১০. সগাথকসুত্তং

১৬৬. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… অধিগমায. ইধাহং, ভিক্খৱে, একচ্চং পুগ্গলং পস্সামি সক্কাৰেন অভিভূতং পৰিযাদিণ্ণচিত্তং, কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপন্নং. ইধ পনাহং, ভিক্খৱে, একচ্চং পুগ্গলং পস্সামি অসক্কাৰেন অভিভূতং পৰিযাদিণ্ণচিত্তং, কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপন্নং. ইধ পনাহং, ভিক্খৱে, একচ্চং পুগ্গলং পস্সামি সক্কাৰেন চ অসক্কাৰেন চ তদুভযেন অভিভূতং পৰিযাদিণ্ণচিত্তং, কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপন্নং. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি.

ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘যস্স সক্কৰিযমানস্স, অসক্কাৰেন চূভযং;

সমাধি ন ৱিকম্পতি, অপ্পমাণৱিহাৰিনো [অপ্পমাদৱিহাৰিনো (পী. ক.) অপ্পমাণোতি হেত্থ ফলসমাধি, ন সতি].

‘‘তং ঝাযিনং সাততিকং, সুখুমং দিট্ঠিৱিপস্সকং;

উপাদানক্খযাৰামং, আহু সপ্পুৰিসো ইতী’’তি. দসমং;

পঠমো ৱগ্গো.

তস্সুদ্দানং –

দাৰুণো বড়িসং কুম্মং, দীঘলোমি চ মীড়্হকং;

অসনি দিদ্ধং সিঙ্গালং, ৱেৰম্ভেন সগাথকন্তি.