১১. সক্কসংযুত্তং

১. পঠমৱগ্গো

১. সুৱীৰসুত্তং

২৪৭. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, অসুৰা দেৱে অভিযংসু. অথ খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা পমাদং আপাদেসি [আহৰেসি (কত্থচি) নৱঙ্গুত্তৰে সীহনাদসুত্তেপি]. দুতিযম্পি খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা দুতিযম্পি পমাদং আপাদেসি. ততিযম্পি খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা ততিযম্পি পমাদং আপাদেসি. অথ খো, ভিক্খৱে, সক্কো দেৱানমিন্দো সুৱীৰং দেৱপুত্তং গাথায অজ্ঝভাসি –

‘‘অনুট্ঠহং অৱাযামং, সুখং যত্ৰাধিগচ্ছতি;

সুৱীৰ তত্থ গচ্ছাহি, মঞ্চ তত্থেৱ পাপযা’’তি.

‘‘অলস্ৱস্স [অলস’স্স (সী. পী.), অলস্ৱাযং (স্যা. কং.)] অনুট্ঠাতা, ন চ কিচ্চানি কাৰযে;

সব্বকামসমিদ্ধস্স, তং মে সক্ক ৱৰং দিসা’’তি.

‘‘যত্থালসো অনুট্ঠাতা, অচ্চন্তং সুখমেধতি;

সুৱীৰ তত্থ গচ্ছাহি, মঞ্চ তত্থেৱ পাপযা’’তি.

‘‘অকম্মুনা [অকম্মনা (সী. পী.)] দেৱসেট্ঠ, সক্ক ৱিন্দেমু যং সুখং;

অসোকং অনুপাযাসং, তং মে সক্ক ৱৰং দিসা’’তি.

‘‘সচে অত্থি অকম্মেন, কোচি ক্ৱচি ন জীৱতি;

নিব্বানস্স হি সো মগ্গো, সুৱীৰ তত্থ গচ্ছাহি;

মঞ্চ তত্থেৱ পাপযা’’তি.

‘‘সো হি নাম, ভিক্খৱে, সক্কো দেৱানমিন্দো সকং পুঞ্ঞফলং উপজীৱমানো দেৱানং তাৱতিংসানং ইস্সৰিযাধিপচ্চং ৰজ্জং কাৰেন্তো উট্ঠানৱীৰিযস্স ৱণ্ণৱাদী ভৱিস্সতি. ইধ খো তং, ভিক্খৱে, সোভেথ, যং তুম্হে এৱং স্ৱাক্খাতে ধম্মৱিনযে পব্বজিতা সমানা উট্ঠহেয্যাথ ঘটেয্যাথ ৱাযমেয্যাথ অপ্পত্তস্স পত্তিযা অনধিগতস্স অধিগমায, অসচ্ছিকতস্স সচ্ছিকিৰিযাযা’’তি.

২. সুসীমসুত্তং

২৪৮. সাৱত্থিযং. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, অসুৰা দেৱে অভিযংসু. অথ খো, ভিক্খৱে, সক্কো দেৱানমিন্দো সুসীমং [সুসিমং (স্যা. কং. ক.)] দেৱপুত্তং আমন্তেসি – ‘এতে, তাত সুসীম, অসুৰা দেৱে অভিযন্তি. গচ্ছ, তাত সুসীম, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুসীমো দেৱপুত্তো সক্কস্স দেৱানমিন্দস্স পটিস্সুত্ৱা পমাদং আপাদেসি. দুতিযম্পি খো, ভিক্খৱে, সক্কো দেৱানমিন্দো সুসীমং দেৱপুত্তং আমন্তেসি…পে… দুতিযম্পি পমাদং আপাদেসি. ততিযম্পি খো, ভিক্খৱে, সক্কো দেৱানমিন্দো সুসীমং দেৱপুত্তং আমন্তেসি…পে… ততিযম্পি পমাদং আপাদেসি. অথ খো, ভিক্খৱে, সক্কো দেৱানমিন্দো সুসীমং দেৱপুত্তং গাথায অজ্ঝভাসি –

‘‘অনুট্ঠহং অৱাযামং, সুখং যত্ৰাধিগচ্ছতি;

সুসীম তত্থ গচ্ছাহি, মঞ্চ তত্থেৱ পাপযা’’তি.

‘‘অলস্ৱস্স অনুট্ঠাতা, ন চ কিচ্চানি কাৰযে;

সব্বকামসমিদ্ধস্স, তং মে সক্ক ৱৰং দিসা’’তি.

‘‘যত্থালসো অনুট্ঠাতা, অচ্চন্তং সুখমেধতি;

সুসীম তত্থ গচ্ছাহি, মঞ্চ তত্থেৱ পাপযা’’তি.

‘‘অকম্মুনা দেৱসেট্ঠ, সক্ক ৱিন্দেমু যং সুখং;

অসোকং অনুপাযাসং, তং মে সক্ক ৱৰং দিসা’’তি.

‘‘সচে অত্থি অকম্মেন, কোচি ক্ৱচি ন জীৱতি;

নিব্বানস্স হি সো মগ্গো, সুসীম তত্থ গচ্ছাহি;

মঞ্চ তত্থেৱ পাপযা’’তি.

‘‘সো হি নাম, ভিক্খৱে, সক্কো দেৱানমিন্দো সকং পুঞ্ঞফলং উপজীৱমানো দেৱানং তাৱতিংসানং ইস্সৰিযাধিপচ্চং ৰজ্জং কাৰেন্তো উট্ঠানৱীৰিযস্স ৱণ্ণৱাদী ভৱিস্সতি. ইধ খো তং, ভিক্খৱে, সোভেথ, যং তুম্হে এৱং স্ৱাক্খাতে ধম্মৱিনযে পব্বজিতা সমানা উট্ঠহেয্যাথ ঘটেয্যাথ ৱাযমেয্যাথ অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিৰিযাযা’’তি.

৩. ধজগ্গসুত্তং

২৪৯. সাৱত্থিযং. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, সক্কো দেৱানমিন্দো দেৱে তাৱতিংসে আমন্তেসি –

‘সচে, মাৰিসা, দেৱানং সঙ্গামগতানং উপ্পজ্জেয্য ভযং ৱা ছম্ভিতত্তং ৱা লোমহংসো ৱা, মমেৱ তস্মিং সমযে ধজগ্গং উল্লোকেয্যাথ. মমঞ্হি ৱো ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে মে ধজগ্গং উল্লোকেয্যাথ, অথ পজাপতিস্স দেৱৰাজস্স ধজগ্গং উল্লোকেয্যাথ. পজাপতিস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে পজাপতিস্স দেৱৰাজস্স ধজগ্গং উল্লোকেয্যাথ, অথ ৱৰুণস্স দেৱৰাজস্স ধজগ্গং উল্লোকেয্যাথ. ৱৰুণস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে ৱৰুণস্স দেৱৰাজস্স ধজগ্গং উল্লোকেয্যাথ, অথ ঈসানস্স দেৱৰাজস্স ধজগ্গং উল্লোকেয্যাথ. ঈসানস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতী’’’তি.

‘‘তং খো পন, ভিক্খৱে, সক্কস্স ৱা দেৱানমিন্দস্স ধজগ্গং উল্লোকযতং, পজাপতিস্স ৱা দেৱৰাজস্স ধজগ্গং উল্লোকযতং, ৱৰুণস্স ৱা দেৱৰাজস্স ধজগ্গং উল্লোকযতং, ঈসানস্স ৱা দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযেথাপি নোপি পহীযেথ [নো পহীযেথ (ক.)].

‘‘তং কিস্স হেতু? সক্কো হি, ভিক্খৱে, দেৱানমিন্দো অৱীতৰাগো অৱীতদোসো অৱীতমোহো ভীৰু ছম্ভী উত্ৰাসী পলাযীতি.

‘‘অহঞ্চ খো, ভিক্খৱে, এৱং ৱদামি – ‘সচে তুম্হাকং, ভিক্খৱে, অৰঞ্ঞগতানং ৱা ৰুক্খমূলগতানং ৱা সুঞ্ঞাগাৰগতানং ৱা উপ্পজ্জেয্য ভযং ৱা ছম্ভিতত্তং ৱা লোমহংসো ৱা, মমেৱ তস্মিং সমযে অনুস্সৰেয্যাথ – ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. মমঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘নো চে মং অনুস্সৰেয্যাথ, অথ ধম্মং অনুস্সৰেয্যাথ – ‘স্ৱাক্খাতো ভগৱতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’তি. ধম্মঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘নো চে ধম্মং অনুস্সৰেয্যাথ, অথ সঙ্ঘং অনুস্সৰেয্যাথ – ‘সুপ্পটিপন্নো ভগৱতো সাৱকসঙ্ঘো উজুপ্পটিপন্নো ভগৱতো সাৱকসঙ্ঘো ঞাযপ্পটিপন্নো ভগৱতো সাৱকসঙ্ঘো সামীচিপ্পটিপন্নো ভগৱতো সাৱকসঙ্ঘো, যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো, আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্সা’তি. সঙ্ঘঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘তং কিস্স হেতু? তথাগতো হি, ভিক্খৱে, অৰহং সম্মাসম্বুদ্ধো ৱীতৰাগো ৱীতদোসো ৱীতমোহো অভীৰু অচ্ছম্ভী অনুত্ৰাসী অপলাযী’’তি. ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘অৰঞ্ঞে ৰুক্খমূলে ৱা, সুঞ্ঞাগাৰেৱ ভিক্খৱো;

অনুস্সৰেথ [অনুস্সৰেয্যাথ (ক.) পদসিদ্ধি পন চিন্তেতব্বা] সম্বুদ্ধং, ভযং তুম্হাক নো সিযা.

‘‘নো চে বুদ্ধং সৰেয্যাথ, লোকজেট্ঠং নৰাসভং;

অথ ধম্মং সৰেয্যাথ, নিয্যানিকং সুদেসিতং.

‘‘নো চে ধম্মং সৰেয্যাথ, নিয্যানিকং সুদেসিতং;

অথ সঙ্ঘং সৰেয্যাথ, পুঞ্ঞক্খেত্তং অনুত্তৰং.

‘‘এৱং বুদ্ধং সৰন্তানং, ধম্মং সঙ্ঘঞ্চ ভিক্খৱো;

ভযং ৱা ছম্ভিতত্তং ৱা, লোমহংসো ন হেস্সতী’’তি.

৪. ৱেপচিত্তিসুত্তং

২৫০. সাৱত্থিনিদানং. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, ৱেপচিত্তি অসুৰিন্দো অসুৰে আমন্তেসি – ‘সচে, মাৰিসা, দেৱানং অসুৰসঙ্গামে সমুপব্যূড়্হে অসুৰা জিনেয্যুং দেৱা পৰাজিনেয্যুং [পৰাজেয্যুং (সী. পী.)], যেন নং সক্কং দেৱানমিন্দং কণ্ঠপঞ্চমেহি বন্ধনেহি বন্ধিত্ৱা মম সন্তিকে আনেয্যাথ অসুৰপুৰ’ন্তি. সক্কোপি খো, ভিক্খৱে, দেৱানমিন্দো দেৱে তাৱতিংসে আমন্তেসি – ‘সচে, মাৰিসা, দেৱানং অসুৰসঙ্গামে সমুপব্যূড়্হে দেৱা জিনেয্যুং অসুৰা পৰাজিনেয্যুং, যেন নং ৱেপচিত্তিং অসুৰিন্দং কণ্ঠপঞ্চমেহি বন্ধনেহি বন্ধিত্ৱা মম সন্তিকে আনেয্যাথ সুধম্মসভ’’’ন্তি. তস্মিং খো পন, ভিক্খৱে, সঙ্গামে দেৱা জিনিংসু, অসুৰা পৰাজিনিংসু [পৰাজিংসু (সী. পী.)]. অথ খো, ভিক্খৱে, দেৱা তাৱতিংসা ৱেপচিত্তিং অসুৰিন্দং কণ্ঠপঞ্চমেহি বন্ধনেহি বন্ধিত্ৱা সক্কস্স দেৱানমিন্দস্স সন্তিকে আনেসুং সুধম্মসভং. তত্ৰ সুদং, ভিক্খৱে, ৱেপচিত্তি অসুৰিন্দো কণ্ঠপঞ্চমেহি বন্ধনেহি বদ্ধো সক্কং দেৱানমিন্দং সুধম্মসভং পৱিসন্তঞ্চ নিক্খমন্তঞ্চ অসব্ভাহি ফৰুসাহি ৱাচাহি অক্কোসতি পৰিভাসতি. অথ খো, ভিক্খৱে, মাতলি সঙ্গাহকো সক্কং দেৱানমিন্দং গাথাহি অজ্ঝভাসি –

‘‘ভযা নু মঘৱা সক্ক, দুব্বল্যা নো তিতিক্খসি;

সুণন্তো ফৰুসং ৱাচং, সম্মুখা ৱেপচিত্তিনো’’তি.

‘‘নাহং ভযা ন দুব্বল্যা, খমামি ৱেপচিত্তিনো;

কথঞ্হি মাদিসো ৱিঞ্ঞূ, বালেন পটিসংযুজে’’তি.

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীৰো বালং নিসেধযে’’তি.

‘‘এতদেৱ অহং মঞ্ঞে, বালস্স পটিসেধনং;

পৰং সঙ্কুপিতং ঞত্ৱা, যো সতো উপসম্মতী’’তি.

‘‘এতদেৱ তিতিক্খায, ৱজ্জং পস্সামি ৱাসৱ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝাৰুহতি দুম্মেধো, গোৱ ভিয্যো পলাযিন’’ন্তি.

‘‘কামং মঞ্ঞতু ৱা মা ৱা, ভযা ম্যাযং তিতিক্খতি;

সদত্থপৰমা অত্থা, খন্ত্যা ভিয্যো ন ৱিজ্জতি.

‘‘যো হৱে বলৱা সন্তো, দুব্বলস্স তিতিক্খতি;

তমাহু পৰমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৱত্তা ন ৱিজ্জতি.

‘‘তস্সেৱ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চৰতি, অত্তনো চ পৰস্স চ;

পৰং সঙ্কুপিতং ঞত্ৱা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পৰস্স চ;

জনা মঞ্ঞন্তি বালোতি, যে ধম্মস্স অকোৱিদা’’তি.

‘‘সো হি নাম, ভিক্খৱে, সক্কো দেৱানমিন্দো সকং পুঞ্ঞফলং উপজীৱমানো দেৱানং তাৱতিংসানং ইস্সৰিযাধিপচ্চং ৰজ্জং কাৰেন্তো খন্তিসোৰচ্চস্স ৱণ্ণৱাদী ভৱিস্সতি. ইধ খো তং, ভিক্খৱে, সোভেথ যং তুম্হে এৱং স্ৱাক্খাতে ধম্মৱিনযে পব্বজিতা সমানা খমা চ ভৱেয্যাথ সোৰতা চা’’তি.

৫. সুভাসিতজযসুত্তং

২৫১. সাৱত্থিনিদানং. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, ৱেপচিত্তি অসুৰিন্দো সক্কং দেৱানমিন্দং এতদৱোচ – ‘হোতু, দেৱানমিন্দ, সুভাসিতেন জযো’তি. ‘হোতু, ৱেপচিত্তি, সুভাসিতেন জযো’তি. অথ খো, ভিক্খৱে, দেৱা চ অসুৰা চ পাৰিসজ্জে ঠপেসুং – ‘ইমে নো সুভাসিতদুব্ভাসিতং আজানিস্সন্তী’তি. অথ খো, ভিক্খৱে, ৱেপচিত্তিং অসুৰিন্দো সক্কং দেৱানমিন্দং এতদৱোচ – ‘ভণ, দেৱানমিন্দ, গাথ’ন্তি. এৱং ৱুত্তে, ভিক্খৱে, সক্কো দেৱানমিন্দো ৱেপচিত্তি অসুৰিন্দং এতদৱোচ – ‘তুম্হে খ্ৱেত্থ, ৱেপচিত্তি, পুব্বদেৱা. ভণ, ৱেপচিত্তি, গাথ’ন্তি. এৱং ৱুত্তে, ভিক্খৱে, ৱেপচিত্তি অসুৰিন্দো ইমং গাথং অভাসি –

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীৰো বালং নিসেধযে’’তি.

‘‘ভাসিতায খো পন, ভিক্খৱে, ৱেপচিত্তিনা অসুৰিন্দেন গাথায অসুৰা অনুমোদিংসু, দেৱা তুণ্হী অহেসুং. অথ খো, ভিক্খৱে, ৱেপচিত্তি অসুৰিন্দো সক্কং দেৱানমিন্দং এতদৱোচ – ‘ভণ, দেৱানমিন্দ, গাথ’ন্তি. এৱং ৱুত্তে, ভিক্খৱে, সক্কো দেৱানমিন্দো ইমং গাথং অভাসি –

‘‘এতদেৱ অহং মঞ্ঞে, বালস্স পটিসেধনং;

পৰং সঙ্কুপিতং ঞত্ৱা, যো সতো উপসম্মতী’’তি.

‘‘ভাসিতায খো পন, ভিক্খৱে, সক্কেন দেৱানমিন্দেন গাথায, দেৱা অনুমোদিংসু, অসুৰা তুণ্হী অহেসুং. অথ খো, ভিক্খৱে, সক্কো দেৱানমিন্দো ৱেপচিত্তিং অসুৰিন্দং এতদৱোচ – ‘ভণ, ৱেপচিত্তি, গাথ’ন্তি. এৱং ৱুত্তে, ভিক্খৱে, ৱেপচিত্তি অসুৰিন্দো ইমং গাথং অভাসি –

‘‘এতদেৱ তিতিক্খায, ৱজ্জং পস্সামি ৱাসৱ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝাৰুহতি দুম্মেধো, গোৱ ভিয্যো পলাযিন’’ন্তি.

‘‘কামং মঞ্ঞতু ৱা মা ৱা, ভযা ম্যাযং তিতিক্খতি;

সদত্থপৰমা অত্থা, খন্ত্যা ভিয্যো ন ৱিজ্জতি.

‘‘যো হৱে বলৱা সন্তো, দুব্বলস্স তিতিক্খতি;

তমাহু পৰমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৱত্তা ন ৱিজ্জতি.

‘‘তস্সেৱ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চৰতি, অত্তনো চ পৰস্স চ;

পৰং সঙ্কুপিতং ঞত্ৱা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পৰস্স চ;

জনা মঞ্ঞন্তি বালোতি, যে ধম্মস্স অকোৱিদা’’তি.

‘‘ভাসিতাসু খো পন, ভিক্খৱে, সক্কেন দেৱানমিন্দেন গাথাসু, দেৱা অনুমোদিংসু, অসুৰা তুণ্হী অহেসুং. অথ খো, ভিক্খৱে, দেৱানঞ্চ অসুৰানঞ্চ পাৰিসজ্জা এতদৱোচুং – ‘ভাসিতা খো ৱেপচিত্তিনা অসুৰিন্দেন গাথাযো. তা চ খো সদণ্ডাৱচৰা সসত্থাৱচৰা, ইতি ভণ্ডনং ইতি ৱিগ্গহো ইতি কলহো. ভাসিতা খো [ভাসিতা খো পন (সী.)] সক্কেন দেৱানমিন্দেন গাথাযো. তা চ খো অদণ্ডাৱচৰা অসত্থাৱচৰা, ইতি অভণ্ডনং ইতি অৱিগ্গহো ইতি অকলহো. সক্কস্স দেৱানমিন্দস্স সুভাসিতেন জযো’তি. ইতি খো, ভিক্খৱে সক্কস্স দেৱানমিন্দস্স সুভাসিতেন জযো অহোসী’’তি.

৬. কুলাৱকসুত্তং

২৫২. সাৱত্থিযং. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. তস্মিং খো পন, ভিক্খৱে, সঙ্গামে অসুৰা জিনিংসু, দেৱা পৰাজিনিংসু. পৰাজিতা চ খো, ভিক্খৱে, দেৱা অপাযংস্ৱেৱ উত্তৰেনমুখা, অভিযংস্ৱেৱ নে অসুৰা. অথ খো, ভিক্খৱে, সক্কো দেৱানমিন্দো মাতলি সঙ্গাহকং গাথায অজ্ঝভাসি –

‘‘কুলাৱকা মাতলি সিম্বলিস্মিং,

ঈসামুখেন পৰিৱজ্জযস্সু;

কামং চজাম অসুৰেসু পাণং,

মাযিমে দিজা ৱিকুলাৱকা [ৱিকুলাৱা (স্যা. কং. ক.)] অহেসু’’ন্তি.

‘‘‘এৱং ভদ্দন্তৱা’তি খো, ভিক্খৱে, মাতলি সঙ্গাহকো সক্কস্স দেৱানমিন্দস্স পটিস্সুত্ৱা সহস্সযুত্তং আজঞ্ঞৰথং পচ্চুদাৱত্তেসি. অথ খো, ভিক্খৱে, অসুৰানং এতদহোসি – ‘পচ্চুদাৱত্তো খো দানি সক্কস্স দেৱানমিন্দস্স সহস্সযুত্তো আজঞ্ঞৰথো. দুতিযম্পি খো দেৱা অসুৰেহি সঙ্গামেস্সন্তীতি ভীতা অসুৰপুৰমেৱ পাৱিসিংসু. ইতি খো, ভিক্খৱে, সক্কস্স দেৱানমিন্দস্স ধম্মেন জযো অহোসী’’’তি.

৭. নদুব্ভিযসুত্তং

২৫৩. সাৱত্থিযং. ‘‘ভূতপুব্বং, ভিক্খৱে, সক্কস্স দেৱানমিন্দস্স ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘যোপি মে অস্স সুপচ্চত্থিকো তস্সপাহং ন দুব্ভেয্য’ন্তি. অথ খো, ভিক্খৱে, ৱেপচিত্তি অসুৰিন্দো সক্কস্স দেৱানমিন্দস্স চেতসা চেতোপৰিৱিতক্কমঞ্ঞায যেন সক্কো দেৱানমিন্দো তেনুপসঙ্কমি. অদ্দসা খো, ভিক্খৱে, সক্কো দেৱানমিন্দো ৱেপচিত্তিং অসুৰিন্দং দূৰতোৱ আগচ্ছন্তং. দিস্ৱান ৱেপচিত্তিং অসুৰিন্দং এতদৱোচ – ‘তিট্ঠ, ৱেপচিত্তি, গহিতোসী’’’তি.

‘‘যদেৱ তে, মাৰিস, পুব্বে চিত্তং, তদেৱ ত্ৱং মা পজহাসী’’তি [তদেৱ ত্ৱং মাৰিস পহাসীতি (সী. স্যা. কং.)].

‘‘সপস্সু চ মে, ৱেপচিত্তি, অদুব্ভাযা’’তি [অদ্ৰুব্ভায (ক.)].

‘‘যং মুসা ভণতো পাপং, যং পাপং অৰিযূপৱাদিনো;

মিত্তদ্দুনো চ যং পাপং, যং পাপং অকতঞ্ঞুনো;

তমেৱ পাপং ফুসতু [ফুসতি (সী. পী.)], যো তে দুব্ভে সুজম্পতী’’তি.

৮. ৱেৰোচনঅসুৰিন্দসুত্তং

২৫৪. সাৱত্থিযং জেতৱনে. তেন খো পন সমযেন ভগৱা দিৱাৱিহাৰগতো হোতি পটিসল্লীনো. অথ খো সক্কো চ দেৱানমিন্দো ৱেৰোচনো চ অসুৰিন্দো যেন ভগৱা তেনুপসঙ্কমিংসু; উপসঙ্কমিত্ৱা পচ্চেকং দ্ৱাৰবাহং নিস্সায অট্ঠংসু. অথ খো ৱেৰোচনো অসুৰিন্দো ভগৱতো সন্তিকে ইমং গাথং অভাসি –

‘‘ৱাযমেথেৱ পুৰিসো, যাৱ অত্থস্স নিপ্ফদা;

নিপ্ফন্নসোভনো [সোভিনো (সী.), সোভণো (পী. ক.)] অত্থো [অত্থা (সী.)], ৱেৰোচনৱচো ইদ’’ন্তি.

‘‘ৱাযমেথেৱ পুৰিসো, যাৱ অত্থস্স নিপ্ফদা;

নিপ্ফন্নসোভনো অত্থো [নিপ্ফন্নসোভিনো অত্থা (সী. স্যা. কং.)], খন্ত্যা ভিয্যো ন ৱিজ্জতী’’তি.

‘‘সব্বে সত্তা অত্থজাতা, তত্থ তত্থ যথাৰহং;

সংযোগপৰমা ত্ৱেৱ, সম্ভোগা সব্বপাণিনং;

নিপ্ফন্নসোভনো অত্থো, ৱেৰোচনৱচো ইদ’’ন্তি.

‘‘সব্বে সত্তা অত্থজাতা, তত্থ তত্থ যথাৰহং;

সংযোগপৰমা ত্ৱেৱ, সম্ভোগা সব্বপাণিনং;

নিপ্ফন্নসোভনো অত্থো, খন্ত্যা ভিয্যো ন ৱিজ্জতী’’তি.

৯. অৰঞ্ঞাযতনইসিসুত্তং

২৫৫. সাৱত্থিযং. ‘‘ভূতপুব্বং, ভিক্খৱে, সম্বহুলা ইসযো সীলৱন্তো কল্যাণধম্মা অৰঞ্ঞাযতনে পণ্ণকুটীসু সম্মন্তি. অথ খো, ভিক্খৱে, সক্কো চ দেৱানমিন্দো ৱেপচিত্তি চ অসুৰিন্দো যেন তে ইসযো সীলৱন্তো কল্যাণধম্মা তেনুপসঙ্কমিংসু. অথ খো, ভিক্খৱে, ৱেপচিত্তি অসুৰিন্দো পটলিযো [অটলিযো (সী. স্যা. কং. পী.), আটলিযো (ক.) ম. নি. ২.৪১০] উপাহনা আৰোহিত্ৱা খগ্গং ওলগ্গেত্ৱা ছত্তেন ধাৰিযমানেন অগ্গদ্ৱাৰেন অস্সমং পৱিসিত্ৱা তে ইসযো সীলৱন্তে কল্যাণধম্মে অপব্যামতো কৰিত্ৱা অতিক্কমি. অথ খো, ভিক্খৱে, সক্কো দেৱানমিন্দো পটলিযো উপাহনা ওৰোহিত্ৱা খগ্গং অঞ্ঞেসং দত্ৱা ছত্তং অপনামেত্ৱা দ্ৱাৰেনেৱ অস্সমং পৱিসিত্ৱা তে ইসযো সীলৱন্তে কল্যাণধম্মে অনুৱাতং পঞ্জলিকো নমস্সমানো অট্ঠাসি’’. অথ খো, ভিক্খৱে, তে ইসযো সীলৱন্তো কল্যাণধম্মা সক্কং দেৱানমিন্দং গাথায অজ্ঝভাসিংসু –

‘‘গন্ধো ইসীনং চিৰদিক্খিতানং,

কাযা চুতো গচ্ছতি মালুতেন;

ইতো পটিক্কম্ম সহস্সনেত্ত,

গন্ধো ইসীনং অসুচি দেৱৰাজা’’তি.

‘‘গন্ধো ইসীনং চিৰদিক্খিতানং,

কাযা চুতো গচ্ছতু [গচ্ছতি (সী. স্যা. কং.)] মালুতেন,

সুচিত্ৰপুপ্ফং সিৰস্মিংৱ মালং;

গন্ধং এতং পটিকঙ্খাম ভন্তে,

ন হেত্থ দেৱা পটিকূলসঞ্ঞিনো’’তি.

১০. সমুদ্দকসুত্তং

২৫৬. সাৱত্থিযং. ‘‘ভূতপুব্বং, ভিক্খৱে, সম্বহুলা ইসযো সীলৱন্তো কল্যাণধম্মা সমুদ্দতীৰে পণ্ণকুটীসু সম্মন্তি. তেন খো পন সমযেন দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, তেসং ইসীনং সীলৱন্তানং কল্যাণধম্মানং এতদহোসি – ‘ধম্মিকা খো দেৱা, অধম্মিকা অসুৰা. সিযাপি নো অসুৰতো ভযং. যংনূন মযং সম্বৰং অসুৰিন্দং উপসঙ্কমিত্ৱা অভযদক্খিণং যাচেয্যামা’’’তি. ‘‘অথ খো, ভিক্খৱে, তে ইসযো সীলৱন্তো কল্যাণধম্মা – সেয্যথাপি নাম বলৱা পুৰিসো সমিঞ্জিতং ৱা বাহং পসাৰেয্য, পসাৰিতং ৱা বাহং সমিঞ্জেয্য এৱমেৱ – সমুদ্দতীৰে পণ্ণকুটীসু অন্তৰহিতা সম্বৰস্স অসুৰিন্দস্স সম্মুখে পাতুৰহেসুং. অথ খো, ভিক্খৱে, তে ইসযো সীলৱন্তো কল্যাণধম্মা সম্বৰং অসুৰিন্দং গাথায অজ্ঝভাসিংসু –

‘‘ইসযো সম্বৰং পত্তা, যাচন্তি অভযদক্খিণং;

কামংকৰো হি তে দাতুং, ভযস্স অভযস্স ৱা’’তি.

‘‘ইসীনং অভযং নত্থি, দুট্ঠানং সক্কসেৱিনং;

অভযং যাচমানানং, ভযমেৱ দদামি ৱো’’তি.

‘‘অভযং যাচমানানং, ভযমেৱ দদাসি নো;

পটিগ্গণ্হাম তে এতং, অক্খযং হোতু তে ভযং.

‘‘যাদিসং ৱপতে বীজং, তাদিসং হৰতে ফলং;