৬. ছক্কনিপাতো

১. পঞ্চসতমত্তাথেৰীগাথা

১২৭. ‘‘যস্স মগ্গং ন জানাসি, আগতস্স গতস্স ৱা;

তং কুতো চাগতং সত্তং [সন্তং (সী.), পুত্তং (স্যা.)], ‘মম পুত্তো’তি ৰোদসি.

১২৮. ‘‘মগ্গঞ্চ খোস্স [খো’থ (স্যা. ক.)] জানাসি, আগতস্স গতস্স ৱা;

ন নং সমনুসোচেসি, এৱংধম্মা হি পাণিনো.

১২৯. ‘‘অযাচিতো ততাগচ্ছি, নানুঞ্ঞাতো [অননুঞ্ঞাতো (সী. স্যা.)] ইতো গতো;

কুতোচি নূন আগন্ত্ৱা, ৱসিত্ৱা কতিপাহকং;

ইতোপি অঞ্ঞেন গতো, ততোপঞ্ঞেন গচ্ছতি.

১৩০. ‘‘পেতো মনুস্সৰূপেন, সংসৰন্তো গমিস্সতি;

যথাগতো তথা গতো, কা তত্থ পৰিদেৱনা’’.

১৩১. ‘‘অব্বহী [অব্বুয্হং (স্যা.)] ৱত মে সল্লং, দুদ্দসং হদযস্সিতং;

যা মে সোকপৰেতায, পুত্তসোকং ব্যপানুদি.

১৩২. ‘‘সাজ্জ অব্বূড়্হসল্লাহং, নিচ্ছাতা পৰিনিব্বুতা;

বুদ্ধং ধম্মঞ্চ সঙ্ঘঞ্চ, উপেমি সৰণং মুনিং’’.

ইত্থং সুদং পঞ্চসতমত্তা থেৰী ভিক্খুনিযো…পে….

২. ৱাসেট্ঠীথেৰীগাথা

১৩৩. ‘‘পুত্তসোকেনহং অট্টা, খিত্তচিত্তা ৱিসঞ্ঞিনী;

নগ্গা পকিণ্ণকেসী চ, তেন তেন ৱিচাৰিহং.

১৩৪. ‘‘ৱীথি [ৱসিং (সী.)] সঙ্কাৰকূটেসু, সুসানে ৰথিযাসু চ;

অচৰিং তীণি ৱস্সানি, খুপ্পিপাসাসমপ্পিতা.

১৩৫. ‘‘অথদ্দসাসিং সুগতং, নগৰং মিথিলং পতি [গতং (ক.)];

অদন্তানং দমেতাৰং, সম্বুদ্ধমকুতোভযং.

১৩৬. ‘‘সচিত্তং পটিলদ্ধান, ৱন্দিত্ৱান উপাৱিসিং;

সো মে ধম্মমদেসেসি, অনুকম্পায গোতমো.

১৩৭. ‘‘তস্স ধম্মং সুণিত্ৱান, পব্বজিং অনগাৰিযং;

যুঞ্জন্তী সত্থুৱচনে, সচ্ছাকাসিং পদং সিৱং.

১৩৮. ‘‘সব্বে সোকা সমুচ্ছিন্না, পহীনা এতদন্তিকা;

পৰিঞ্ঞাতা হি মে ৱত্থূ, যতো সোকান সম্ভৱো’’তি.

… ৱাসেট্ঠী থেৰী….

৩. খেমাথেৰীগাথা

১৩৯. ‘‘দহৰা ত্ৱং ৰূপৱতী, অহম্পি দহৰো যুৱা;

পঞ্চঙ্গিকেন তুৰিযেন [তূৰেন (ক.)], এহি খেমে ৰমামসে’’.

১৪০. ‘‘ইমিনা পূতিকাযেন, আতুৰেন পভঙ্গুনা;

অট্টিযামি হৰাযামি, কামতণ্হা সমূহতা.

১৪১. ‘‘সত্তিসূলূপমা কামা, খন্ধাসং অধিকুট্টনা;

যং ‘ত্ৱং কামৰতিং’ ব্ৰূসি, ‘অৰতী’ দানি সা মম.

১৪২. ‘‘সব্বত্থ ৱিহতা নন্দী, তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তক.

১৪৩. ‘‘নক্খত্তানি নমস্সন্তা, অগ্গিং পৰিচৰং ৱনে;

যথাভুচ্চমজানন্তা, বালা সুদ্ধিমমঞ্ঞথ.

১৪৪. ‘‘অহঞ্চ খো নমস্সন্তী, সম্বুদ্ধং পুৰিসুত্তমং;

পমুত্তা [পৰিমুত্তা (সী. স্যা.)] সব্বদুক্খেহি, সত্থুসাসনকাৰিকা’’তি.

… খেমা থেৰী….

৪. সুজাতাথেৰীগাথা

১৪৫. ‘‘অলঙ্কতা সুৱসনা, মালিনী চন্দনোক্খিতা;

সব্বাভৰণসঞ্ছন্না, দাসীগণপুৰক্খতা.

১৪৬. ‘‘অন্নং পানঞ্চ আদায, খজ্জং ভোজ্জং অনপ্পকং;

গেহতো নিক্খমিত্ৱান, উয্যানমভিহাৰযিং.

১৪৭. ‘‘তত্থ ৰমিত্ৱা কীড়িত্ৱা, আগচ্ছন্তী সকং ঘৰং;

ৱিহাৰং দট্ঠুং পাৱিসিং, সাকেতে অঞ্জনং ৱনং.

১৪৮. ‘‘দিস্ৱান লোকপজ্জোতং, ৱন্দিত্ৱান উপাৱিসিং;

সো মে ধম্মমদেসেসি, অনুকম্পায চক্খুমা.

১৪৯. ‘‘সুত্ৱা চ খো মহেসিস্স, সচ্চং সম্পটিৱিজ্ঝহং;

তত্থেৱ ৱিৰজং ধম্মং, ফুসযিং অমতং পদং.

১৫০. ‘‘ততো ৱিঞ্ঞাতসদ্ধম্মা, পব্বজিং অনগাৰিযং;

তিস্সো ৱিজ্জা অনুপ্পত্তা, অমোঘং বুদ্ধসাসন’’ন্তি.

… সুজাতা থেৰী….

৫. অনোপমাথেৰীগাথা

১৫১. ‘‘উচ্চে কুলে অহং জাতা, বহুৱিত্তে মহদ্ধনে;

ৱণ্ণৰূপেন সম্পন্না, ধীতা মজ্ঝস্স [মেঘস্স (সী.), মেঘিস্স (স্যা.)] অত্ৰজা.

১৫২. ‘‘পত্থিতা ৰাজপুত্তেহি, সেট্ঠিপুত্তেহি গিজ্ঝিতা [সেট্ঠিপুত্তেহি ভিজ্ঝিতা (সী.)];

পিতু মে পেসযী দূতং, দেথ ময্হং অনোপমং.

১৫৩. ‘‘যত্তকং তুলিতা এসা, তুয্হং ধীতা অনোপমা;

ততো অট্ঠগুণং দস্সং, হিৰঞ্ঞং ৰতনানি চ.

১৫৪. ‘‘সাহং দিস্ৱান সম্বুদ্ধং, লোকজেট্ঠং অনুত্তৰং;

তস্স পাদানি ৱন্দিত্ৱা, একমন্তং উপাৱিসিং.

১৫৫. ‘‘সো মে ধম্মমদেসেসি, অনুকম্পায গোতমো;

নিসিন্না আসনে তস্মিং, ফুসযিং ততিযং ফলং.

১৫৬. ‘‘ততো কেসানি ছেত্ৱান, পব্বজিং অনগাৰিযং;

অজ্জ মে সত্তমী ৰত্তি, যতো তণ্হা ৱিসোসিতা’’তি.

… অনোপমা থেৰী….

৬. মহাপজাপতিগোতমীথেৰীগাথা

১৫৭. ‘‘বুদ্ধ ৱীৰ নমো ত্যত্থু, সব্বসত্তানমুত্তম;

যো মং দুক্খা পমোচেসি, অঞ্ঞঞ্চ বহুকং জনং.

১৫৮. ‘‘সব্বদুক্খং পৰিঞ্ঞাতং, হেতুতণ্হা ৱিসোসিতা;

ভাৱিতো অট্ঠঙ্গিকো [অৰিযট্ঠঙ্গিকো (সী. ক.), ভাৱিতট্ঠঙ্গিকো (স্যা.)] মগ্গো, নিৰোধো ফুসিতো মযা.

১৫৯. ‘‘মাতা পুত্তো পিতা ভাতা, অয্যকা চ পুৰে অহুং;

যথাভুচ্চমজানন্তী, সংসৰিংহং অনিব্বিসং.

১৬০. ‘‘দিট্ঠো হি মে সো ভগৱা, অন্তিমোযং সমুস্সযো;

ৱিক্খীণো জাতিসংসাৰো, নত্থি দানি পুনব্ভৱো.

১৬১. ‘‘আৰদ্ধৱীৰিযে পহিতত্তে, নিচ্চং দড়্হপৰক্কমে;

সমগ্গে সাৱকে পস্সে, এসা বুদ্ধান ৱন্দনা.

১৬২. ‘‘বহূনং [বহুন্নং (সী. স্যা.)] ৱত অত্থায, মাযা জনযি গোতমং;

ব্যাধিমৰণতুন্নানং, দুক্খক্খন্ধং ব্যপানুদী’’তি.

… মহাপজাপতিগোতমী থেৰী….

৭. গুত্তাথেৰীগাথা

১৬৩. ‘‘গুত্তে যদত্থং পব্বজ্জা, হিত্ৱা পুত্তং ৱসুং পিযং;

তমেৱ অনুব্ৰূহেহি, মা চিত্তস্স ৱসং গমি.

১৬৪. ‘‘চিত্তেন ৱঞ্চিতা সত্তা, মাৰস্স ৱিসযে ৰতা;

অনেকজাতিসংসাৰং, সন্ধাৱন্তি অৱিদ্দসূ.

১৬৫. ‘‘কামচ্ছন্দঞ্চ ব্যাপাদং, সক্কাযদিট্ঠিমেৱ চ;

সীলব্বতপৰামাসং, ৱিচিকিচ্ছঞ্চ পঞ্চমং.

১৬৬. ‘‘সংযোজনানি এতানি, পজহিত্ৱান ভিক্খুনী;

ওৰম্ভাগমনীযানি, নযিদং পুনৰেহিসি.

১৬৭. ‘‘ৰাগং মানং অৱিজ্জঞ্চ, উদ্ধচ্চঞ্চ ৱিৱজ্জিয;

সংযোজনানি ছেত্ৱান, দুক্খস্সন্তং কৰিস্সসি.

১৬৮. ‘‘খেপেত্ৱা জাতিসংসাৰং, পৰিঞ্ঞায পুনব্ভৱং;

দিট্ঠেৱ ধম্মে নিচ্ছাতা, উপসন্তা চৰিস্সতী’’তি.

… গুত্তা থেৰী….

৮. ৱিজযাথেৰীগাথা

১৬৯. ‘‘চতুক্খত্তুং পঞ্চক্খত্তুং, ৱিহাৰা উপনিক্খমিং;

অলদ্ধা চেতসো সন্তিং, চিত্তে অৱসৱত্তিনী.

১৭০. ‘‘ভিক্খুনিং উপসঙ্কম্ম, সক্কচ্চং পৰিপুচ্ছহং;

সা মে ধম্মমদেসেসি, ধাতুআযতনানি চ.

১৭১. ‘‘চত্তাৰি অৰিযসচ্চানি, ইন্দ্ৰিযানি বলানি চ;

বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা.

১৭২. ‘‘তস্সাহং ৱচনং সুত্ৱা, কৰোন্তী অনুসাসনিং;

ৰত্তিযা পুৰিমে যামে, পুব্বজাতিমনুস্সৰিং.

১৭৩. ‘‘ৰত্তিযা মজ্ঝিমে যামে, দিব্বচক্খুং ৱিসোধযিং;

ৰত্তিযা পচ্ছিমে যামে, তমোখন্ধং পদালযিং.

১৭৪. ‘‘পীতিসুখেন চ কাযং, ফৰিত্ৱা ৱিহৰিং তদা;

সত্তমিযা পাদে পসাৰেসিং, তমোখন্ধং পদালিযা’’তি.

… ৱিজযা থেৰী….

ছক্কনিপাতো নিট্ঠিতো.