১০. সুমনত্থেৰগাথা

৪২৯. ‘‘যদা নৱো পব্বজিতো, জাতিযা সত্তৱস্সিকো;

ইদ্ধিযা অভিভোত্ৱান, পন্নগিন্দং মহিদ্ধিকং.

৪৩০. ‘‘উপজ্ঝাযস্স উদকং, অনোতত্তা মহাসৰা;

আহৰামি ততো দিস্ৱা, মং সত্থা এতদব্ৰৱি’’.

৪৩১. ‘‘সাৰিপুত্ত ইমং পস্স, আগচ্ছন্তং কুমাৰকং;

উদককুম্ভমাদায, অজ্ঝত্তং সুসমাহিতং.

৪৩২. ‘‘পাসাদিকেন ৱত্তেন, কল্যাণইৰিযাপথো;

সামণেৰোনুৰুদ্ধস্স, ইদ্ধিযা চ ৱিসাৰদো.

৪৩৩. ‘‘আজানীযেন আজঞ্ঞো, সাধুনা সাধুকাৰিতো;

ৱিনীতো অনুৰুদ্ধেন, কতকিচ্চেন সিক্খিতো.

৪৩৪. ‘‘সো পত্ৱা পৰমং সন্তিং, সচ্ছিকত্ৱা অকুপ্পতং;

সামণেৰো স সুমনো, মা মং জঞ্ঞাতি ইচ্ছতী’’তি.

… সুমনো থেৰো….