৯. পুৰোহিতপুত্তজেন্তত্থেৰগাথা

৪২৩. ‘‘জাতিমদেন মত্তোহং, ভোগইস্সৰিযেন চ;

সণ্ঠানৱণ্ণৰূপেন, মদমত্তো অচাৰিহং.

৪২৪. ‘‘নাত্তনো সমকং কঞ্চি, অতিৰেকং চ মঞ্ঞিসং;

অতিমানহতো বালো, পত্থদ্ধো উস্সিতদ্ধজো.

৪২৫. ‘‘মাতৰং পিতৰঞ্চাপি, অঞ্ঞেপি গৰুসম্মতে;

ন কঞ্চি অভিৱাদেসিং, মানত্থদ্ধো অনাদৰো.

৪২৬. ‘‘দিস্ৱা ৱিনাযকং অগ্গং, সাৰথীনং ৱৰুত্তমং;

তপন্তমিৱ আদিচ্চং, ভিক্খুসঙ্ঘপুৰক্খতং.

৪২৭. ‘‘মানং মদঞ্চ ছড্ডেত্ৱা, ৱিপ্পসন্নেন চেতসা;

সিৰসা অভিৱাদেসিং, সব্বসত্তানমুত্তমং.

৪২৮. ‘‘অতিমানো চ ওমানো, পহীনা সুসমূহতা;

অস্মিমানো সমুচ্ছিন্নো, সব্বে মানৱিধা হতা’’তি.

… জেন্তো পুৰোহিতপুত্তো থেৰো….