২. দুতিযৱগ্গো

১. ৱতপদসুত্তং

২৫৭. সাৱত্থিযং. ‘‘সক্কস্স, ভিক্খৱে, দেৱানমিন্দস্স পুব্বে মনুস্সভূতস্স সত্ত ৱতপদানি [ৱত্তপদানি (ক.)] সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৱতপদানি? যাৱজীৱং মাতাপেত্তিভৰো অস্সং, যাৱজীৱং কুলে জেট্ঠাপচাযী অস্সং, যাৱজীৱং সণ্হৱাচো অস্সং, যাৱজীৱং অপিসুণৱাচো অস্সং, যাৱজীৱং ৱিগতমলমচ্ছেৰেন চেতসা অগাৰং অজ্ঝাৱসেয্যং মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো, যাৱজীৱং সচ্চৱাচো অস্সং, যাৱজীৱং অক্কোধনো অস্সং – সচেপি মে কোধো উপ্পজ্জেয্য, খিপ্পমেৱ নং পটিৱিনেয্য’’ন্তি. ‘‘সক্কস্স, ভিক্খৱে, দেৱানমিন্দস্স পুব্বে মনুস্সভূতস্স ইমানি সত্ত ৱতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভৰং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেৰৱিনযে যুত্তং, সচ্চং কোধাভিভুং নৰং;

তং ৱে দেৱা তাৱতিংসা, আহু সপ্পুৰিসো ইতী’’তি.

২. সক্কনামসুত্তং

২৫৮. সাৱত্থিযং জেতৱনে. তত্ৰ খো ভগৱা ভিক্খূ এতদৱোচ – ‘‘সক্কো, ভিক্খৱে, দেৱানমিন্দো পুব্বে মনুস্সভূতো সমানো মঘো নাম মাণৱো অহোসি, তস্মা মঘৱাতি ৱুচ্চতি.

‘‘সক্কো, ভিক্খৱে, দেৱানমিন্দো পুব্বে মনুস্সভূতো সমানো পুৰে [পুৰে পুৰে (সী. পী.)] দানং অদাসি, তস্মা পুৰিন্দদোতি ৱুচ্চতি.

‘‘সক্কো, ভিক্খৱে, দেৱানমিন্দো পুব্বে মনুস্সভূতো সমানো সক্কচ্চং দানং অদাসি, তস্মা সক্কোতি ৱুচ্চতি.

‘‘সক্কো, ভিক্খৱে, দেৱানমিন্দো পুব্বে মনুস্সভূতো সমানো আৱসথং অদাসি, তস্মা ৱাসৱোতি ৱুচ্চতি.

‘‘সক্কো, ভিক্খৱে, দেৱানমিন্দো সহস্সম্পি অত্থানং মুহুত্তেন চিন্তেতি, তস্মা সহস্সক্খোতি ৱুচ্চতি.

‘‘সক্কস্স, ভিক্খৱে, দেৱানমিন্দস্স সুজা নাম অসুৰকঞ্ঞা পজাপতি, তস্মা সুজম্পতীতি ৱুচ্চতি.

‘‘সক্কো, ভিক্খৱে, দেৱানমিন্দো দেৱানং তাৱতিংসানং ইস্সৰিযাধিপচ্চং ৰজ্জং কাৰেতি, তস্মা দেৱানমিন্দোতি ৱুচ্চতি.

‘‘সক্কস্স, ভিক্খৱে দেৱানমিন্দস্স পুব্বে মনুস্সভূতস্স সত্ত ৱতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৱতপদানি? যাৱজীৱং মাতাপেত্তিভৰো অস্সং, যাৱজীৱং কুলে জেট্ঠাপচাযী অস্সং, যাৱজীৱং সণ্হৱাচো অস্সং, যাৱজীৱং অপিসুণৱাচো অস্সং, যাৱজীৱং ৱিগতমলমচ্ছেৰেন চেতসা অগাৰং অজ্ঝাৱসেয্যং মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো, যাৱজীৱং সচ্চৱাচো অস্সং, যাৱজীৱং অক্কোধনো অস্সং – সচেপি মে কোধো উপ্পজ্জেয্য, খিপ্পমেৱ নং পটিৱিনেয্য’’ন্তি. ‘‘সক্কস্স, ভিক্খৱে, দেৱানমিন্দস্স পুব্বে মনুস্সভূতস্স ইমানি সত্ত ৱতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভৰং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেৰৱিনযে যুত্তং, সচ্চং কোধাভিভুং নৰং;

তং ৱে দেৱা তাৱতিংসা, আহু সপ্পুৰিসো ইতী’’তি.

৩. মহালিসুত্তং

২৫৯. এৱং মে সুতং – একং সমযং ভগৱা ৱেসালিযং ৱিহৰতি মহাৱনে কূটাগাৰসালাযং. অথ খো মহালি লিচ্ছৱী যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো মহালি লিচ্ছৱী ভগৱন্তং এতদৱোচ –

‘‘দিট্ঠো খো, ভন্তে, ভগৱতা সক্কো দেৱানমিন্দো’’তি?

‘‘দিট্ঠো খো মে, মহালি, সক্কো দেৱানমিন্দো’’তি.

‘‘সো হি নূন, ভন্তে, সক্কপতিৰূপকো ভৱিস্সতি. দুদ্দসো হি, ভন্তে, সক্কো দেৱানমিন্দো’’তি.

‘‘সক্কঞ্চ খ্ৱাহং, মহালি, পজানামি সক্ককৰণে চ ধম্মে, যেসং ধম্মানং সমাদিন্নত্তা সক্কো সক্কত্তং অজ্ঝগা, তঞ্চ পজানামি.

‘‘সক্কো, মহালি, দেৱানমিন্দো পুব্বে মনুস্সভূতো সমানো মঘো নাম মাণৱো অহোসি, তস্মা মঘৱাতি ৱুচ্চতি.

‘‘সক্কো, মহালি, দেৱানমিন্দো পুব্বে মনুস্সভূতো সমানো সক্কচ্চং দানং অদাসি, তস্মা সক্কোতি ৱুচ্চতি.

‘‘সক্কো, মহালি, দেৱানমিন্দো পুব্বে মনুস্সভূতো সমানো পুৰে দানং অদাসি, তস্মা পুৰিন্দদোতি ৱুচ্চতি.

‘‘সক্কো, মহালি, দেৱানমিন্দো পুব্বে মনুস্সভূতো সমানো আৱসথং অদাসি, তস্মা ৱাসৱোতি ৱুচ্চতি.

‘‘সক্কো, মহালি, দেৱানমিন্দো সহস্সম্পি অত্থানং মুহুত্তেন চিন্তেতি, তস্মা সহস্সক্খোতি ৱুচ্চতি.

‘‘সক্কস্স, মহালি, দেৱানমিন্দস্স সুজা নাম অসুৰকঞ্ঞা পজাপতি, তস্মা সুজম্পতীতি ৱুচ্চতি.

‘‘সক্কো, মহালি, দেৱানমিন্দো দেৱানং তাৱতিংসানং ইস্সৰিযাধিপচ্চং ৰজ্জং কাৰেতি, তস্মা দেৱানমিন্দোতি ৱুচ্চতি.

‘‘সক্কস্স, মহালি, দেৱানমিন্দস্স পুব্বে মনুস্সভূতস্স সত্ত ৱতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৱতপদানি? যাৱজীৱং মাতাপেত্তিভৰো অস্সং, যাৱজীৱং কুলে জেট্ঠাপচাযী অস্সং, যাৱজীৱং সণ্হৱাচো অস্সং, যাৱজীৱং অপিসুণৱাচো অস্সং, যাৱজীৱং ৱিগতমলমচ্ছেৰেন চেতসা অগাৰং অজ্ঝাৱসেয্যং মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো, যাৱজীৱং সচ্চৱাচো অস্সং, যাৱজীৱং অক্কোধনো অস্সং – সচেপি মে কোধো উপ্পজেয্য, খিপ্পমেৱ নং পটিৱিনেয্য’’ন্তি. ‘‘সক্কস্স, মহালি, দেৱানমিন্দস্স পুব্বে মনুস্সভূতস্স ইমানি সত্ত ৱতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভৰং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেৰৱিনযে যুত্তং, সচ্চং কোধাভিভুং নৰং;

তং ৱে দেৱা তাৱতিংসা, আহু সপ্পুৰিসো ইতী’’তি.

৪. দলিদ্দসুত্তং

২৬০. একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, অঞ্ঞতৰো পুৰিসো ইমস্মিংযেৱ ৰাজগহে মনুস্সদলিদ্দো [মনুস্সদড়িদ্দো (সী. স্যা. কং.)] অহোসি মনুস্সকপণো মনুস্সৱৰাকো. সো তথাগতপ্পৱেদিতে ধম্মৱিনযে সদ্ধং সমাদিযি, সীলং সমাদিযি, সুতং সমাদিযি, চাগং সমাদিযি, পঞ্ঞং সমাদিযি. সো তথাগতপ্পৱেদিতে ধম্মৱিনযে সদ্ধং সমাদিযিত্ৱা সীলং সমাদিযিত্ৱা সুতং সমাদিযিত্ৱা চাগং সমাদিযিত্ৱা পঞ্ঞং সমাদিযিত্ৱা কাযস্স ভেদা পৰং মৰণা সুগতিং সগ্গং লোকং উপপজ্জি দেৱানং তাৱতিংসানং সহব্যতং. সো অঞ্ঞে দেৱে অতিৰোচতি ৱণ্ণেন চেৱ যসসা চ. তত্ৰ সুদং, ভিক্খৱে, দেৱা তাৱতিংসা উজ্ঝাযন্তি খিয্যন্তি ৱিপাচেন্তি – ‘অচ্ছৰিযং ৱত ভো, অব্ভুতং ৱত ভো! অযঞ্হি দেৱপুত্তো পুব্বে মনুস্সভূতো সমানো মনুস্সদলিদ্দো অহোসি মনুস্সকপণো মনুস্সৱৰাকো; সো কাযস্স ভেদা পৰং মৰণা সুগতিং সগ্গং লোকং উপপন্নো দেৱানং তাৱতিংসানং সহব্যতং. সো অঞ্ঞে দেৱে অতিৰোচতি ৱণ্ণেন চেৱ যসসা চা’’’তি.

‘‘অথ খো, ভিক্খৱে, সক্কো দেৱানমিন্দো দেৱে তাৱতিংসে আমন্তেসি – ‘মা খো তুম্হে, মাৰিসা, এতস্স দেৱপুত্তস্স উজ্ঝাযিত্থ. এসো খো, মাৰিসা, দেৱপুত্তো পুব্বে মনুস্সভূতো সমানো তথাগতপ্পৱেদিতে ধম্মৱিনযে সদ্ধং সমাদিযি, সীলং সমাদিযি, সুতং সমাদিযি, চাগং সমাদিযি, পঞ্ঞং সমাদিযি. সো তথাগতপ্পৱেদিতে ধম্মৱিনযে সদ্ধং সমাদিযিত্ৱা সীলং সমাদিযিত্ৱা সুতং সমাদিযিত্ৱা চাগং সমাদিযিত্ৱা পঞ্ঞং সমাদিযিত্ৱা কাযস্স ভেদা পৰং মৰণা সুগতিং সগ্গং লোকং উপপন্নো দেৱানং তাৱতিংসানং সহব্যতং. সো অঞ্ঞে দেৱে অতিৰোচতি ৱণ্ণেন চেৱ যসসা চা’’’তি. অথ খো, ভিক্খৱে, সক্কো দেৱানমিন্দো দেৱে তাৱতিংসে অনুনযমানো তাযং ৱেলাযং ইমা গাথাযো অভাসি –

‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অৰিযকন্তং পসংসিতং.

‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৱিতং.

‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৱী, সৰং বুদ্ধান সাসন’’ন্তি.

৫. ৰামণেয্যকসুত্তং

২৬১. সাৱত্থিযং জেতৱনে. অথ খো সক্কো দেৱানমিন্দো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতো খো সক্কো দেৱানমিন্দো ভগৱন্তং এতদৱোচ – ‘‘কিং নু খো, ভন্তে, ভূমিৰামণেয্যক’’ন্তি?

‘‘আৰামচেত্যা ৱনচেত্যা, পোক্খৰঞ্ঞো সুনিম্মিতা;

মনুস্সৰামণেয্যস্স, কলং নাগ্ঘন্তি সোড়সিং.

‘‘গামে ৱা যদি ৱাৰঞ্ঞে, নিন্নে ৱা যদি ৱা থলে;

যত্থ অৰহন্তো ৱিহৰন্তি, তং ভূমিৰামণেয্যক’’ন্তি.

৬. যজমানসুত্তং

২৬২. একং সমযং ভগৱা ৰাজগহে ৱিহৰতি গিজ্ঝকূটে পব্বতে. অথ খো সক্কো দেৱানমিন্দো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতো খো সক্কো দেৱানমিন্দো ভগৱন্তং গাথায অজ্ঝভাসি –

‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, কত্থ দিন্নং মহপ্ফল’’ন্তি.

‘‘চত্তাৰো চ পটিপন্না, চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, সঙ্ঘে দিন্নং মহপ্ফল’’ন্তি.

৭. বুদ্ধৱন্দনাসুত্তং

২৬৩. সাৱত্থিযং জেতৱনে. তেন খো পন সমযেন ভগৱা দিৱাৱিহাৰগতো হোতি পটিসল্লীনো. অথ খো সক্কো চ দেৱানমিন্দো ব্ৰহ্মা চ সহম্পতি যেন ভগৱা তেনুপসঙ্কমিংসু; উপসঙ্কমিত্ৱা পচ্চেকং দ্ৱাৰবাহং নিস্সায অট্ঠংসু. অথ খো সক্কো দেৱানমিন্দো ভগৱতো সন্তিকে ইমং গাথং অভাসি –

‘‘উট্ঠেহি ৱীৰ ৱিজিতসঙ্গাম,

পন্নভাৰ অনণ ৱিচৰ লোকে;

চিত্তঞ্চ তে সুৱিমুত্তং,

চন্দো যথা পন্নৰসায ৰত্তি’’ন্তি.

‘‘ন খো, দেৱানমিন্দ, তথাগতা এৱং ৱন্দিতব্বা. এৱঞ্চ খো, দেৱানমিন্দ, তথাগতা ৱন্দিতব্বা –

‘‘উট্ঠেহি ৱীৰ ৱিজিতসঙ্গাম,

সত্থৱাহ অনণ ৱিচৰ লোকে;

দেসস্সু ভগৱা ধম্মং,

অঞ্ঞাতাৰো ভৱিস্সন্তী’’তি.

৮. গহট্ঠৱন্দনাসুত্তং

২৬৪. সাৱত্থিযং. তত্ৰ…পে… এতদৱোচ – ‘‘ভূতপুব্বং, ভিক্খৱে, সক্কো দেৱানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞৰথং. উয্যানভূমিং গচ্ছাম সুভূমিং দস্সনাযা’তি. ‘এৱং ভদ্দন্তৱা’তি খো, ভিক্খৱে, মাতলি সঙ্গাহকো সক্কস্স দেৱানমিন্দস্স পটিস্সুত্ৱা সহস্সযুত্তং আজঞ্ঞৰথং যোজেত্ৱা সক্কস্স দেৱানমিন্দস্স পটিৱেদেসি – ‘যুত্তো খো তে, মাৰিস, সহস্সযুত্তো আজঞ্ঞৰথো. যস্স দানি কালং মঞ্ঞসী’’’তি. অথ খো, ভিক্খৱে, সক্কো দেৱানমিন্দো ৱেজযন্তপাসাদা ওৰোহন্তো অঞ্জলিং কত্ৱা [পঞ্জলিকো (পী.), পঞ্জলিং কত্ৱা (ক.)] সুদং পুথুদ্দিসা নমস্সতি. অথ খো, ভিক্খৱে, মাতলি সঙ্গাহকো সক্কং দেৱানমিন্দং গাথায অজ্ঝভাসি –

‘‘তং নমস্সন্তি তেৱিজ্জা, সব্বে ভুম্মা চ খত্তিযা;

চত্তাৰো চ মহাৰাজা, তিদসা চ যসস্সিনো;

অথ কো নাম সো যক্খো, যং ত্ৱং সক্ক নমস্সসী’’তি.

‘‘মং নমস্সন্তি তেৱিজ্জা, সব্বে ভুম্মা চ খত্তিযা;

চত্তাৰো চ মহাৰাজা, তিদসা চ যসস্সিনো.

‘‘অহঞ্চ সীলসম্পন্নে, চিৰৰত্তসমাহিতে;

সম্মাপব্বজিতে ৱন্দে, ব্ৰহ্মচৰিযপৰাযনে.

‘‘যে গহট্ঠা পুঞ্ঞকৰা, সীলৱন্তো উপাসকা;

ধম্মেন দাৰং পোসেন্তি, তে নমস্সামি মাতলী’’তি.

‘‘সেট্ঠা হি কিৰ লোকস্মিং, যে ত্ৱং সক্ক নমস্সসি;

অহম্পি তে নমস্সামি, যে নমস্সসি ৱাসৱা’’তি.

‘‘ইদং ৱত্ৱান মঘৱা, দেৱৰাজা সুজম্পতি;

পুথুদ্দিসা নমস্সিত্ৱা, পমুখো ৰথমাৰুহী’’তি.

৯. সত্থাৰৱন্দনাসুত্তং

২৬৫. সাৱত্থিযং জেতৱনে. ‘‘ভূতপুব্বং, ভিক্খৱে, সক্কো দেৱানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞৰথং, উয্যানভূমিং গচ্ছাম সুভূমিং দস্সনাযা’তি. ‘এৱং ভদ্দন্তৱা’তি খো, ভিক্খৱে, মাতলি সঙ্গাহকো সক্কস্স দেৱানমিন্দস্স পটিস্সুত্ৱা সহস্সযুত্তং আজঞ্ঞৰথং যোজেত্ৱা সক্কস্স দেৱানমিন্দস্স পটিৱেদেসি – ‘যুত্তো খো তে, মাৰিস, সহস্সযুত্তো আজঞ্ঞৰথো. যস্স দানি কালং মঞ্ঞসী’’’তি. অথ খো, ভিক্খৱে, সক্কো দেৱানমিন্দো ৱেজযন্তপাসাদা ওৰোহন্তো অঞ্জলিং কত্ৱা সুদং ভগৱন্তং নমস্সতি. অথ খো, ভিক্খৱে, মাতলি সঙ্গাহকো সক্কং দেৱানমিন্দং গাথায অজ্ঝভাসি –

‘‘যঞ্হি দেৱা মনুস্সা চ, তং নমস্সন্তি ৱাসৱ;

অথ কো নাম সো যক্খো, যং ত্ৱং সক্ক নমস্সসী’’তি.

‘‘যো ইধ সম্মাসম্বুদ্ধো, অস্মিং লোকে সদেৱকে;

অনোমনামং সত্থাৰং, তং নমস্সামি মাতলি.

‘‘যেসং ৰাগো চ দোসো চ, অৱিজ্জা চ ৱিৰাজিতা;

খীণাসৱা অৰহন্তো, তে নমস্সামি মাতলি.

‘‘যে ৰাগদোসৱিনযা, অৱিজ্জাসমতিক্কমা;

সেক্খা অপচযাৰামা, অপ্পমত্তানুসিক্খৰে;

তে নমস্সামি মাতলী’’তি.

‘‘সেট্ঠা হি কিৰ লোকস্মিং, যে ত্ৱং সক্ক নমস্সসি;

অহম্পি তে নমস্সামি, যে নমস্সসি ৱাসৱা’’তি.

‘‘ইদং ৱত্ৱান মঘৱা, দেৱৰাজা সুজম্পতি;

ভগৱন্তং নমস্সিত্ৱা, পমুখো ৰথমাৰুহী’’তি.

১০. সঙ্ঘৱন্দনাসুত্তং

২৬৬. সাৱত্থিযং জেতৱনে. তত্ৰ খো…পে… এতদৱোচ – ‘‘ভূতপুব্বং, ভিক্খৱে, সক্কো দেৱানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞৰথং, উয্যানভূমিং গচ্ছাম সুভূমিং দস্সনাযা’তি. ‘এৱং ভদ্দন্তৱা’তি খো, ভিক্খৱে, মাতলি সঙ্গাহকো সক্কস্স দেৱানমিন্দস্স পটিস্সুত্ৱা, সহস্সযুত্তং আজঞ্ঞৰথং যোজেত্ৱা সক্কস্স দেৱানমিন্দস্স পটিৱেদেসি – ‘যুত্তো খো তে, মাৰিস, সহস্সযুত্তো আজঞ্ঞৰথো, যস্স দানি কালং মঞ্ঞসী’’’তি. অথ খো, ভিক্খৱে, সক্কো দেৱানমিন্দো ৱেজযন্তপাসাদা ওৰোহন্তো অঞ্জলিং কত্ৱা সুদং ভিক্খুসঙ্ঘং নমস্সতি. অথ খো, ভিক্খৱে, মাতলি সঙ্গাহকো সক্কং দেৱানমিন্দং গাথায অজ্ঝভাসি –

‘‘তঞ্হি এতে নমস্সেয্যুং, পূতিদেহসযা নৰা;

নিমুগ্গা কুণপম্হেতে, খুপ্পিপাসসমপ্পিতা.

‘‘কিং নু তেসং পিহযসি, অনাগাৰান ৱাসৱ;

আচাৰং ইসিনং ব্ৰূহি, তং সুণোম ৱচো তৱা’’তি.

‘‘এতং তেসং পিহযামি, অনাগাৰান মাতলি;

যম্হা গামা পক্কমন্তি, অনপেক্খা ৱজন্তি তে.

‘‘ন তেসং কোট্ঠে ওপেন্তি, ন কুম্ভি [ন কুম্ভা (স্যা. কং. পী. ক.)] ন কড়োপিযং [খড়োপিযং (সী.)];

পৰনিট্ঠিতমেসানা [পৰনিট্ঠিতমেসনা (স্যা. কং. ক.)], তেন যাপেন্তি সুব্বতা.

‘‘সুমন্তমন্তিনো ধীৰা, তুণ্হীভূতা সমঞ্চৰা;

দেৱা ৱিৰুদ্ধা অসুৰেহি, পুথু মচ্চা চ মাতলি.

‘‘অৱিৰুদ্ধা ৱিৰুদ্ধেসু, অত্তদণ্ডেসু নিব্বুতা;

সাদানেসু অনাদানা, তে নমস্সামি মাতলী’’তি.

‘‘সেট্ঠা হি কিৰ লোকস্মিং, যে ত্ৱং সক্ক নমস্সসি;

অহম্পি তে নমস্সামি, যে নমস্সসি ৱাসৱা’’তি.

‘‘ইদং ৱত্ৱান মঘৱা, দেৱৰাজা সুজম্পতি;

ভিক্খুসঙ্ঘং নমস্সিত্ৱা, পমুখো ৰথমাৰুহী’’তি.

দুতিযো ৱগ্গো.

তস্সুদ্দানং –

দেৱা পন [ৱ তপদেন (সী. স্যা. কং.)] তযো ৱুত্তা, দলিদ্দঞ্চ ৰামণেয্যকং;

যজমানঞ্চ ৱন্দনা, তযো সক্কনমস্সনাতি.