৫. উজ্ঝানসঞ্ঞিসুত্তং

৩৫. একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো সম্বহুলা উজ্ঝানসঞ্ঞিকা দেৱতাযো অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেন ভগৱা তেনুপসঙ্কমিংসু; উপসঙ্কমিত্ৱা ৱেহাসং অট্ঠংসু. ৱেহাসং ঠিতা খো একা দেৱতা ভগৱতো সন্তিকে ইমং গাথং অভাসি –

‘‘অঞ্ঞথা সন্তমত্তানং, অঞ্ঞথা যো পৱেদযে;

নিকচ্চ কিতৱস্সেৱ, ভুত্তং থেয্যেন তস্স তং.

‘‘যঞ্হি কযিৰা তঞ্হি ৱদে, যং ন কযিৰা ন তং ৱদে;

অকৰোন্তং ভাসমানানং, পৰিজানন্তি পণ্ডিতা’’তি.

‘‘ন যিদং ভাসিতমত্তেন, একন্তসৱনেন ৱা;

অনুক্কমিতৱে সক্কা, যাযং পটিপদা দড়্হা;

যায ধীৰা পমুচ্চন্তি, ঝাযিনো মাৰবন্ধনা.

‘‘ন ৱে ধীৰা পকুব্বন্তি, ৱিদিত্ৱা লোকপৰিযাযং;

অঞ্ঞায নিব্বুতা ধীৰা, তিণ্ণা লোকে ৱিসত্তিক’’ন্তি.

অথ খো তা দেৱতাযো পথৱিযং পতিট্ঠহিত্ৱা ভগৱতো পাদেসু সিৰসা নিপতিত্ৱা ভগৱন্তং এতদৱোচুং – ‘‘অচ্চযো নো, ভন্তে, অচ্চগমা যথাবালং যথামূড়্হং যথাঅকুসলং [যথাবালা যথামূড়্হা যথাঅকুসলা (সব্বত্থ)], যা মযং ভগৱন্তং আসাদেতব্বং অমঞ্ঞিম্হা. তাসং নো, ভন্তে, ভগৱা অচ্চযং অচ্চযতো পটিগ্গণ্হাতু আযতিং সংৱৰাযা’’তি. অথ খো ভগৱা সিতং পাত্ৱাকাসি. অথ খো তা দেৱতাযো ভিয্যোসোমত্তায উজ্ঝাযন্তিযো ৱেহাসং অব্ভুগ্গঞ্ছুং. একা দেৱতা ভগৱতো সন্তিকে ইমং গাথং অভাসি –

‘‘অচ্চযং দেসযন্তীনং, যো চে ন পটিগণ্হতি;

কোপন্তৰো দোসগৰু, স ৱেৰং পটিমুঞ্চতী’’তি.

‘‘অচ্চযো চে ন ৱিজ্জেথ, নোচিধাপগতং [নোচীধ অপহতং (স্যা. কং.), নোচিধাপকতং (?)] সিযা;

ৱেৰানি ন চ সম্মেয্যুং, কেনীধ [ৱেৰানি চ সম্মেয্যুং, তেনিধ (সী.)] কুসলো সিযা’’তি.

‘‘কস্সচ্চযা ন ৱিজ্জন্তি, কস্স নত্থি অপাগতং;

কো ন সম্মোহমাপাদি, কো চ ধীৰো [কোধ ধীৰো (স্যা. কং.)] সদা সতো’’তি.

‘‘তথাগতস্স বুদ্ধস্স, সব্বভূতানুকম্পিনো;

তস্সচ্চযা ন ৱিজ্জন্তি, তস্স নত্থি অপাগতং;

সো ন সম্মোহমাপাদি, সোৱ [সোধ (স্যা. কং.)] ধীৰো সদা সতো’’তি.

‘‘অচ্চযং দেসযন্তীনং, যো চে ন পটিগণ্হতি;

কোপন্তৰো দোসগৰু, স ৱেৰং পটিমুঞ্চতি;

তং ৱেৰং নাভিনন্দামি, পটিগ্গণ্হামি ৱোচ্চয’’ন্তি.