৮. ৱিজযাথেৰীগাথা

১৬৯. ‘‘চতুক্খত্তুং পঞ্চক্খত্তুং, ৱিহাৰা উপনিক্খমিং;

অলদ্ধা চেতসো সন্তিং, চিত্তে অৱসৱত্তিনী.

১৭০. ‘‘ভিক্খুনিং উপসঙ্কম্ম, সক্কচ্চং পৰিপুচ্ছহং;

সা মে ধম্মমদেসেসি, ধাতুআযতনানি চ.

১৭১. ‘‘চত্তাৰি অৰিযসচ্চানি, ইন্দ্ৰিযানি বলানি চ;

বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা.

১৭২. ‘‘তস্সাহং ৱচনং সুত্ৱা, কৰোন্তী অনুসাসনিং;

ৰত্তিযা পুৰিমে যামে, পুব্বজাতিমনুস্সৰিং.

১৭৩. ‘‘ৰত্তিযা মজ্ঝিমে যামে, দিব্বচক্খুং ৱিসোধযিং;

ৰত্তিযা পচ্ছিমে যামে, তমোখন্ধং পদালযিং.

১৭৪. ‘‘পীতিসুখেন চ কাযং, ফৰিত্ৱা ৱিহৰিং তদা;

সত্তমিযা পাদে পসাৰেসিং, তমোখন্ধং পদালিযা’’তি.

… ৱিজযা থেৰী….

ছক্কনিপাতো নিট্ঠিতো.