৫. অহিংসকসুত্তং

১৯১. সাৱত্থিনিদানং. অথ খো অহিংসকভাৰদ্ৱাজো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো অহিংসকভাৰদ্ৱাজো ব্ৰাহ্মণো ভগৱন্তং এতদৱোচ – ‘‘অহিংসকাহং, ভো গোতম, অহিংসকাহং, ভো গোতমা’’তি.

‘‘যথা নামং তথা চস্স, সিযা খো ত্ৱং অহিংসকো;

যো চ কাযেন ৱাচায, মনসা চ ন হিংসতি;

স ৱে অহিংসকো হোতি, যো পৰং ন ৱিহিংসতী’’তি.

এৱং ৱুত্তে, অহিংসকভাৰদ্ৱাজো ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম…পে… অব্ভঞ্ঞাসি. অঞ্ঞতৰো চ পনাযস্মা অহিংসকভাৰদ্ৱাজো অৰহতং অহোসী’’তি.