৯. গোলিযানিসুত্তং

১৭৩. এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন গোলিযানি [গুলিস্সানি (সী. পী.), গোলিস্সানি (স্যা. কং.)] নাম ভিক্খু আৰঞ্ঞিকো [আৰঞ্ঞকো (সব্বত্থ)] পদসমাচাৰো [পদৰসমাচাৰো (সী. স্যা. কং. পী.)] সঙ্ঘমজ্ঝে ওসটো হোতি কেনচিদেৱ কৰণীযেন. তত্ৰ খো আযস্মা সাৰিপুত্তো গোলিযানিং ভিক্খুং আৰব্ভ ভিক্খূ আমন্তেসি –

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন সব্ৰহ্মচাৰীসু সগাৰৱেন ভৱিতব্বং সপ্পতিস্সেন. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো সব্ৰহ্মচাৰীসু অগাৰৱো হোতি অপ্পতিস্সো, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন, যো অযমাযস্মা সব্ৰহ্মচাৰীসু অগাৰৱো হোতি অপ্পতিস্সো’তি – তস্স [অপ্পতিস্সোতিস্স (সী. পী.)] ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন সব্ৰহ্মচাৰীসু সগাৰৱেন ভৱিতব্বং সপ্পতিস্সেন.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন আসনকুসলেন ভৱিতব্বং – ‘ইতি থেৰে চ ভিক্খূ নানুপখজ্জ নিসীদিস্সামি নৱে চ ভিক্খূ ন আসনেন পটিবাহিস্সামী’তি. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো ন আসনকুসলো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন, যো অযমাযস্মা আসনকুসলো ন হোতী’তি [যো অযমাযস্মা আভিসমাচাৰিকম্পি ধম্মং ন জানাতীতি (সী. স্যা. কং. পী.)] – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন আসনকুসলেন ভৱিতব্বং.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন আভিসমাচাৰিকোপি ধম্মো জানিতব্বো. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো আভিসমাচাৰিকম্পি ধম্মং ন জানাতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা আভিসমাচাৰিকম্পি ধম্মং ন জানাতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন আভিসমাচাৰিকোপি ধম্মো জানিতব্বো [অযং আভিসমাচাৰিকততিযৱাৰো সী. স্যা. কং. পী. পোত্থকেসু ন দিস্সতি].

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন নাতিকালেন গামো পৱিসিতব্বো নাতিদিৱা [ন দিৱা (স্যা. কং. পী. ক.)] পটিক্কমিতব্বং. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো অতিকালেন গামং পৱিসতি অতিদিৱা পটিক্কমতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা অতিকালেন গামং পৱিসতি অতিদিৱা পটিক্কমতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন নাতিকালেন গামো পৱিসিতব্বো, নাতিদিৱা পটিক্কমিতব্বং.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন ন পুৰেভত্তং পচ্ছাভত্তং কুলেসু চাৰিত্তং আপজ্জিতব্বং. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো পুৰেভত্তং পচ্ছাভত্তং কুলেসু চাৰিত্তং আপজ্জতি, তস্স ভৱন্তি ৱত্তাৰো. ‘অযং নূনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন ৱিহৰতো ৱিকালচৰিযা বহুলীকতা, তমেনং সঙ্ঘগতম্পি সমুদাচৰতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন ন পুৰেভত্তং পচ্ছাভত্তং কুলেসু চাৰিত্তং আপজ্জিতব্বং.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন অনুদ্ধতেন ভৱিতব্বং অচপলেন. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো উদ্ধতো হোতি চপলো, তস্স ভৱন্তি ৱত্তাৰো. ‘ইদং নূনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন ৱিহৰতো উদ্ধচ্চং চাপল্যং বহুলীকতং, তমেনং সঙ্ঘগতম্পি সমুদাচৰতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন অনুদ্ধতেন ভৱিতব্বং অচপলেন.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন অমুখৰেন ভৱিতব্বং অৱিকিণ্ণৱাচেন. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো মুখৰো হোতি ৱিকিণ্ণৱাচো, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা মুখৰো ৱিকিণ্ণৱাচো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন অমুখৰেন ভৱিতব্বং অৱিকিণ্ণৱাচেন.

‘‘আৰঞ্ঞিকেনাৱুসো, ভিক্খুনা সঙ্ঘগতেন সঙ্ঘে ৱিহৰন্তেন সুৱচেন [সুব্বচেন (সী. ক.)] ভৱিতব্বং কল্যাণমিত্তেন. সচে, আৱুসো, আৰঞ্ঞিকো ভিক্খু সঙ্ঘগতো সঙ্ঘে ৱিহৰন্তো দুব্বচো হোতি পাপমিত্তো, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা দুব্বচো পাপমিত্তো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সঙ্ঘগতেন সঙ্ঘে ৱিহৰন্তেন সুৱচেন ভৱিতব্বং কল্যাণমিত্তেন.

‘‘আৰঞ্ঞিকেনাৱুসো, ভিক্খুনা ইন্দ্ৰিযেসু গুত্তদ্ৱাৰেন ভৱিতব্বং. সচে, আৱুসো, আৰঞ্ঞিকো ভিক্খু ইন্দ্ৰিযেসু অগুত্তদ্ৱাৰো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা ইন্দ্ৰিযেসু অগুত্তদ্ৱাৰো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা ইন্দ্ৰিযেসু গুত্তদ্ৱাৰেন ভৱিতব্বং.

‘‘আৰঞ্ঞিকেনাৱুসো, ভিক্খুনা ভোজনে মত্তঞ্ঞুনা ভৱিতব্বং. সচে, আৱুসো, আৰঞ্ঞিকো ভোজনে অমত্তঞ্ঞূ হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা ভোজনে অমত্তঞ্ঞূ’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা ভোজনে মত্তঞ্ঞুনা ভৱিতব্বং.

‘‘আৰঞ্ঞিকেনাৱুসো, ভিক্খুনা জাগৰিযং অনুযুত্তেন ভৱিতব্বং. সচে, আৱুসো, আৰঞ্ঞিকো ভিক্খু জাগৰিযং অননুযুত্তো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা জাগৰিযং অননুযুত্তো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা জাগৰিযং অনুযুত্তেন ভৱিতব্বং.

‘‘আৰঞ্ঞিকেনাৱুসো, ভিক্খুনা আৰদ্ধৱীৰিযেন ভৱিতব্বং. সচে, আৱুসো, আৰঞ্ঞিকো ভিক্খু কুসীতো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা কুসীতো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা আৰদ্ধৱীৰিযেন ভৱিতব্বং.

‘‘আৰঞ্ঞিকেনাৱুসো, ভিক্খুনা উপট্ঠিতস্সতিনা ভৱিতব্বং. সচে, আৱুসো, আৰঞ্ঞিকো ভিক্খু মুট্ঠস্সতী হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা মুট্ঠস্সতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা উপট্ঠিতস্সতিনা ভৱিতব্বং.

‘‘আৰঞ্ঞিকেনাৱুসো, ভিক্খুনা সমাহিতেন ভৱিতব্বং. সচে, আৱুসো, আৰঞ্ঞিকো ভিক্খু অসমাহিতো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা অসমাহিতো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা সমাহিতেন ভৱিতব্বং.

‘‘আৰঞ্ঞিকেনাৱুসো, ভিক্খুনা পঞ্ঞৱতা ভৱিতব্বং. সচে, আৱুসো, আৰঞ্ঞিকো ভিক্খু দুপ্পঞ্ঞো হোতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা দুপ্পঞ্ঞো’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা পঞ্ঞৱতা ভৱিতব্বং.

‘‘আৰঞ্ঞিকেনাৱুসো, ভিক্খুনা অভিধম্মে অভিৱিনযে যোগো কৰণীযো. সন্তাৱুসো, আৰঞ্ঞিকং ভিক্খুং অভিধম্মে অভিৱিনযে পঞ্হং পুচ্ছিতাৰো. সচে, আৱুসো, আৰঞ্ঞিকো ভিক্খু অভিধম্মে অভিৱিনযে পঞ্হং পুট্ঠো ন সম্পাযতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা অভিধম্মে অভিৱিনযে পঞ্হং পুট্ঠো ন সম্পাযতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা অভিধম্মে অভিৱিনযে যোগো কৰণীযো.

‘‘আৰঞ্ঞিকেনাৱুসো, ভিক্খুনা যে তে সন্তা ৱিমোক্খা অতিক্কম্ম ৰূপে আৰুপ্পা তত্থ যোগো কৰণীযো. সন্তাৱুসো, আৰঞ্ঞিকং ভিক্খুং যে তে সন্তা ৱিমোক্খা অতিক্কম্ম ৰূপে আৰুপ্পা তত্থ পঞ্হং পুচ্ছিতাৰো. সচে, আৱুসো, আৰঞ্ঞিকো ভিক্খু যে তে সন্তা ৱিমোক্খা অতিক্কম্ম ৰূপে আৰুপ্পা তত্থ পঞ্হং পুট্ঠো ন সম্পাযতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা যে তে সন্তা ৱিমোক্খা অতিক্কম্ম ৰূপে আৰুপ্পা তত্থ পঞ্হং পুট্ঠো ন সম্পাযতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা যে তে সন্তা ৱিমোক্খা অতিক্কম্ম ৰূপে আৰুপ্পা তত্থ যোগো কৰণীযো.

‘‘আৰঞ্ঞিকেনাৱুসো, ভিক্খুনা উত্তৰি মনুস্সধম্মে যোগো কৰণীযো. সন্তাৱুসো, আৰঞ্ঞিকং ভিক্খুং উত্তৰি মনুস্সধম্মে পঞ্হং পুচ্ছিতাৰো. সচে, আৱুসো, আৰঞ্ঞিকো ভিক্খু উত্তৰি মনুস্সধম্মে পঞ্হং পুট্ঠো ন সম্পাযতি, তস্স ভৱন্তি ৱত্তাৰো. ‘কিং পনিমস্সাযস্মতো আৰঞ্ঞিকস্স একস্সাৰঞ্ঞে সেৰিৱিহাৰেন যো অযমাযস্মা যস্সত্থায পব্বজিতো তমত্থং ন জানাতী’তি – তস্স ভৱন্তি ৱত্তাৰো. তস্মা আৰঞ্ঞিকেন ভিক্খুনা উত্তৰি মনুস্সধম্মে যোগো কৰণীযো’’তি.

এৱং ৱুত্তে, আযস্মা মহামোগ্গল্লানো [মহামোগ্গলানো (ক.)] আযস্মন্তং সাৰিপুত্তং এতদৱোচ – ‘‘আৰঞ্ঞিকেনেৱ নু খো, আৱুসো সাৰিপুত্ত, ভিক্খুনা ইমে ধম্মা সমাদায ৱত্তিতব্বা উদাহু গামন্তৱিহাৰিনাপী’’তি? ‘‘আৰঞ্ঞিকেনাপি খো, আৱুসো মোগ্গল্লান, ভিক্খুনা ইমে ধম্মা সমাদায ৱত্তিতব্বা পগেৱ গামন্তৱিহাৰিনা’’তি.

গোলিযানিসুত্তং নিট্ঠিতং নৱমং.