১১. সঙ্গাৰৱসুত্তং

২০৭. সাৱত্থিনিদানং. তেন খো পন সমযেন সঙ্গাৰৱো নাম ব্ৰাহ্মণো সাৱত্থিযং পটিৱসতি উদকসুদ্ধিকো, উদকেন পৰিসুদ্ধিং পচ্চেতি, সাযং পাতং উদকোৰোহনানুযোগমনুযুত্তো ৱিহৰতি. অথ খো আযস্মা আনন্দো পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা আনন্দো ভগৱন্তং এতদৱোচ – ‘‘ইধ, ভন্তে, সঙ্গাৰৱো নাম ব্ৰাহ্মণো সাৱত্থিযং পটিৱসতি উদকসুদ্ধিকো, উদকেন সুদ্ধিং পচ্চেতি, সাযং পাতং উদকোৰোহনানুযোগমনুযুত্তো ৱিহৰতি. সাধু, ভন্তে, ভগৱা যেন সঙ্গাৰৱস্স ব্ৰাহ্মণস্স নিৱেসনং তেনুপসঙ্কমতু অনুকম্পং উপাদাযা’’তি. অধিৱাসেসি ভগৱা তুণ্হীভাৱেন.

অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন সঙ্গাৰৱস্স ব্ৰাহ্মণস্স নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো সঙ্গাৰৱো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নং খো সঙ্গাৰৱং ব্ৰাহ্মণং ভগৱা এতদৱোচ – ‘‘সচ্চং কিৰ ত্ৱং, ব্ৰাহ্মণ, উদকসুদ্ধিকো, উদকেন সুদ্ধিং পচ্চেসি, সাযং পাতং উদকোৰোহনানুযোগমনুযুত্তো ৱিহৰসী’’তি? ‘‘এৱং, ভো গোতম’’. ‘‘কিং পন ত্ৱং, ব্ৰাহ্মণ, অত্থৱসং সম্পস্সমানো উদকসুদ্ধিকো, উদকসুদ্ধিং পচ্চেসি, সাযং পাতং উদকোৰোহনানুযোগমনুযুত্তো ৱিহৰসী’’তি? ‘‘ইধ মে, ভো গোতম [ইধ মে ভো গোতম অহং (পী. ক.)], যং দিৱা পাপকম্মং কতং হোতি, তং সাযং ন্হানেন [নহানেন (সী. স্যা. কং. পী.)] পৱাহেমি, যং ৰত্তিং পাপকম্মং কতং হোতি তং পাতং ন্হানেন পৱাহেমি. ইমং খ্ৱাহং, ভো গোতম, অত্থৱসং সম্পস্সমানো উদকসুদ্ধিকো, উদকেন সুদ্ধিং পচ্চেমি, সাযং পাতং উদকোৰোহনানুযোগমনুযুত্তো ৱিহৰামী’’তি.

‘‘ধম্মো ৰহদো ব্ৰাহ্মণ সীলতিত্থো,

অনাৱিলো সব্ভি সতং পসত্থো;

যত্থ হৱে ৱেদগুনো সিনাতা,

অনল্লগত্তাৱ [অনল্লীনগত্তাৱ (ক.)] তৰন্তি পাৰ’’ন্তি.

এৱং ৱুত্তে, সঙ্গাৰৱো ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি.