৭. সত্তকনিপাতো

১. উত্তৰাথেৰীগাথা

১৭৫. ‘‘‘মুসলানি গহেত্ৱান, ধঞ্ঞং কোট্টেন্তি মাণৱা;

পুত্তদাৰানি পোসেন্তা, ধনং ৱিন্দন্তি মাণৱা.

১৭৬. ‘‘‘ঘটেথ বুদ্ধসাসনে, যং কত্ৱা নানুতপ্পতি;

খিপ্পং পাদানি ধোৱিত্ৱা, একমন্তং নিসীদথ.

১৭৭. ‘‘‘চিত্তং উপট্ঠপেত্ৱান, একগ্গং সুসমাহিতং;

পচ্চৱেক্খথ সঙ্খাৰে, পৰতো নো চ অত্ততো’.

১৭৮. ‘‘তস্সাহং ৱচনং সুত্ৱা, পটাচাৰানুসাসনিং;

পাদে পক্খালযিত্ৱান, একমন্তে উপাৱিসিং.

১৭৯. ‘‘ৰত্তিযা পুৰিমে যামে, পুব্বজাতিমনুস্সৰিং;

ৰত্তিযা মজ্ঝিমে যামে, দিব্বচক্খুং ৱিসোধযিং.

১৮০. ‘‘ৰত্তিযা পচ্ছিমে যামে, তমোক্খন্ধং পদালযিং;

তেৱিজ্জা অথ ৱুট্ঠাসিং, কতা তে অনুসাসনী.

১৮১. ‘‘সক্কংৱ দেৱা তিদসা, সঙ্গামে অপৰাজিতং;

পুৰক্খত্ৱা ৱিহস্সামি, তেৱিজ্জাম্হি অনাসৱা’’.

… উত্তৰা থেৰী….

২. চালাথেৰীগাথা

১৮২. ‘‘সতিং উপট্ঠপেত্ৱান, ভিক্খুনী ভাৱিতিন্দ্ৰিযা;

পটিৱিজ্ঝি পদং সন্তং, সঙ্খাৰূপসমং সুখং’’.

১৮৩. ‘‘কং নু উদ্দিস্স মুণ্ডাসি, সমণী ৱিয দিস্সসি;

ন চ ৰোচেসি পাসণ্ডে, কিমিদং চৰসি মোমুহা’’.

১৮৪. ‘‘ইতো বহিদ্ধা পাসণ্ডা, দিট্ঠিযো উপনিস্সিতা;

ন তে ধম্মং ৱিজানন্তি, ন তে ধম্মস্স কোৱিদা.

১৮৫. ‘‘অত্থি সক্যকুলে জাতো, বুদ্ধো অপ্পটিপুগ্গলো;

সো মে ধম্মমদেসেসি, দিট্ঠীনং সমতিক্কমং.

১৮৬. ‘‘দুক্খং দুক্খসমুপ্পাদং, দুক্খস্স চ অতিক্কমং;

অৰিযং চট্ঠঙ্গিকং মগ্গং, দুক্খূপসমগামিনং.

১৮৭. ‘‘তস্সাহং ৱচনং সুত্ৱা, ৱিহৰিং সাসনে ৰতা;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১৮৮. ‘‘সব্বত্থ ৱিহতা নন্দী, তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তক’’.

… চালা থেৰী….

৩. উপচালাথেৰীগাথা

১৮৯. ‘‘সতিমতী চক্খুমতী, ভিক্খুনী ভাৱিতিন্দ্ৰিযা;

পটিৱিজ্ঝিং পদং সন্তং, অকাপুৰিসসেৱিতং’’.

১৯০. ‘‘কিং নু জাতিং ন ৰোচেসি, জাতো কামানি ভুঞ্জতি;

ভুঞ্জাহি কামৰতিযো, মাহু পচ্ছানুতাপিনী’’.

১৯১. ‘‘জাতস্স মৰণং হোতি, হত্থপাদান ছেদনং;

ৱধবন্ধপৰিক্লেসং, জাতো দুক্খং নিগচ্ছতি.

১৯২. ‘‘অত্থি সক্যকুলে জাতো, সম্বুদ্ধো অপৰাজিতো;

সো মে ধম্মমদেসেসি, জাতিযা সমতিক্কমং.

১৯৩. ‘‘দুক্খং দুক্খসমুপ্পাদং, দুক্খস্স চ অতিক্কমং;

অৰিযং চট্ঠঙ্গিকং মগ্গং, দুক্খূপসমগামিনং.

১৯৪. ‘‘তস্সাহং ৱচনং সুত্ৱা, ৱিহৰিং সাসনে ৰতা;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১৯৫. ‘‘সব্বত্থ ৱিহতা নন্দী, তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তক’’.

… উপচালা থেৰী….

সত্তকনিপাতো নিট্ঠিতো.