৫. সুভাসিতজযসুত্তং

২৫১. সাৱত্থিনিদানং. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, ৱেপচিত্তি অসুৰিন্দো সক্কং দেৱানমিন্দং এতদৱোচ – ‘হোতু, দেৱানমিন্দ, সুভাসিতেন জযো’তি. ‘হোতু, ৱেপচিত্তি, সুভাসিতেন জযো’তি. অথ খো, ভিক্খৱে, দেৱা চ অসুৰা চ পাৰিসজ্জে ঠপেসুং – ‘ইমে নো সুভাসিতদুব্ভাসিতং আজানিস্সন্তী’তি. অথ খো, ভিক্খৱে, ৱেপচিত্তিং অসুৰিন্দো সক্কং দেৱানমিন্দং এতদৱোচ – ‘ভণ, দেৱানমিন্দ, গাথ’ন্তি. এৱং ৱুত্তে, ভিক্খৱে, সক্কো দেৱানমিন্দো ৱেপচিত্তি অসুৰিন্দং এতদৱোচ – ‘তুম্হে খ্ৱেত্থ, ৱেপচিত্তি, পুব্বদেৱা. ভণ, ৱেপচিত্তি, গাথ’ন্তি. এৱং ৱুত্তে, ভিক্খৱে, ৱেপচিত্তি অসুৰিন্দো ইমং গাথং অভাসি –

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীৰো বালং নিসেধযে’’তি.

‘‘ভাসিতায খো পন, ভিক্খৱে, ৱেপচিত্তিনা অসুৰিন্দেন গাথায অসুৰা অনুমোদিংসু, দেৱা তুণ্হী অহেসুং. অথ খো, ভিক্খৱে, ৱেপচিত্তি অসুৰিন্দো সক্কং দেৱানমিন্দং এতদৱোচ – ‘ভণ, দেৱানমিন্দ, গাথ’ন্তি. এৱং ৱুত্তে, ভিক্খৱে, সক্কো দেৱানমিন্দো ইমং গাথং অভাসি –

‘‘এতদেৱ অহং মঞ্ঞে, বালস্স পটিসেধনং;

পৰং সঙ্কুপিতং ঞত্ৱা, যো সতো উপসম্মতী’’তি.

‘‘ভাসিতায খো পন, ভিক্খৱে, সক্কেন দেৱানমিন্দেন গাথায, দেৱা অনুমোদিংসু, অসুৰা তুণ্হী অহেসুং. অথ খো, ভিক্খৱে, সক্কো দেৱানমিন্দো ৱেপচিত্তিং অসুৰিন্দং এতদৱোচ – ‘ভণ, ৱেপচিত্তি, গাথ’ন্তি. এৱং ৱুত্তে, ভিক্খৱে, ৱেপচিত্তি অসুৰিন্দো ইমং গাথং অভাসি –

‘‘এতদেৱ তিতিক্খায, ৱজ্জং পস্সামি ৱাসৱ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝাৰুহতি দুম্মেধো, গোৱ ভিয্যো পলাযিন’’ন্তি.

‘‘ভাসিতায খো পন, ভিক্খৱে, ৱেপচিত্তিনা অসুৰিন্দেন গাথায অসুৰা অনুমোদিংসু, দেৱা তুণ্হী অহেসুং. অথ খো, ভিক্খৱে, ৱেপচিত্তি অসুৰিন্দো সক্কং দেৱানমিন্দং এতদৱোচ – ‘ভণ, দেৱানমিন্দ, গাথ’ন্তি. এৱং ৱুত্তে, ভিক্খৱে, সক্কো দেৱানমিন্দো ইমা গাথাযো অভাসি –

‘‘কামং মঞ্ঞতু ৱা মা ৱা, ভযা ম্যাযং তিতিক্খতি;

সদত্থপৰমা অত্থা, খন্ত্যা ভিয্যো ন ৱিজ্জতি.

‘‘যো হৱে বলৱা সন্তো, দুব্বলস্স তিতিক্খতি;

তমাহু পৰমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৱত্তা ন ৱিজ্জতি.

‘‘তস্সেৱ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চৰতি, অত্তনো চ পৰস্স চ;

পৰং সঙ্কুপিতং ঞত্ৱা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পৰস্স চ;

জনা মঞ্ঞন্তি বালোতি, যে ধম্মস্স অকোৱিদা’’তি.

‘‘ভাসিতাসু খো পন, ভিক্খৱে, সক্কেন দেৱানমিন্দেন গাথাসু, দেৱা অনুমোদিংসু, অসুৰা তুণ্হী অহেসুং. অথ খো, ভিক্খৱে, দেৱানঞ্চ অসুৰানঞ্চ পাৰিসজ্জা এতদৱোচুং – ‘ভাসিতা খো ৱেপচিত্তিনা অসুৰিন্দেন গাথাযো. তা চ খো সদণ্ডাৱচৰা সসত্থাৱচৰা, ইতি ভণ্ডনং ইতি ৱিগ্গহো ইতি কলহো. ভাসিতা খো [ভাসিতা খো পন (সী.)] সক্কেন দেৱানমিন্দেন গাথাযো. তা চ খো অদণ্ডাৱচৰা অসত্থাৱচৰা, ইতি অভণ্ডনং ইতি অৱিগ্গহো ইতি অকলহো. সক্কস্স দেৱানমিন্দস্স সুভাসিতেন জযো’তি. ইতি খো, ভিক্খৱে সক্কস্স দেৱানমিন্দস্স সুভাসিতেন জযো অহোসী’’তি.