্পাৰুতং ৱা. তস্স মাতুগামং দিস্ৱা দুন্নিৱত্থং ৱা দুপ্পাৰুতং ৱা ৰাগো চিত্তং অনুদ্ধংসেতি. সো ৰাগানুদ্ধংসিতেন চিত্তেন সিক্খং পচ্চক্খায হীনাযাৱত্ততি. তস্স অঞ্ঞে চীৱৰং হৰন্তি, অঞ্ঞে পত্তং হৰন্তি, অঞ্ঞে নিসীদনং হৰন্তি, অঞ্ঞে সূচিঘৰং হৰন্তি, ৱেৰম্ভৱাতক্খিত্তস্সেৱ সকুণস্স. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. নৱমং.