৯. কস্সকসুত্তং

১৫৫. সাৱত্থিনিদানং. তেন খো পন সমযেন ভগৱা ভিক্খূনং নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. তে চ ভিক্খূ অট্ঠিং কত্ৱা মনসি কত্ৱা সব্বচেতসা সমন্নাহৰিত্ৱা ওহিতসোতা ধম্মং সুণন্তি.

অথ খো মাৰস্স পাপিমতো এতদহোসি – ‘‘অযং খো সমণো গোতমো ভিক্খূনং নিব্বানপটিসংযুত্তায ধম্মিযা কথায…পে… যংনূনাহং যেন সমণো গোতমো তেনুপসঙ্কমেয্যং ৱিচক্খুকম্মাযা’’তি. অথ খো মাৰো পাপিমা কস্সকৱণ্ণং অভিনিম্মিনিত্ৱা মহন্তং নঙ্গলং খন্ধে কৰিত্ৱা দীঘপাচনযট্ঠিং গহেত্ৱা হটহটকেসো সাণসাটিনিৱত্থো কদ্দমমক্খিতেহি পাদেহি যেন ভগৱা তেনুপসঙ্কমি; উপসঙ্কমিত্ৱা ভগৱন্তং এতদৱোচ – ‘‘অপি, সমণ, বলীবদ্দে অদ্দসা’’তি? ‘‘কিং পন, পাপিম, তে বলীবদ্দেহী’’তি? ‘‘মমেৱ, সমণ, চক্খু, মম ৰূপা, মম চক্খুসম্ফস্সৱিঞ্ঞাণাযতনং. কুহিং মে, সমণ, গন্ত্ৱা মোক্খসি? মমেৱ, সমণ, সোতং, মম সদ্দা…পে… মমেৱ, সমণ, ঘানং, মম গন্ধা; মমেৱ, সমণ, জিৱ্হা, মম ৰসা; মমেৱ, সমণ, কাযো, মম ফোট্ঠব্বা; মমেৱ, সমণ, মনো, মম ধম্মা, মম মনোসম্ফস্সৱিঞ্ঞাণাযতনং. কুহিং মে, সমণ, গন্ত্ৱা মোক্খসী’’তি?

‘‘তৱেৱ, পাপিম, চক্খু, তৱ ৰূপা, তৱ চক্খুসম্ফস্সৱিঞ্ঞাণাযতনং. যত্থ চ খো, পাপিম, নত্থি চক্খু, নত্থি ৰূপা, নত্থি চক্খুসম্ফস্সৱিঞ্ঞাণাযতনং, অগতি তৱ তত্থ, পাপিম. তৱেৱ, পাপিম, সোতং, তৱ সদ্দা, তৱ সোতসম্ফস্সৱিঞ্ঞাণাযতনং. যত্থ চ খো, পাপিম, নত্থি সোতং, নত্থি সদ্দা, নত্থি সোতসম্ফস্সৱিঞ্ঞাণাযতনং, অগতি তৱ তত্থ, পাপিম. তৱেৱ, পাপিম, ঘানং, তৱ গন্ধা, তৱ ঘানসম্ফস্সৱিঞ্ঞাণাযতনং. যত্থ চ খো, পাপিম, নত্থি ঘানং, নত্থি গন্ধা, নত্থি ঘানসম্ফস্সৱিঞ্ঞাণাযতনং, অগতি তৱ তত্থ, পাপিম. তৱেৱ, পাপিম, জিৱ্হা, তৱ ৰসা, তৱ জিৱ্হাসম্ফস্সৱিঞ্ঞাণাযতনং…পে… তৱেৱ, পাপিম, কাযো, তৱ ফোট্ঠব্বা, তৱ কাযসম্ফস্সৱিঞ্ঞাণাযতনং…পে… তৱেৱ, পাপিম, মনো, তৱ ধম্মা, তৱ মনোসম্ফস্সৱিঞ্ঞাণাযতনং. যত্থ চ খো, পাপিম, নত্থি মনো, নত্থি ধম্মা, নত্থি মনোসম্ফস্সৱিঞ্ঞাণাযতনং, অগতি তৱ তত্থ, পাপিমা’’তি.

‘‘যং ৱদন্তি মম যিদন্তি, যে ৱদন্তি মমন্তি চ;

এত্থ চে তে মনো অত্থি, ন মে সমণ মোক্খসী’’তি.

‘‘যং ৱদন্তি ন তং ময্হং, যে ৱদন্তি ন তে অহং;

এৱং পাপিম জানাহি, ন মে মগ্গম্পি দক্খসী’’তি.

অথ খো মাৰো পাপিমা…পে… তত্থেৱন্তৰধাযীতি.