৬. পত্তসুত্তং

১৫২. সাৱত্থিনিদানং. তেন খো পন সমযেন ভগৱা পঞ্চন্নং উপাদানক্খন্ধানং উপাদায ভিক্খূনং ধম্মিযা কথায সন্দস্সেতি সমাদপেতি [সমাদাপেতি (?)] সমুত্তেজেতি সম্পহংসেতি. তে চ ভিক্খূ অট্ঠিং কত্ৱা [অট্ঠিকত্ৱা (সী. স্যা. কং. পী.)] মনসি কত্ৱা সব্বচেতসা [সব্বচেতসো (সী. স্যা. কং. পী.), সব্বং চেতসা (ক.)] সমন্নাহৰিত্ৱা ওহিতসোতা ধম্মং সুণন্তি.

অথ খো মাৰস্স পাপিমতো এতদহোসি – ‘‘অযং খো সমণো গোতমো পঞ্চন্নং উপাদানক্খন্ধানং উপাদায ভিক্খূনং ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. তে চ ভিক্খূ অট্ঠিং কত্ৱা মনসি কত্ৱা সব্বচেতসা সমন্নাহৰিত্ৱা ওহিতসোতা ধম্মং সুণন্তি. যংনূনাহং যেন সমণো গোতমো তেনুপসঙ্কমেয্যং ৱিচক্খুকম্মাযা’’তি.

তেন খো পন সমযেন সম্বহুলা পত্তা অব্ভোকাসে নিক্খিত্তা হোন্তি. অথ খো মাৰো পাপিমা বলীবদ্দৱণ্ণং অভিনিম্মিনিত্ৱা যেন তে পত্তা তেনুপসঙ্কমি. অথ খো অঞ্ঞতৰো ভিক্খু অঞ্ঞতৰং ভিক্খুং এতদৱোচ – ‘‘ভিক্খু, ভিক্খু, এসো বলীবদ্দো পত্তে ভিন্দেয্যা’’তি. এৱং ৱুত্তে ভগৱা তং ভিক্খুং এতদৱোচ – ‘‘ন সো, ভিক্খু, বলীবদ্দো. মাৰো এসো পাপিমা তুম্হাকং ৱিচক্খুকম্মায আগতো’’তি. অথ খো ভগৱা ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথায অজ্ঝভাসি –

‘‘ৰূপং ৱেদযিতং সঞ্ঞা, ৱিঞ্ঞাণং যঞ্চ সঙ্খতং;

নেসোহমস্মি নেতং মে, এৱং তত্থ ৱিৰজ্জতি.

‘‘এৱং ৱিৰত্তং খেমত্তং, সব্বসংযোজনাতিগং;

অন্ৱেসং সব্বট্ঠানেসু, মাৰসেনাপি নাজ্ঝগা’’তি.

অথ খো মাৰো পাপিমা…পে… তত্থেৱন্তৰধাযীতি.