৪. চতুত্থৱগ্গো

১. মিগসিৰত্থেৰগাথা

১৮১. ‘‘যতো অহং পব্বজিতো, সম্মাসম্বুদ্ধসাসনে;

ৱিমুচ্চমানো উগ্গচ্ছিং, কামধাতুং উপচ্চগং.

১৮২. ‘‘ব্ৰহ্মুনো পেক্খমানস্স, ততো চিত্তং ৱিমুচ্চি মে;

অকুপ্পা মে ৱিমুত্তীতি, সব্বসংযোজনক্খযা’’তি.

… মিগসিৰো থেৰো….

২. সিৱকত্থেৰগাথা

১৮৩. ‘‘অনিচ্চানি গহকানি, তত্থ তত্থ পুনপ্পুনং;

গহকাৰং [গহকাৰকং (সী. পী.)] গৱেসন্তো, দুক্খা জাতি পুনপ্পুনং.

১৮৪. ‘‘গহকাৰক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, থূণিকা [থূণিৰা (পী. ক.), ধুণিৰা (স্যা.)] চ ৱিদালিতা [পদালিতা (সী. স্যা.)];

ৱিমৰিযাদিকতং চিত্তং, ইধেৱ ৱিধমিস্সতী’’তি.

… সিৱকো [সীৱকো (সী.)] থেৰো….

৩. উপৱাণত্থেৰগাথা

১৮৫. ‘‘অৰহং সুগতো লোকে, ৱাতেহাবাধিতো [… বাধিতো (ক.)] মুনি;

সচে উণ্হোদকং অত্থি, মুনিনো দেহি ব্ৰাহ্মণ.

১৮৬. ‘‘পূজিতো পূজনেয্যানং [পূজনীযানং (সী.)], সক্কৰেয্যান সক্কতো;

অপচিতোপচেয্যানং [অপচনীযানং (সী.), অপচিনেয্যানং (স্যা.)], তস্স ইচ্ছামি হাতৱে’’তি.

… উপৱাণো থেৰো….

৪. ইসিদিন্নত্থেৰগাথা

১৮৭. ‘‘দিট্ঠা মযা ধম্মধৰা উপাসকা, কামা অনিচ্চা ইতি ভাসমানা;

সাৰত্তৰত্তা মণিকুণ্ডলেসু, পুত্তেসু দাৰেসু চ তে অপেক্খা.

১৮৮. ‘‘অদ্ধা ন জানন্তি যতোধ ধম্মং, কামা অনিচ্চা ইতি চাপি আহু;

ৰাগঞ্চ তেসং ন বলত্থি ছেত্তুং, তস্মা সিতা পুত্তদাৰং ধনঞ্চা’’তি.

… ইসিদিন্নো থেৰো….

৫. সম্বুলকচ্চানত্থেৰগাথা

১৮৯. ‘‘দেৱো চ ৱস্সতি দেৱো চ গড়গড়াযতি,

এককো চাহং ভেৰৱে বিলে ৱিহৰামি;

তস্স ময্হং এককস্স ভেৰৱে বিলে ৱিহৰতো,

নত্থি ভযং ৱা ছম্ভিতত্তং ৱা লোমহংসো ৱা.

১৯০. ‘‘ধম্মতা মমসা যস্স মে, এককস্স ভেৰৱে বিলে;

ৱিহৰতো নত্থি ভযং ৱা, ছম্ভিতত্তং ৱা লোমহংসো ৱা’’তি.

… সম্বুলকচ্চানো [সম্বহুলকচ্চানো (ক.)] থেৰো….

৬. নিতকত্থেৰগাথা

১৯১. [উদা. ৩৪ উদানেপি] ‘‘কস্স সেলূপমং চিত্তং, ঠিতং নানুপকম্পতি;

ৱিৰত্তং ৰজনীযেসু, কুপ্পনীযে ন কুপ্পতি;

যস্সেৱং ভাৱিতং চিত্তং, কুতো তং দুক্খমেস্সতি.

১৯২. ‘‘মম সেলূপমং চিত্তং, ঠিতং নানুপকম্পতি;

ৱিৰত্তং ৰজনীযেসু, কুপ্পনীযে ন কুপ্পতি;

মমেৱং ভাৱিতং চিত্তং, কুতো মং দুক্খমেস্সতী’’তি.

… নিতকো [খিতকো (সী. স্যা.)] থেৰো….

৭. সোণপোটিৰিযত্থেৰগাথা

১৯৩. ‘‘ন তাৱ সুপিতুং হোতি, ৰত্তি নক্খত্তমালিনী;

পটিজগ্গিতুমেৱেসা, ৰত্তি হোতি ৱিজানতা.

১৯৪. ‘‘হত্থিক্খন্ধাৱপতিতং, কুঞ্জৰো চে অনুক্কমে;

সঙ্গামে মে মতং সেয্যো, যঞ্চে জীৱে পৰাজিতো’’তি.

… সোণো পোটিৰিযো [সেলিস্সৰিযো (সী.), পোট্টিৰিযপুত্তো (স্যা.)] থেৰো ….

৮. নিসভত্থেৰগাথা

১৯৫. ‘‘পঞ্চ কামগুণে হিত্ৱা, পিযৰূপে মনোৰমে;

সদ্ধায ঘৰা নিক্খম্ম, দুক্খস্সন্তকৰো ভৱে.

১৯৬. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, সম্পজানো পতিস্সতো’’তি.

… নিসভো থেৰো….

৯. উসভত্থেৰগাথা

১৯৭. ‘‘অম্বপল্লৱসঙ্কাসং, অংসে কত্ৱান চীৱৰং;

নিসিন্নো হত্থিগীৱাযং, গামং পিণ্ডায পাৱিসিং.

১৯৮. ‘‘হত্থিক্খন্ধতো ওৰুয্হ, সংৱেগং অলভিং তদা;

সোহং দিত্তো তদা সন্তো, পত্তো মে আসৱক্খযো’’তি.

… উসভো থেৰো….

১০. কপ্পটকুৰত্থেৰগাথা

১৯৯. ‘‘অযমিতি কপ্পটো কপ্পটকুৰো, অচ্ছায অতিভৰিতায [অতিভৰিযায (সী. ক.), অচ্চং ভৰায (স্যা.)];

অমতঘটিকাযং ধম্মকটমত্তো [ধম্মকটপত্তো (স্যা. ক. অট্ঠ.), ধম্মকটমগ্গো (সী. অট্ঠ.)], কতপদং ঝানানি ওচেতুং.

২০০. ‘‘মা খো ত্ৱং কপ্পট পচালেসি, মা ত্ৱং উপকণ্ণম্হি তাড়েস্সং;

ন হি [ন ৱা (ক.)] ত্ৱং কপ্পট মত্তমঞ্ঞাসি, সঙ্ঘমজ্ঝম্হি পচলাযমানোতি.

… কপ্পটকুৰো থেৰো….

ৱগ্গো চতুত্থো নিট্ঠিতো.

তস্সুদ্দানং –

মিগসিৰো সিৱকো চ, উপৱানো চ পণ্ডিতো;

ইসিদিন্নো চ কচ্চানো, নিতকো চ মহাৱসী;

পোটিৰিযপুত্তো নিসভো, উসভো কপ্পটকুৰোতি.