২. বড়িসসুত্তং

১৫৮. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. সেয্যথাপি, ভিক্খৱে, বাড়িসিকো আমিসগতং বড়িসং গম্ভীৰে উদকৰহদে পক্খিপেয্য. তমেনং অঞ্ঞতৰো আমিসচক্খু মচ্ছো গিলেয্য. এৱঞ্হি সো, ভিক্খৱে, মচ্ছো গিলবড়িসো বাড়িসিকস্স অনযং আপন্নো ব্যসনং আপন্নো যথাকামকৰণীযো বাড়িসিকস্স’’.

‘‘বাড়িসিকোতি খো, ভিক্খৱে, মাৰস্সেতং পাপিমতো অধিৱচনং. বড়িসন্তি খো, ভিক্খৱে, লাভসক্কাৰসিলোকস্সেতং অধিৱচনং. যো হি কোচি, ভিক্খৱে, ভিক্খু উপ্পন্নং লাভসক্কাৰসিলোকং অস্সাদেতি নিকামেতি, অযং ৱুচ্চতি, ভিক্খৱে, ভিক্খু গিলবড়িসো মাৰস্স অনযং আপন্নো ব্যসনং আপন্নো যথাকামকৰণীযো পাপিমতো. এৱং দাৰুণো খো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. তস্মাতিহ, ভিক্খৱে, এৱং সিক্খিতব্বং – ‘উপ্পন্নং লাভসক্কাৰসিলোকং পজহিস্সাম, ন চ নো উপ্পন্নো লাভসক্কাৰসিলোকো চিত্তং পৰিযাদায ঠস্সতী’তি. এৱঞ্হি ৱো, ভিক্খৱে, সিক্খিতব্ব’’ন্তি. দুতিযং.