৫. পঞ্চমৱগ্গো

১. কুমাৰকস্সপত্থেৰগাথা

২০১. ‘‘অহো বুদ্ধা অহো ধম্মা, অহো নো সত্থু সম্পদা;

যত্থ এতাদিসং ধম্মং, সাৱকো সচ্ছিকাহি’’তি.

২০২. ‘‘অসঙ্খেয্যেসু কপ্পেসু, সক্কাযাধিগতা অহূ;

তেসমযং পচ্ছিমকো, চৰিমোযং সমুস্সযো;

জাতিমৰণসংসাৰো, নত্থি দানি পুনব্ভৱো’’তি.

… কুমাৰকস্সপো থেৰো….

২. ধম্মপালত্থেৰগাথা

২০৩. ‘‘যো হৱে দহৰো ভিক্খু, যুঞ্জতি বুদ্ধসাসনে;

জাগৰো স হি সুত্তেসু [পতিসুত্তেসু (সী. ক.)], অমোঘং তস্স জীৱিতং.

২০৪. ‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৱী, সৰং বুদ্ধান সাসন’’ন্তি.

… ধম্মপালো থেৰো….

৩. ব্ৰহ্মালিত্থেৰগাথা

২০৫. ‘‘কস্সিন্দ্ৰিযানি সমথঙ্গতানি, অস্সা যথা সাৰথিনা সুদন্তা;

পহীনমানস্স অনাসৱস্স, দেৱাপি কস্স [তস্স (বহূসু)] পিহযন্তি তাদিনো’’তি.

২০৬. [ধ. প. ৯৪ ধম্মপদেপি] ‘‘ময্হিন্দ্ৰিযানি সমথঙ্গতানি, অস্সা যথা সাৰথিনা সুদন্তা;

পহীনমানস্স অনাসৱস্স, দেৱাপি ময্হং পিহযন্তি তাদিনো’’তি.

… ব্ৰহ্মালি থেৰো….

৪. মোঘৰাজত্থেৰগাথা

২০৭. ‘‘ছৱিপাপক চিত্তভদ্দক, মোঘৰাজ সততং সমাহিতো;

হেমন্তিকসীতকালৰত্তিযো [হেমন্তিককালৰত্তিযো (ক.)], ভিক্খু ত্ৱংসি কথং কৰিস্সসি’’.

২০৮. ‘‘সম্পন্নসস্সা মগধা, কেৱলা ইতি মে সুতং;

পলালচ্ছন্নকো সেয্যং, যথঞ্ঞে সুখজীৱিনো’’তি.

… মোঘৰাজা থেৰো….

৫. ৱিসাখপঞ্চালপুত্তত্থেৰগাথা

২০৯. ‘‘ন উক্খিপে নো চ পৰিক্খিপে পৰে, ওক্খিপে পাৰগতং ন এৰযে;

ন চত্তৱণ্ণং পৰিসাসু ব্যাহৰে, অনুদ্ধতো সম্মিতভাণি সুব্বতো.

২১০. ‘‘সুসুখুমনিপুণত্থদস্সিনা, মতিকুসলেন নিৱাতৱুত্তিনা;

সংসেৱিতৱুদ্ধসীলিনা, নিব্বানং ন হি তেন দুল্লভ’’ন্তি.

… ৱিসাখো পঞ্চালপুত্তো থেৰো ….

৬. চূড়কত্থেৰগাথা

২১১. ‘‘নদন্তি মোৰা সুসিখা সুপেখুণা, সুনীলগীৱা সুমুখা সুগজ্জিনো;

সুসদ্দলা চাপি মহামহী অযং, সুব্যাপিতম্বু সুৱলাহকং নভং.

২১২. ‘‘সুকল্লৰূপো সুমনস্স ঝাযতং [ঝাযিতং (স্যা. ক.)], সুনিক্কমো সাধু সুবুদ্ধসাসনে;

সুসুক্কসুক্কং নিপুণং সুদুদ্দসং, ফুসাহি তং উত্তমমচ্চুতং পদ’’ন্তি.

… চূড়কো [চূলকো (সী. অট্ঠ.)] থেৰো….

৭. অনূপমত্থেৰগাথা

২১৩. ‘‘নন্দমানাগতং চিত্তং, সূলমাৰোপমানকং;

তেন তেনেৱ ৱজসি, যেন সূলং কলিঙ্গৰং.

২১৪. ‘‘তাহং চিত্তকলিং ব্ৰূমি, তং ব্ৰূমি চিত্তদুব্ভকং;

সত্থা তে দুল্লভো লদ্ধো, মানত্থে মং নিযোজযী’’তি.

… অনূপমো থেৰো….

৮. ৱজ্জিতত্থেৰগাথা

২১৫. ‘‘সংসৰং দীঘমদ্ধানং, গতীসু পৰিৱত্তিসং;

অপস্সং অৰিযসচ্চানি, অন্ধভূতো [অন্ধীভূতো (ক.)] পুথুজ্জনো.

২১৬. ‘‘তস্স মে অপ্পমত্তস্স, সংসাৰা ৱিনড়ীকতা;

সব্বা গতী সমুচ্ছিন্না, নত্থি দানি পুনব্ভৱো’’তি.

… ৱজ্জিতো থেৰো….

৯. সন্ধিতত্থেৰগাথা

২১৭. ‘‘অস্সত্থে হৰিতোভাসে, সংৱিৰূড়্হম্হি পাদপে;

একং বুদ্ধগতং সঞ্ঞং, অলভিত্থং [অলভিং হং (ক.)] পতিস্সতো.

২১৮. ‘‘একতিংসে ইতো কপ্পে, যং সঞ্ঞমলভিং তদা;

তস্সা সঞ্ঞায ৱাহসা, পত্তো মে আসৱক্খযো’’তি.

… সন্ধিতো থেৰো….

ৱগ্গো পঞ্চমো নিট্ঠিতো.

তস্সুদ্দানং –

কুমাৰকস্সপো থেৰো, ধম্মপালো চ ব্ৰহ্মালি;

মোঘৰাজা ৱিসাখো চ, চূড়কো চ অনূপমো;

ৱজ্জিতো সন্ধিতো থেৰো, কিলেসৰজৱাহনোতি.

দুকনিপাতো নিট্ঠিতো.