১০. ৰজ্জসুত্তং

১৫৬. একং সমযং ভগৱা কোসলেসু ৱিহৰতি হিমৱন্তপদেসে [হিমৱন্তপস্সে (সী.)] অৰঞ্ঞকুটিকাযং. অথ খো ভগৱতো ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘‘সক্কা নু খো ৰজ্জং কাৰেতুং অহনং অঘাতযং অজিনং অজাপযং অসোচং অসোচাপযং ধম্মেনা’’তি?

অথ খো মাৰো পাপিমা ভগৱতো চেতসা চেতোপৰিৱিতক্কমঞ্ঞায যেন ভগৱা তেনুপসঙ্কমি; উপসঙ্কমিত্ৱা ভগৱন্তং এতদৱোচ – ‘‘কাৰেতু, ভন্তে, ভগৱা ৰজ্জং, কাৰেতু, সুগতো, ৰজ্জং অহনং অঘাতযং অজিনং অজাপযং অসোচং অসোচাপযং ধম্মেনা’’তি. ‘‘কিং পন মে ত্ৱং, পাপিম, পস্সসি যং মং ত্ৱং এৱং ৱদেসি – ‘কাৰেতু, ভন্তে, ভগৱা ৰজ্জং, কাৰেতু সুগতো, ৰজ্জং অহনং অঘাতযং অজিনং অজাপযং অসোচং অসোচাপযং ধম্মেনা’’’তি? ‘‘ভগৱতা খো, ভন্তে, চত্তাৰো ইদ্ধিপাদা ভাৱিতা বহুলীকতা যানীকতা ৱত্থুকতা অনুট্ঠিতা পৰিচিতা সুসমাৰদ্ধা. আকঙ্খমানো চ, ভন্তে, ভগৱা হিমৱন্তং পব্বতৰাজং সুৱণ্ণং ত্ৱেৱ অধিমুচ্চেয্য সুৱণ্ণঞ্চ পনস্সা’’তি [সুৱণ্ণপব্বতস্সাতি (সী. স্যা. কং.), সুৱণ্ণঞ্চ পব্বতস্সাতি (পী.)].

‘‘পব্বতস্স সুৱণ্ণস্স, জাতৰূপস্স কেৱলো;

দ্ৱিত্তাৱ নালমেকস্স, ইতি ৱিদ্ৱা সমঞ্চৰে.

‘‘যো দুক্খমদ্দক্খি যতোনিদানং,

কামেসু সো জন্তু কথং নমেয্য;

উপধিং ৱিদিত্ৱা সঙ্গোতি লোকে,

তস্সেৱ জন্তু ৱিনযায সিক্খে’’তি.

অথ খো মাৰো পাপিমা ‘‘জানাতি মং ভগৱা, জানাতি মং সুগতো’’তি দুক্খী দুম্মনো তত্থেৱন্তৰধাযীতি.

দুতিযো ৱগ্গো.

তস্সুদ্দানং –

পাসাণো সীহো সকলিকং [সক্খলিকং (ক.)], পতিৰূপঞ্চ মানসং;

পত্তং আযতনং পিণ্ডং, কস্সকং ৰজ্জেন তে দসাতি.