৮. সমণমুণ্ডিকসুত্তং

২৬০. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন উগ্গাহমানো পৰিব্বাজকো সমণমুণ্ডিকাপুত্তো [সমণমণ্ডিকাপুত্তো (সী. পী.)] সমযপ্পৱাদকে তিন্দুকাচীৰে একসালকে মল্লিকায আৰামে পটিৱসতি মহতিযা পৰিব্বাজকপৰিসায সদ্ধিং পঞ্চমত্তেহি পৰিব্বাজকসতেহি. অথ খো পঞ্চকঙ্গো থপতি সাৱত্থিযা নিক্খমি দিৱা দিৱস্স ভগৱন্তং দস্সনায. অথ খো পঞ্চকঙ্গস্স থপতিস্স এতদহোসি – ‘‘অকালো খো তাৱ ভগৱন্তং দস্সনায; পটিসল্লীনো ভগৱা. মনোভাৱনিযানম্পি ভিক্খূনং অসমযো দস্সনায; পটিসল্লীনা মনোভাৱনিযা ভিক্খূ. যংনূনাহং যেন সমযপ্পৱাদকো তিন্দুকাচীৰো একসালকো মল্লিকায আৰামো যেন উগ্গাহমানো পৰিব্বাজকো সমণমুণ্ডিকাপুত্তো তেনুপসঙ্কমেয্য’’ন্তি. অথ খো পঞ্চকঙ্গো থপতি যেন সমযপ্পৱাদকো তিন্দুকাচীৰো একসালকো মল্লিকায আৰামো যেন উগ্গাহমানো পৰিব্বাজকো সমণমুণ্ডিকাপুত্তো তেনুপসঙ্কমি.

তেন খো পন সমযেন উগ্গাহমানো পৰিব্বাজকো সমণমুণ্ডিকাপুত্তো মহতিযা পৰিব্বাজকপৰিসায সদ্ধিং নিসিন্নো হোতি উন্নাদিনিযা উচ্চাসদ্দমহাসদ্দায অনেকৱিহিতং তিৰচ্ছানকথং কথেন্তিযা, সেয্যথিদং – ৰাজকথং চোৰকথং মহামত্তকথং সেনাকথং ভযকথং যুদ্ধকথং অন্নকথং পানকথং ৱত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগৰকথং জনপদকথং ইত্থিকথং সূৰকথং ৱিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৱাভৱকথং ইতি ৱা.

অদ্দসা খো উগ্গাহমানো পৰিব্বাজকো সমণমুণ্ডিকাপুত্তো পঞ্চকঙ্গং থপতিং দূৰতোৱ আগচ্ছন্তং. দিস্ৱান সকং পৰিসং সণ্ঠাপেসি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ; অযং সমণস্স গোতমস্স সাৱকো আগচ্ছতি পঞ্চকঙ্গো থপতি. যাৱতা খো পন সমণস্স গোতমস্স সাৱকা গিহী ওদাতৱসনা সাৱত্থিযং পটিৱসন্তি অযং তেসং অঞ্ঞতৰো পঞ্চকঙ্গো থপতি. অপ্পসদ্দকামা খো পন তে আযস্মন্তো অপ্পসদ্দৱিনীতা অপ্পসদ্দস্স ৱণ্ণৱাদিনো; অপ্পেৱ নাম অপ্পসদ্দং পৰিসং ৱিদিত্ৱা উপসঙ্কমিতব্বং মঞ্ঞেয্যা’’তি. অথ খো তে পৰিব্বাজকা তুণ্হী অহেসুং.

২৬১. অথ খো পঞ্চকঙ্গো থপতি যেন উগ্গাহমানো পৰিব্বাজকো সমণমুণ্ডিকাপুত্তো তেনুপসঙ্কমি; উপসঙ্কমিত্ৱা উগ্গাহমানেন পৰিব্বাজকেন সমণমুণ্ডিকাপুত্তেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নং খো পঞ্চকঙ্গং থপতিং উগ্গাহমানো পৰিব্বাজকো সমণমুণ্ডিকাপুত্তো এতদৱোচ – ‘‘চতূহি খো অহং, গহপতি, ধম্মেহি সমন্নাগতং পুৰিসপুগ্গলং পঞ্ঞপেমি সম্পন্নকুসলং পৰমকুসলং উত্তমপত্তিপত্তং সমণং অযোজ্ঝং. কতমেহি চতূহি? ইধ, গহপতি, ন কাযেন পাপকম্মং কৰোতি, ন পাপকং ৱাচং ভাসতি, ন পাপকং সঙ্কপ্পং সঙ্কপ্পেতি, ন পাপকং আজীৱং আজীৱতি – ইমেহি খো অহং, গহপতি, চতূহি ধম্মেহি সমন্নাগতং পুৰিসপুগ্গলং পঞ্ঞপেমি সম্পন্নকুসলং পৰমকুসলং উত্তমপত্তিপত্তং সমণং অযোজ্ঝ’’ন্তি.

অথ খো পঞ্চকঙ্গো থপতি উগ্গাহমানস্স পৰিব্বাজকস্স সমণমুণ্ডিকাপুত্তস্স ভাসিতং নেৱ অভিনন্দি নপ্পটিক্কোসি. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কামি – ‘‘ভগৱতো সন্তিকে এতস্স ভাসিতস্স অত্থং আজানিস্সামী’’তি. অথ খো পঞ্চকঙ্গো থপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো পঞ্চকঙ্গো থপতি যাৱতকো অহোসি উগ্গাহমানেন পৰিব্বাজকেন সমণমুণ্ডিকাপুত্তেন সদ্ধিং কথাসল্লাপো তং সব্বং ভগৱতো আৰোচেসি.

২৬২. এৱং ৱুত্তে, ভগৱা পঞ্চকঙ্গং থপতিং এতদৱোচ – ‘‘এৱং সন্তে খো, থপতি, দহৰো কুমাৰো মন্দো উত্তানসেয্যকো সম্পন্নকুসলো ভৱিস্সতি পৰমকুসলো উত্তমপত্তিপত্তো সমণো অযোজ্ঝো, যথা উগ্গাহমানস্স পৰিব্বাজকস্স সমণমুণ্ডিকাপুত্তস্স ৱচনং. দহৰস্স হি, থপতি, কুমাৰস্স মন্দস্স উত্তানসেয্যকস্স কাযোতিপি ন হোতি, কুতো পন কাযেন পাপকম্মং কৰিস্সতি, অঞ্ঞত্ৰ ফন্দিতমত্তা! দহৰস্স হি, থপতি, কুমাৰস্স মন্দস্স উত্তানসেয্যকস্স ৱাচাতিপি ন হোতি, কুতো পন পাপকং ৱাচং ভাসিস্সতি, অঞ্ঞত্ৰ ৰোদিতমত্তা! দহৰস্স হি, থপতি, কুমাৰস্স মন্দস্স উত্তানসেয্যকস্স সঙ্কপ্পোতিপি ন হোতি, কুতো পন পাপকং সঙ্কপ্পং সঙ্কপ্পিস্সতি, অঞ্ঞত্ৰ ৱিকূজিতমত্তা [ৱিকুজ্জিতমত্তা (সী. স্যা. কং. পী.)]! দহৰস্স হি, থপতি, কুমাৰস্স মন্দস্স উত্তানসেয্যকস্স আজীৱোতিপি ন হোতি, কুতো পন পাপকং আজীৱং আজীৱিস্সতি, অঞ্ঞত্ৰ মাতুথঞ্ঞা! এৱং সন্তে খো, থপতি, দহৰো কুমাৰো মন্দো উত্তানসেয্যকো সম্পন্নকুসলো ভৱিস্সতি পৰমকুসলো উত্তমপত্তিপত্তো সমণো অযোজ্ঝো, যথা উগ্গাহমানস্স পৰিব্বাজকস্স সমণমুণ্ডিকাপুত্তস্স ৱচনং.

২৬৩. ‘‘চতূহি খো অহং, থপতি, ধম্মেহি সমন্নাগতং পুৰিসপুগ্গলং পঞ্ঞপেমি ন চেৱ সম্পন্নকুসলং ন পৰমকুসলং ন উত্তমপত্তিপত্তং সমণং অযোজ্ঝং, অপি চিমং দহৰং কুমাৰং মন্দং উত্তানসেয্যকং সমধিগয্হ তিট্ঠতি. কতমেহি চতূহি? ইধ, থপতি, ন কাযেন পাপকম্মং কৰোতি, ন পাপকং ৱাচং ভাসতি, ন পাপকং সঙ্কপ্পং সঙ্কপ্পেতি, ন পাপকং আজীৱং আজীৱতি – ইমেহি খো অহং, থপতি, চতূহি ধম্মেহি সমন্নাগতং পুৰিসপুগ্গলং পঞ্ঞপেমি ন চেৱ সম্পন্নকুসলং ন পৰমকুসলং ন উত্তমপত্তিপত্তং সমণং অযোজ্ঝং, অপি চিমং দহৰং কুমাৰং মন্দং উত্তানসেয্যকং সমধিগয্হ তিট্ঠতি.

‘‘দসহি খো অহং, থপতি, ধম্মেহি সমন্নাগতং পুৰিসপুগ্গলং পঞ্ঞপেমি সম্পন্নকুসলং পৰমকুসলং উত্তমপত্তিপত্তং সমণং অযোজ্ঝং. ইমে অকুসলা সীলা; তমহং [কহং (সী.), তহং (পী.)], থপতি, ৱেদিতব্বন্তি ৱদামি. ইতোসমুট্ঠানা অকুসলা সীলা; তমহং, থপতি, ৱেদিতব্বন্তি ৱদামি. ইধ অকুসলা সীলা অপৰিসেসা নিৰুজ্ঝন্তি; তমহং, থপতি, ৱেদিতব্বন্তি ৱদামি. এৱং পটিপন্নো অকুসলানং সীলানং নিৰোধায পটিপন্নো হোতি; তমহং, থপতি, ৱেদিতব্বন্তি ৱদামি.

‘‘ইমে কুসলা সীলা; তমহং, থপতি, ৱেদিতব্বন্তি ৱদামি. ইতোসমুট্ঠানা কুসলা সীলা; তমহং, থপতি, ৱেদিতব্বন্তি ৱদামি. ইধ কুসলা সীলা অপৰিসেসা নিৰুজ্ঝন্তি; তমহং, থপতি, ৱেদিতব্বন্তি ৱদামি. এৱং পটিপন্নো কুসলানং সীলানং নিৰোধায পটিপন্নো হোতি; তমহং, থপতি, ৱেদিতব্বন্তি ৱদামি.

‘‘ইমে অকুসলা সঙ্কপ্পা; তমহং, থপতি, ৱেদিতব্বন্তি ৱদামি. ইতোসমুট্ঠানা অকুসলা সঙ্কপ্পা; তমহং, থপতি, ৱেদিতব্বন্তি ৱদামি. ইধ অকুসলা সঙ্কপ্পা অপৰিসেসা নিৰুজ্ঝন্তি; তমহং, থপতি, ৱেদিতব্বন্তি ৱদামি. এৱং পটিপন্নো অকুসলানং সঙ্কপ্পানং নিৰোধায পটিপন্নো হোতি; তমহং, থপতি, ৱেদিতব্বন্তি ৱদামি.

‘‘ইমে কুসলা সঙ্কপ্পা; তমহং, থপতি, ৱেদিতব্বন্তি ৱদামি. ইতোসমুট্ঠানা কুসলা সঙ্কপ্পা; তমহং, থপতি, ৱেদিতব্বন্তি ৱদামি. ইধ কুসলা সঙ্কপ্পা অপৰিসেসা নিৰুজ্ঝন্তি; তমহং, থপতি, ৱেদিতব্বন্তি ৱদামি. এৱং পটিপন্নো কুসলানং সঙ্কপ্পানং নিৰোধায পটিপন্নো হোতি; তমহং, থপতি, ৱেদিতব্বন্তি ৱদামি.

২৬৪. ‘‘কতমে চ, থপতি, অকুসলা সীলা? অকুসলং কাযকম্মং, অকুসলং ৱচীকম্মং, পাপকো আজীৱো – ইমে ৱুচ্চন্তি, থপতি, অকুসলা সীলা.

‘‘ইমে চ, থপতি, অকুসলা সীলা কিংসমুট্ঠানা? সমুট্ঠানম্পি নেসং ৱুত্তং. ‘চিত্তসমুট্ঠানা’তিস্স ৱচনীযং. কতমং চিত্তং? চিত্তম্পি হি বহুং অনেকৱিধং নানপ্পকাৰকং. যং চিত্তং সৰাগং সদোসং সমোহং, ইতোসমুট্ঠানা অকুসলা সীলা.

‘‘ইমে চ, থপতি, অকুসলা সীলা কুহিং অপৰিসেসা নিৰুজ্ঝন্তি? নিৰোধোপি নেসং ৱুত্তো. ইধ, থপতি, ভিক্খু কাযদুচ্চৰিতং পহায কাযসুচৰিতং ভাৱেতি, ৱচীদুচ্চৰিতং পহায ৱচীসুচৰিতং ভাৱেতি, মনোদুচ্চৰিতং পহায মনোসুচৰিতং ভাৱেতি, মিচ্ছাজীৱং পহায সম্মাজীৱেন জীৱিতং কপ্পেতি – এত্থেতে অকুসলা সীলা অপৰিসেসা নিৰুজ্ঝন্তি.

‘‘কথং পটিপন্নো, থপতি, অকুসলানং সীলানং নিৰোধায পটিপন্নো হোতি? ইধ, থপতি, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; অনুপ্পন্নানং কুসলানং ধম্মানং উপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. এৱং পটিপন্নো খো, থপতি, অকুসলানং সীলানং নিৰোধায পটিপন্নো হোতি.

২৬৫. ‘‘কতমে চ, থপতি, কুসলা সীলা? কুসলং কাযকম্মং, কুসলং ৱচীকম্মং, আজীৱপৰিসুদ্ধম্পি খো অহং, থপতি, সীলস্মিং ৱদামি. ইমে ৱুচ্চন্তি, থপতি, কুসলা সীলা.

‘‘ইমে চ, থপতি, কুসলা সীলা কিংসমুট্ঠানা? সমুট্ঠানম্পি নেসং ৱুত্তং. ‘চিত্তসমুট্ঠানা’তিস্স ৱচনীযং. কতমং চিত্তং? চিত্তম্পি হি বহুং অনেকৱিধং নানপ্পকাৰকং. যং চিত্তং ৱীতৰাগং ৱীতদোসং ৱীতমোহং, ইতোসমুট্ঠানা কুসলা সীলা.

‘‘ইমে চ, থপতি, কুসলা সীলা কুহিং অপৰিসেসা নিৰুজ্ঝন্তি? নিৰোধোপি নেসং ৱুত্তো. ইধ, থপতি, ভিক্খু সীলৱা হোতি নো চ সীলমযো, তঞ্চ চেতোৱিমুত্তিং পঞ্ঞাৱিমুত্তিং যথাভূতং পজানাতি; যত্থস্স তে কুসলা সীলা অপৰিসেসা নিৰুজ্ঝন্তি.

‘‘কথং পটিপন্নো চ, থপতি, কুসলানং সীলানং নিৰোধায পটিপন্নো হোতি? ইধ, থপতি, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায…পে… অনুপ্পন্নানং কুসলানং ধম্মানং উপ্পাদায…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. এৱং পটিপন্নো খো, থপতি, কুসলানং সীলানং নিৰোধায পটিপন্নো হোতি.

২৬৬. ‘‘কতমে চ, থপতি, অকুসলা সঙ্কপ্পা? কামসঙ্কপ্পো, ব্যাপাদসঙ্কপ্পো, ৱিহিংসাসঙ্কপ্পো – ইমে ৱুচ্চন্তি, থপতি, অকুসলা সঙ্কপ্পা.

‘‘ইমে চ, থপতি, অকুসলা সঙ্কপ্পা কিংসমুট্ঠানা? সমুট্ঠানম্পি নেসং ৱুত্তং. ‘সঞ্ঞাসমুট্ঠানা’তিস্স ৱচনীযং. কতমা সঞ্ঞা? সঞ্ঞাপি হি বহূ অনেকৱিধা নানপ্পকাৰকা. কামসঞ্ঞা, ব্যাপাদসঞ্ঞা, ৱিহিংসাসঞ্ঞা – ইতোসমুট্ঠানা অকুসলা সঙ্কপ্পা.

‘‘ইমে চ, থপতি, অকুসলা সঙ্কপ্পা কুহিং অপৰিসেসা নিৰুজ্ঝন্তি? নিৰোধোপি নেসং ৱুত্তো. ইধ, থপতি, ভিক্খু ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি; এত্থেতে অকুসলা সঙ্কপ্পা অপৰিসেসা নিৰুজ্ঝন্তি.

‘‘কথং পটিপন্নো চ, থপতি, অকুসলানং সঙ্কপ্পানং নিৰোধায পটিপন্নো হোতি? ইধ, থপতি, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায…পে… অনুপ্পন্নানং কুসলানং ধম্মানং উপ্পাদায…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. এৱং পটিপন্নো খো, থপতি, অকুসলানং সঙ্কপ্পানং নিৰোধায পটিপন্নো হোতি.

২৬৭. ‘‘কতমে চ, থপতি, কুসলা সঙ্কপ্পা? নেক্খম্মসঙ্কপ্পো, অব্যাপাদসঙ্কপ্পো, অৱিহিংসাসঙ্কপ্পো – ইমে ৱুচ্চন্তি, থপতি, কুসলা সঙ্কপ্পা.

‘‘ইমে চ, থপতি, কুসলা সঙ্কপ্পা কিংসমুট্ঠানা? সমুট্ঠানম্পি নেসং ৱুত্তং. ‘সঞ্ঞাসমুট্ঠানা’তিস্স ৱচনীযং. কতমা সঞ্ঞা? সঞ্ঞাপি হি বহূ অনেকৱিধা নানপ্পকাৰকা. নেক্খম্মসঞ্ঞা, অব্যাপাদসঞ্ঞা, অৱিহিংসাসঞ্ঞা – ইতোসমুট্ঠানা কুসলা সঙ্কপ্পা.

‘‘ইমে চ, থপতি, কুসলা সঙ্কপ্পা কুহিং অপৰিসেসা নিৰুজ্ঝন্তি? নিৰোধোপি নেসং ৱুত্তো. ইধ, থপতি, ভিক্খু ৱিতক্কৱিচাৰানং ৱূপসমা…পে… দুতিযং ঝানং উপসম্পজ্জ ৱিহৰতি; এত্থেতে কুসলা সঙ্কপ্পা অপৰিসেসা নিৰুজ্ঝন্তি.

‘‘কথং পটিপন্নো চ, থপতি, কুসলানং সঙ্কপ্পানং নিৰোধায পটিপন্নো হোতি? ইধ, থপতি, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায…পে… অনুপ্পন্নানং কুসলানং ধম্মানং উপ্পাদায…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. এৱং পটিপন্নো খো, থপতি, কুসলানং সঙ্কপ্পানং নিৰোধায পটিপন্নো হোতি.

২৬৮. ‘‘কতমেহি চাহং, থপতি, দসহি ধম্মেহি সমন্নাগতং পুৰিসপুগ্গলং পঞ্ঞপেমি সম্পন্নকুসলং পৰমকুসলং উত্তমপত্তিপত্তং সমণং অযোজ্ঝং? ইধ, থপতি, ভিক্খু অসেখায সম্মাদিট্ঠিযা সমন্নাগতো হোতি, অসেখেন সম্মাসঙ্কপ্পেন সমন্নাগতো হোতি, অসেখায সম্মাৱাচায সমন্নাগতো হোতি, অসেখেন সম্মাকম্মন্তেন সমন্নাগতো হোতি, অসেখেন সম্মাআজীৱেন সমন্নাগতো হোতি, অসেখেন সম্মাৱাযামেন সমন্নাগতো হোতি, অসেখায সম্মাসতিযা সমন্নাগতো হোতি, অসেখেন সম্মাসমাধিনা সমন্নাগতো হোতি, অসেখেন সম্মাঞাণেন সমন্নাগতো হোতি, অসেখায সম্মাৱিমুত্তিযা সমন্নাগতো হোতি – ইমেহি খো অহং, থপতি, দসহি ধম্মেহি সমন্নাগতং পুৰিসপুগ্গলং পঞ্ঞপেমি সম্পন্নকুসলং পৰমকুসলং উত্তমপত্তিপত্তং সমণং অযোজ্ঝ’’ন্তি.

ইদমৱোচ ভগৱা. অত্তমনো পঞ্চকঙ্গো থপতি ভগৱতো ভাসিতং অভিনন্দীতি.

সমণমুণ্ডিকসুত্তং নিট্ঠিতং অট্ঠমং.