৩. ধজগ্গসুত্তং

২৪৯. সাৱত্থিযং. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. অথ খো, ভিক্খৱে, সক্কো দেৱানমিন্দো দেৱে তাৱতিংসে আমন্তেসি –

‘সচে, মাৰিসা, দেৱানং সঙ্গামগতানং উপ্পজ্জেয্য ভযং ৱা ছম্ভিতত্তং ৱা লোমহংসো ৱা, মমেৱ তস্মিং সমযে ধজগ্গং উল্লোকেয্যাথ. মমঞ্হি ৱো ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে মে ধজগ্গং উল্লোকেয্যাথ, অথ পজাপতিস্স দেৱৰাজস্স ধজগ্গং উল্লোকেয্যাথ. পজাপতিস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে পজাপতিস্স দেৱৰাজস্স ধজগ্গং উল্লোকেয্যাথ, অথ ৱৰুণস্স দেৱৰাজস্স ধজগ্গং উল্লোকেয্যাথ. ৱৰুণস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি’.

‘নো চে ৱৰুণস্স দেৱৰাজস্স ধজগ্গং উল্লোকেয্যাথ, অথ ঈসানস্স দেৱৰাজস্স ধজগ্গং উল্লোকেয্যাথ. ঈসানস্স হি ৱো দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতী’’’তি.

‘‘তং খো পন, ভিক্খৱে, সক্কস্স ৱা দেৱানমিন্দস্স ধজগ্গং উল্লোকযতং, পজাপতিস্স ৱা দেৱৰাজস্স ধজগ্গং উল্লোকযতং, ৱৰুণস্স ৱা দেৱৰাজস্স ধজগ্গং উল্লোকযতং, ঈসানস্স ৱা দেৱৰাজস্স ধজগ্গং উল্লোকযতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযেথাপি নোপি পহীযেথ [নো পহীযেথ (ক.)].

‘‘তং কিস্স হেতু? সক্কো হি, ভিক্খৱে, দেৱানমিন্দো অৱীতৰাগো অৱীতদোসো অৱীতমোহো ভীৰু ছম্ভী উত্ৰাসী পলাযীতি.

‘‘অহঞ্চ খো, ভিক্খৱে, এৱং ৱদামি – ‘সচে তুম্হাকং, ভিক্খৱে, অৰঞ্ঞগতানং ৱা ৰুক্খমূলগতানং ৱা সুঞ্ঞাগাৰগতানং ৱা উপ্পজ্জেয্য ভযং ৱা ছম্ভিতত্তং ৱা লোমহংসো ৱা, মমেৱ তস্মিং সমযে অনুস্সৰেয্যাথ – ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. মমঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘নো চে মং অনুস্সৰেয্যাথ, অথ ধম্মং অনুস্সৰেয্যাথ – ‘স্ৱাক্খাতো ভগৱতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’তি. ধম্মঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘নো চে ধম্মং অনুস্সৰেয্যাথ, অথ সঙ্ঘং অনুস্সৰেয্যাথ – ‘সুপ্পটিপন্নো ভগৱতো সাৱকসঙ্ঘো উজুপ্পটিপন্নো ভগৱতো সাৱকসঙ্ঘো ঞাযপ্পটিপন্নো ভগৱতো সাৱকসঙ্ঘো সামীচিপ্পটিপন্নো ভগৱতো সাৱকসঙ্ঘো, যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো, আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্সা’তি. সঙ্ঘঞ্হি ৱো, ভিক্খৱে, অনুস্সৰতং যং ভৱিস্সতি ভযং ৱা ছম্ভিতত্তং ৱা লোমহংসো ৱা, সো পহীযিস্সতি.

‘‘তং কিস্স হেতু? তথাগতো হি, ভিক্খৱে, অৰহং সম্মাসম্বুদ্ধো ৱীতৰাগো ৱীতদোসো ৱীতমোহো অভীৰু অচ্ছম্ভী অনুত্ৰাসী অপলাযী’’তি. ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘অৰঞ্ঞে ৰুক্খমূলে ৱা, সুঞ্ঞাগাৰেৱ ভিক্খৱো;

অনুস্সৰেথ [অনুস্সৰেয্যাথ (ক.) পদসিদ্ধি পন চিন্তেতব্বা] সম্বুদ্ধং, ভযং তুম্হাক নো সিযা.

‘‘নো চে বুদ্ধং সৰেয্যাথ, লোকজেট্ঠং নৰাসভং;

অথ ধম্মং সৰেয্যাথ, নিয্যানিকং সুদেসিতং.

‘‘নো চে ধম্মং সৰেয্যাথ, নিয্যানিকং সুদেসিতং;

অথ সঙ্ঘং সৰেয্যাথ, পুঞ্ঞক্খেত্তং অনুত্তৰং.

‘‘এৱং বুদ্ধং সৰন্তানং, ধম্মং সঙ্ঘঞ্চ ভিক্খৱো;

ভযং ৱা ছম্ভিতত্তং ৱা, লোমহংসো ন হেস্সতী’’তি.