৩. সত্তিৱগ্গো

১. সত্তিসুত্তং

২১. সাৱত্থিনিদানং. একমন্তং ঠিতা খো সা দেৱতা ভগৱতো সন্তিকে ইমং গাথং অভাসি –

‘‘সত্তিযা ৱিয ওমট্ঠো, ডয্হমানোৱ [ডয্হমানেৱ (সব্বত্থ)] মত্থকে;

কামৰাগপ্পহানায, সতো ভিক্খু পৰিব্বজে’’তি.

‘‘সত্তিযা ৱিয ওমট্ঠো, ডয্হমানোৱ মত্থকে;

সক্কাযদিট্ঠিপ্পহানায, সতো ভিক্খু পৰিব্বজে’’তি.

২. ফুসতিসুত্তং

২২. ‘‘নাফুসন্তং ফুসতি চ, ফুসন্তঞ্চ ততো ফুসে;

তস্মা ফুসন্তং ফুসতি, অপ্পদুট্ঠপদোসিন’’ন্তি.

‘‘যো অপ্পদুট্ঠস্স নৰস্স দুস্সতি,

সুদ্ধস্স পোসস্স অনঙ্গণস্স;

তমেৱ বালং পচ্চেতি পাপং,

সুখুমো ৰজো পটিৱাতংৱ খিত্তো’’তি.

৩. জটাসুত্তং

২৩. ‘‘অন্তো জটা বহি জটা, জটায জটিতা পজা;

তং তং গোতম পুচ্ছামি, কো ইমং ৱিজটযে জট’’ন্তি.

‘‘সীলে পতিট্ঠায নৰো সপঞ্ঞো, চিত্তং পঞ্ঞঞ্চ ভাৱযং;

আতাপী নিপকো ভিক্খু, সো ইমং ৱিজটযে জটং.

‘‘যেসং ৰাগো চ দোসো চ, অৱিজ্জা চ ৱিৰাজিতা;

খীণাসৱা অৰহন্তো, তেসং ৱিজটিতা জটা.

‘‘যত্থ নামঞ্চ ৰূপঞ্চ, অসেসং উপৰুজ্ঝতি;

পটিঘং ৰূপসঞ্ঞা চ, এত্থেসা ছিজ্জতে [ৱিজটে (ক.)] জটা’’তি.

৪. মনোনিৱাৰণসুত্তং

২৪. ‘‘যতো যতো মনো নিৱাৰযে,

ন দুক্খমেতি নং ততো ততো;

স সব্বতো মনো নিৱাৰযে,

স সব্বতো দুক্খা পমুচ্চতি’’.

‘‘ন সব্বতো মনো নিৱাৰযে,

ন মনো সংযতত্তমাগতং;

যতো যতো চ পাপকং,

ততো ততো মনো নিৱাৰযে’’তি.

৫. অৰহন্তসুত্তং

২৫. ‘‘যো হোতি ভিক্খু অৰহং কতাৱী,

খীণাসৱো অন্তিমদেহধাৰী;

অহং ৱদামীতিপি সো ৱদেয্য,

মমং ৱদন্তীতিপি সো ৱদেয্যা’’তি.

‘‘যো হোতি ভিক্খু অৰহং কতাৱী,

খীণাসৱো অন্তিমদেহধাৰী;

অহং ৱদামীতিপি সো ৱদেয্য,

মমং ৱদন্তীতিপি সো ৱদেয্য;

লোকে সমঞ্ঞং কুসলো ৱিদিত্ৱা,

ৱোহাৰমত্তেন সো [স (?)] ৱোহৰেয্যা’’তি.

‘‘যো হোতি ভিক্খু অৰহং কতাৱী,

খীণাসৱো অন্তিমদেহধাৰী;

মানং নু খো সো উপগম্ম ভিক্খু,

অহং ৱদামীতিপি সো ৱদেয্য;

মমং ৱদন্তীতিপি সো ৱদেয্যা’’তি.

‘‘পহীনমানস্স ন সন্তি গন্থা,

ৱিধূপিতা মানগন্থস্স সব্বে;

স ৱীতিৱত্তো মঞ্ঞতং [মাননং (সী.), মঞ্ঞীতং (?)] সুমেধো,

অহং ৱদামীতিপি সো ৱদেয্য.

‘‘মমং ৱদন্তীতিপি সো ৱদেয্য;

লোকে সমঞ্ঞং কুসলো ৱিদিত্ৱা;

ৱোহাৰমত্তেন সো ৱোহৰেয্যা’’তি.

৬. পজ্জোতসুত্তং

২৬. ‘‘কতি লোকস্মিং পজ্জোতা, যেহি লোকো পকাসতি [পভাসতি (ক. সী.)];

ভগৱন্তং [ভৱন্তং (ক.)] পুট্ঠুমাগম্ম, কথং জানেমু তং ময’’ন্তি.

‘‘চত্তাৰো লোকে পজ্জোতা, পঞ্চমেত্থ ন ৱিজ্জতি;

দিৱা তপতি আদিচ্চো, ৰত্তিমাভাতি চন্দিমা.

‘‘অথ অগ্গি দিৱাৰত্তিং, তত্থ তত্থ পকাসতি;

সম্বুদ্ধো তপতং সেট্ঠো, এসা আভা অনুত্তৰা’’তি.

৭. সৰসুত্তং

২৭. ‘‘কুতো সৰা নিৱত্তন্তি, কত্থ ৱট্টং ন ৱত্ততি;

কত্থ নামঞ্চ ৰূপঞ্চ, অসেসং উপৰুজ্ঝতী’’তি.

‘‘যত্থ আপো চ পথৱী, তেজো ৱাযো ন গাধতি;

অতো সৰা নিৱত্তন্তি, এত্থ ৱট্টং ন ৱত্ততি;

এত্থ নামঞ্চ ৰূপঞ্চ, অসেসং উপৰুজ্ঝতী’’তি.

৮. মহদ্ধনসুত্তং

২৮. ‘‘মহদ্ধনা মহাভোগা, ৰট্ঠৱন্তোপি খত্তিযা;

অঞ্ঞমঞ্ঞাভিগিজ্ঝন্তি, কামেসু অনলঙ্কতা.

‘‘তেসু উস্সুক্কজাতেসু, ভৱসোতানুসাৰিসু;

কেধ তণ্হং [ৰোধতণ্হং (স্যা. কং.), গেধতণ্হং (ক.)] পজহিংসু [পৱাহিংসু (স্যা. কং. ক.)], কে লোকস্মিং অনুস্সুকা’’তি.

‘‘হিত্ৱা অগাৰং পব্বজিতা, হিত্ৱা পুত্তং পসুং ৱিযং;

হিত্ৱা ৰাগঞ্চ দোসঞ্চ, অৱিজ্জঞ্চ ৱিৰাজিয;

খীণাসৱা অৰহন্তো, তে লোকস্মিং অনুস্সুকা’’তি.

৯. চতুচক্কসুত্তং

২৯. ‘‘চতুচক্কং নৱদ্ৱাৰং, পুণ্ণং লোভেন সংযুতং;

পঙ্কজাতং মহাৱীৰ, কথং যাত্ৰা ভৱিস্সতী’’তি.

‘‘ছেত্ৱা নদ্ধিং ৱৰত্তঞ্চ, ইচ্ছা লোভঞ্চ পাপকং;

সমূলং তণ্হমব্বুয্হ, এৱং যাত্ৰা ভৱিস্সতী’’তি.

১০. এণিজঙ্ঘসুত্তং

৩০. ‘‘এণিজঙ্ঘং কিসং ৱীৰং, অপ্পাহাৰং অলোলুপং;

সীহং ৱেকচৰং নাগং, কামেসু অনপেক্খিনং;

উপসঙ্কম্ম পুচ্ছাম, কথং দুক্খা পমুচ্চতী’’তি.

‘‘পঞ্চ কামগুণা লোকে, মনোছট্ঠা পৱেদিতা;

এত্থ ছন্দং ৱিৰাজেত্ৱা, এৱং দুক্খা পমুচ্চতী’’তি.

সত্তিৱগ্গো ততিযো.

তস্সুদ্দানং –

সত্তিযা ফুসতি চেৱ, জটা মনোনিৱাৰণা;

অৰহন্তেন পজ্জোতো, সৰা মহদ্ধনেন চ;

চতুচক্কেন নৱমং, এণিজঙ্ঘেন তে দসাতি.