৮. সিঙ্গালসুত্তং

১৬৪. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… অধিগমায. অস্সুত্থ নো তুম্হে, ভিক্খৱে, ৰত্তিযা পচ্চূসসমযং জৰসিঙ্গালস্স [সিঙ্গালস্স (ক.), জৰসিগালস্স (সী. স্যা. কং.)] ৱস্সমানস্সা’’তি? ‘‘এৱং, ভন্তে’’. ‘‘এসো খো, ভিক্খৱে, জৰসিঙ্গালো উক্কণ্ডকেন [উক্কণ্ডকেন (সী.), উক্কণ্ণকেন (স্যা. কং. পী.)] নাম ৰোগজাতেন ফুট্ঠো নেৱ বিলগতো ৰমতি, ন ৰুক্খমূলগতো ৰমতি, ন অজ্ঝোকাসগতো ৰমতি; যেন যেন গচ্ছতি, যত্থ যত্থ তিট্ঠতি, যত্থ যত্থ নিসীদতি, যত্থ যত্থ নিপজ্জতি; তত্থ তত্থ অনযব্যসনং আপজ্জতি. এৱমেৱ খো, ভিক্খৱে, ইধেকচ্চো ভিক্খু লাভসক্কাৰসিলোকেন অভিভূতো পৰিযাদিণ্ণচিত্তো নেৱ সুঞ্ঞাগাৰগতো ৰমতি, ন ৰুক্খমূলগতো ৰমতি, ন অজ্ঝোকাসগতো ৰমতি; যেন যেন গচ্ছতি, যত্থ যত্থ তিট্ঠতি, যত্থ যত্থ নিসীদতি, যত্থ যত্থ নিপজ্জতি; তত্থ তত্থ অনযব্যসনং আপজ্জতি. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. অট্ঠমং.