৪. পতিৰূপসুত্তং

১৫০. একং সমযং ভগৱা কোসলেসু ৱিহৰতি একসালাযং ব্ৰাহ্মণগামে. তেন খো পন সমযেন ভগৱা মহতিযা গিহিপৰিসায পৰিৱুতো ধম্মং দেসেতি.

অথ খো মাৰস্স পাপিমতো এতদহোসি – ‘‘অযং খো সমণো গোতমো মহতিযা গিহিপৰিসায পৰিৱুতো ধম্মং দেসেতি. যংনূনাহং যেন সমণো গোতমো তেনুপসঙ্কমেয্যং ৱিচক্খুকম্মাযা’’তি. অথ খো মাৰো পাপিমা যেন ভগৱা তেনুপসঙ্কমি; উপসঙ্কমিত্ৱা ভগৱন্তং গাথায অজ্ঝভাসি –

‘‘নেতং তৱ পতিৰূপং, যদঞ্ঞমনুসাসসি;

অনুৰোধৱিৰোধেসু, মা সজ্জিত্থো তদাচৰ’’ন্তি.

‘‘হিতানুকম্পী সম্বুদ্ধো, যদঞ্ঞমনুসাসতি;

অনুৰোধৱিৰোধেহি, ৱিপ্পমুত্তো তথাগতো’’তি.

অথ খো মাৰো পাপিমা ‘‘জানাতি মং ভগৱা, জানাতি মং সুগতো’’তি দুক্খী দুম্মনো তত্থেৱন্তৰধাযীতি.