৪. ৱেপচিত্তিসুত্তং

২৫০. সাৱত্থিনিদানং. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, ৱেপচিত্তি অসুৰিন্দো অসুৰে আমন্তেসি – ‘সচে, মাৰিসা, দেৱানং অসুৰসঙ্গামে সমুপব্যূড়্হে অসুৰা জিনেয্যুং দেৱা পৰাজিনেয্যুং [পৰাজেয্যুং (সী. পী.)], যেন নং সক্কং দেৱানমিন্দং কণ্ঠপঞ্চমেহি বন্ধনেহি বন্ধিত্ৱা মম সন্তিকে আনেয্যাথ অসুৰপুৰ’ন্তি. সক্কোপি খো, ভিক্খৱে, দেৱানমিন্দো দেৱে তাৱতিংসে আমন্তেসি – ‘সচে, মাৰিসা, দেৱানং অসুৰসঙ্গামে সমুপব্যূড়্হে দেৱা জিনেয্যুং অসুৰা পৰাজিনেয্যুং, যেন নং ৱেপচিত্তিং অসুৰিন্দং কণ্ঠপঞ্চমেহি বন্ধনেহি বন্ধিত্ৱা মম সন্তিকে আনেয্যাথ সুধম্মসভ’’’ন্তি. তস্মিং খো পন, ভিক্খৱে, সঙ্গামে দেৱা জিনিংসু, অসুৰা পৰাজিনিংসু [পৰাজিংসু (সী. পী.)]. অথ খো, ভিক্খৱে, দেৱা তাৱতিংসা ৱেপচিত্তিং অসুৰিন্দং কণ্ঠপঞ্চমেহি বন্ধনেহি বন্ধিত্ৱা সক্কস্স দেৱানমিন্দস্স সন্তিকে আনেসুং সুধম্মসভং. তত্ৰ সুদং, ভিক্খৱে, ৱেপচিত্তি অসুৰিন্দো কণ্ঠপঞ্চমেহি বন্ধনেহি বদ্ধো সক্কং দেৱানমিন্দং সুধম্মসভং পৱিসন্তঞ্চ নিক্খমন্তঞ্চ অসব্ভাহি ফৰুসাহি ৱাচাহি অক্কোসতি পৰিভাসতি. অথ খো, ভিক্খৱে, মাতলি সঙ্গাহকো সক্কং দেৱানমিন্দং গাথাহি অজ্ঝভাসি –

‘‘ভযা নু মঘৱা সক্ক, দুব্বল্যা নো তিতিক্খসি;

সুণন্তো ফৰুসং ৱাচং, সম্মুখা ৱেপচিত্তিনো’’তি.

‘‘নাহং ভযা ন দুব্বল্যা, খমামি ৱেপচিত্তিনো;

কথঞ্হি মাদিসো ৱিঞ্ঞূ, বালেন পটিসংযুজে’’তি.

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীৰো বালং নিসেধযে’’তি.

‘‘এতদেৱ অহং মঞ্ঞে, বালস্স পটিসেধনং;

পৰং সঙ্কুপিতং ঞত্ৱা, যো সতো উপসম্মতী’’তি.

‘‘এতদেৱ তিতিক্খায, ৱজ্জং পস্সামি ৱাসৱ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝাৰুহতি দুম্মেধো, গোৱ ভিয্যো পলাযিন’’ন্তি.

‘‘কামং মঞ্ঞতু ৱা মা ৱা, ভযা ম্যাযং তিতিক্খতি;

সদত্থপৰমা অত্থা, খন্ত্যা ভিয্যো ন ৱিজ্জতি.

‘‘যো হৱে বলৱা সন্তো, দুব্বলস্স তিতিক্খতি;

তমাহু পৰমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৱত্তা ন ৱিজ্জতি.

‘‘তস্সেৱ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চৰতি, অত্তনো চ পৰস্স চ;

পৰং সঙ্কুপিতং ঞত্ৱা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পৰস্স চ;

জনা মঞ্ঞন্তি বালোতি, যে ধম্মস্স অকোৱিদা’’তি.

‘‘সো হি নাম, ভিক্খৱে, সক্কো দেৱানমিন্দো সকং পুঞ্ঞফলং উপজীৱমানো দেৱানং তাৱতিংসানং ইস্সৰিযাধিপচ্চং ৰজ্জং কাৰেন্তো খন্তিসোৰচ্চস্স ৱণ্ণৱাদী ভৱিস্সতি. ইধ খো তং, ভিক্খৱে, সোভেথ যং তুম্হে এৱং স্ৱাক্খাতে ধম্মৱিনযে পব্বজিতা সমানা খমা চ ভৱেয্যাথ সোৰতা চা’’তি.