নমো তস্স ভগৱতো অৰহতো সম্মাসম্বুদ্ধস্স

খুদ্দকনিকাযে

থেৰীগাথাপাড়ি

১. এককনিপাতো

১. অঞ্ঞতৰাথেৰীগাথা

১. ‘‘সুখং সুপাহি থেৰিকে, কত্ৱা চোড়েন পাৰুতা;

উপসন্তো হি তে ৰাগো, সুক্খডাকং ৱ কুম্ভিয’’ন্তি.

ইত্থং সুদং অঞ্ঞতৰা থেৰী অপঞ্ঞাতা ভিক্খুনী গাথং অভাসিত্থাতি.

২. মুত্তাথেৰীগাথা

২. ‘‘মুত্তে মুচ্চস্সু যোগেহি, চন্দো ৰাহুগ্গহা ইৱ;

ৱিপ্পমুত্তেন চিত্তেন, অনণা ভুঞ্জ পিণ্ডক’’ন্তি.

ইত্থং সুদং ভগৱা মুত্তং সিক্খমানং ইমায গাথায অভিণ্হং ওৱদতীতি.

৩. পুণ্ণাথেৰীগাথা

৩. ‘‘পুণ্ণে পূৰস্সু ধম্মেহি, চন্দো পন্নৰসেৰিৱ;

পৰিপুণ্ণায পঞ্ঞায, তমোখন্ধং [তমোক্খন্ধং (সী. স্যা.)] পদালযা’’তি.

ইত্থং সুদং পুণ্ণা থেৰী গাথং অভাসিত্থাতি.

৪. তিস্সাথেৰীগাথা

৪. ‘‘তিস্সে সিক্খস্সু সিক্খায, মা তং যোগা উপচ্চগুং;

সব্বযোগৱিসংযুত্তা, চৰ লোকে অনাসৱা’’তি.

… তিস্সা থেৰী….

৫. অঞ্ঞতৰাতিস্সাথেৰীগাথা

৫. ‘‘তিস্সে যুঞ্জস্সু ধম্মেহি, খণো তং মা উপচ্চগা;

খণাতীতা হি সোচন্তি, নিৰযম্হি সমপ্পিতা’’তি.

… অঞ্ঞতৰা তিস্সা থেৰী….

৬. ধীৰাথেৰীগাথা

৬. ‘‘ধীৰে নিৰোধং ফুসেহি [ফুস্সেহি (সী.)], সঞ্ঞাৱূপসমং সুখং;

আৰাধযাহি নিব্বানং, যোগক্খেমমনুত্তৰ’’ন্তি [যোগক্খেমং অনুত্তৰন্তি (সী. স্যা.)].

… ধীৰা থেৰী….

৭. ৱীৰাথেৰীগাথা

৭. ‘‘ৱীৰা ৱীৰেহি [ধীৰা ধীৰেহি (ক.)] ধম্মেহি, ভিক্খুনী ভাৱিতিন্দ্ৰিযা;

ধাৰেহি অন্তিমং দেহং, জেত্ৱা মাৰং সৱাহিনি’’ন্তি [সৱাহনন্তি (ক.)].

… ৱীৰা থেৰী….

৮. মিত্তাথেৰীগাথা

৮. ‘‘সদ্ধায পব্বজিত্ৱান, মিত্তে মিত্তৰতা ভৱ;

ভাৱেহি কুসলে ধম্মে, যোগক্খেমস্স পত্তিযা’’তি.

… মিত্তা থেৰী….

৯. ভদ্ৰাথেৰীগাথা

৯. ‘‘সদ্ধায পব্বজিত্ৱান, ভদ্ৰে ভদ্ৰৰতা ভৱ;

ভাৱেহি কুসলে ধম্মে, যোগক্খেমমনুত্তৰ’’ন্তি.

… ভদ্ৰা থেৰী….

১০. উপসমাথেৰীগাথা

১০. ‘‘উপসমে তৰে ওঘং, মচ্চুধেয্যং সুদুত্তৰং;

ধাৰেহি অন্তিমং দেহং, জেত্ৱা মাৰং সৱাহন’’ন্তি.

… উপসমা থেৰী….

১১. মুত্তাথেৰীগাথা

১১. ‘‘সুমুত্তা সাধুমুত্তাম্হি, তীহি খুজ্জেহি মুত্তিযা;

উদুক্খলেন মুসলেন, পতিনা খুজ্জকেন চ;

মুত্তাম্হি জাতিমৰণা, ভৱনেত্তি সমূহতা’’তি.

… মুত্তা থেৰী….

১২. ধম্মদিন্নাথেৰীগাথা

১২. ‘‘ছন্দজাতা অৱসাযী, মনসা চ ফুটা [ফুট্ঠা (স্যা.), ফুঠা (সী. অট্ঠ.)] সিযা;

কামেসু অপ্পটিবদ্ধচিত্তা [অপ্পটিবন্ধচিত্তা (ক.)], উদ্ধংসোতাতি ৱুচ্চতী’’তি [উদ্ধংসোতা ৱিমুচ্চতীতি (সী. পী.)].

… ধম্মদিন্না থেৰী….

১৩.ৱিসাখাথেৰীগাথা

১৩. ‘‘কৰোথ বুদ্ধসাসনং, যং কত্ৱা নানুতপ্পতি;

খিপ্পং পাদানি ধোৱিত্ৱা, একমন্তে নিসীদথা’’তি.

… ৱিসাখা থেৰী….

১৪.সুমনাথেৰীগাথা

১৪. ‘‘ধাতুযো দুক্খতো দিস্ৱা, মা জাতিং পুনৰাগমি;

ভৱে ছন্দং ৱিৰাজেত্ৱা, উপসন্তা চৰিস্সসী’’তি.

… সুমনা থেৰী….

১৫. উত্তৰাথেৰীগাথা

১৫. ‘‘কাযেন সংৱুতা আসিং, ৱাচায উদ চেতসা;

সমূলং তণ্হমব্বুয্হ, সীতিভূতাম্হি নিব্বুতা’’তি.

… উত্তৰা থেৰী….

১৬. ৱুড্ঢপব্বজিতসুমনাথেৰীগাথা

১৬. ‘‘সুখং ত্ৱং ৱুড্ঢিকে সেহি, কত্ৱা চোড়েন পাৰূতা;

উপসন্তো হি তে ৰাগো, সীতিভূতাসি নিব্বুতা’’তি.

… সুমনা ৱুড্ঢপব্বজিতা থেৰী….

১৭. ধম্মাথেৰীগাথা

১৭. ‘‘পিণ্ডপাতং চৰিত্ৱান, দণ্ডমোলুব্ভ দুব্বলা;

ৱেধমানেহি গত্তেহি, তত্থেৱ নিপতিং ছমা;

দিস্ৱা আদীনৱং কাযে, অথ চিত্তং ৱিমুচ্চি মে’’তি.

… ধম্মা থেৰী….

১৮. সঙ্ঘাথেৰীগাথা

১৮. ‘‘হিত্ৱা ঘৰে পব্বজিত্ৱা [পব্বজিতা (সী. অট্ঠ.)], হিত্ৱা পুত্তং পসুং পিযং;

হিত্ৱা ৰাগঞ্চ দোসঞ্চ, অৱিজ্জঞ্চ ৱিৰাজিয;

সমূলং তণ্হমব্বুয্হ, উপসন্তাম্হি নিব্বুতা’’তি.

… সঙ্ঘা থেৰী….

এককনিপাতো নিট্ঠিতো.

২. দুকনিপাতো

১. অভিৰূপনন্দাথেৰীগাথা

১৯. [অপ. থেৰী ২.৪.১৫৭ অপদানেপি] ‘‘আতুৰং অসুচিং পূতিং, পস্স নন্দে সমুস্সযং;

অসুভায চিত্তং ভাৱেহি, একগ্গং সুসমাহিতং.

২০. ‘‘অনিমিত্তঞ্চ ভাৱেহি, মানানুসযমুজ্জহ;

ততো মানাভিসমযা, উপসন্তা চৰিস্সসী’’তি.

ইত্থং সুদং ভগৱা অভিৰূপনন্দং সিক্খমানং ইমাহি গাথাহি অভিণ্হং ওৱদতীতি [ইত্থং সুদং ভগৱা অভিৰূপনন্দং সিক্খমানং ইমাহি গাথাহি অভিণ্হং ওৱদতীতি (ক.)].

২. জেন্তাথেৰীগাথা

২১. ‘‘যে ইমে সত্ত বোজ্ঝঙ্গা, মগ্গা নিব্বানপত্তিযা;

ভাৱিতা তে মযা সব্বে, যথা বুদ্ধেন দেসিতা.

২২. ‘‘দিট্ঠো হি মে সো ভগৱা, অন্তিমোযং সমুস্সযো;

ৱিক্খীণো জাতিসংসাৰো, নত্থি দানি পুনব্ভৱো’’তি.

ইত্থং সুদং জেন্তা থেৰী গাথাযো অভাসিত্থাতি.

৩. সুমঙ্গলমাতাথেৰীগাথা

২৩. ‘‘সুমুত্তিকা সুমুত্তিকা [সুমুত্তিকে সুমুত্তিকে (সী.), সুমুত্তিকে সুমুত্তিকা (স্যা. ক.)], সাধুমুত্তিকাম্হি মুসলস্স;

অহিৰিকো মে ছত্তকং ৱাপি, উক্খলিকা মে দেড্ডুভং ৱাতি.

২৪. ‘‘ৰাগঞ্চ অহং দোসঞ্চ, চিচ্চিটি চিচ্চিটীতি ৱিহনামি;

সা ৰুক্খমূলমুপগম্ম, অহো সুখন্তি সুখতো ঝাযামী’’তি.

… সুমঙ্গলমাতা থেৰী [অঞ্ঞতৰা থেৰী ভিক্খুনী অপঞ্ঞাতা (স্যা. ক.)].

৪. অড্ঢকাসিথেৰীগাথা

২৫. ‘‘যাৱ কাসিজনপদো, সুঙ্কো মে তত্থকো অহু;

তং কত্ৱা নেগমো অগ্ঘং, অড্ঢেনগ্ঘং ঠপেসি মং.

২৬. ‘‘অথ নিব্বিন্দহং ৰূপে, নিব্বিন্দঞ্চ ৱিৰজ্জহং;

মা পুন জাতিসংসাৰং, সন্ধাৱেয্যং পুনপ্পুনং;

তিস্সো ৱিজ্জা সচ্ছিকতা, কতং বুদ্ধস্স সাসন’’ন্তি.

… অড্ঢকাসি থেৰী….

৫. চিত্তাথেৰীগাথা

২৭. ‘‘কিঞ্চাপি খোম্হি কিসিকা, গিলানা বাড়্হদুব্বলা;

দণ্ডমোলুব্ভ গচ্ছামি, পব্বতং অভিৰূহিয.

২৮. ‘‘সঙ্ঘাটিং নিক্খিপিত্ৱান, পত্তকঞ্চ নিকুজ্জিয;

সেলে খম্ভেসিমত্তানং, তমোখন্ধং পদালিযা’’তি.

… চিত্তা থেৰী….

৬. মেত্তিকাথেৰীগাথা

২৯. ‘‘কিঞ্চাপি খোম্হি দুক্খিতা, দুব্বলা গতযোব্বনা;

দণ্ডমোলুব্ভ গচ্ছামি, পব্বতং অভিৰূহিয.

৩০. ‘‘নিক্খিপিত্ৱান সঙ্ঘাটিং, পত্তকঞ্চ নিকুজ্জিয;

নিসিন্না চম্হি সেলম্হি, অথ চিত্তং ৱিমুচ্চি মে;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… মেত্তিকা থেৰী….

৭. মিত্তাথেৰীগাথা

৩১. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

৩২. ‘‘উপোসথং উপাগচ্ছিং, দেৱকাযাভিনন্দিনী;

সাজ্জ একেন ভত্তেন, মুণ্ডা সঙ্ঘাটিপাৰুতা;

দেৱকাযং ন পত্থেহং, ৱিনেয্য হদযে দৰ’’ন্তি.

… মিত্তা থেৰী….

৮. অভযমাতুথেৰীগাথা

৩৩. ‘‘উদ্ধং পাদতলা অম্ম, অধো ৱে কেসমত্থকা;

পচ্চৱেক্খস্সুমং কাযং, অসুচিং পূতিগন্ধিকং.

৩৪. ‘‘এৱং ৱিহৰমানায, সব্বো ৰাগো সমূহতো;

পৰিড়াহো সমুচ্ছিন্নো, সীতিভূতাম্হি নিব্বুতা’’তি.

… অভযমাতু থেৰী….

৯. অভযাথেৰীগাথা

৩৫. ‘‘অভযে ভিদুৰো কাযো, যত্থ সতা পুথুজ্জনা;

নিক্খিপিস্সামিমং দেহং, সম্পজানা সতীমতী.

৩৬. ‘‘বহূহি দুক্খধম্মেহি, অপ্পমাদৰতায মে;

তণ্হক্খযো অনুপ্পত্তো, কতং বুদ্ধস্স সাসন’’ন্তি.

… অভযা থেৰী….

১০. সামাথেৰীগাথা

৩৭. ‘‘চতুক্খত্তুং পঞ্চক্খত্তুং, ৱিহাৰা উপনিক্খমিং;

অলদ্ধা চেতসো সন্তিং, চিত্তে অৱসৱত্তিনী;

তস্সা মে অট্ঠমী ৰত্তি, যতো তণ্হা সমূহতা.

৩৮. ‘‘বহূহি দুক্খধম্মেহি, অপ্পমাদৰতায মে;

তণ্হক্খযো অনুপ্পত্তো, কতং বুদ্ধস্স সাসন’’ন্তি.

… সামা থেৰী….

দুকনিপাতো নিট্ঠিতো.

৩. তিকনিপাতো

১. অপৰাসামাথেৰীগাথা

৩৯. ‘‘পণ্ণৱীসতিৱস্সানি, যতো পব্বজিতায মে;

নাভিজানামি চিত্তস্স, সমং লদ্ধং কুদাচনং.