৩. ততিযৱগ্গো

১. উত্তৰত্থেৰগাথা

১৬১. ‘‘খন্ধা মযা পৰিঞ্ঞাতা, তণ্হা মে সুসমূহতা;

ভাৱিতা মম বোজ্ঝঙ্গা, পত্তো মে আসৱক্খযো.

১৬২. ‘‘সোহং খন্ধে পৰিঞ্ঞায, অব্বহিত্ৱান [অব্বুহিত্ৱান (ক.)] জালিনিং;

ভাৱযিত্ৱান বোজ্ঝঙ্গে, নিব্বাযিস্সং অনাসৱো’’তি.

… উত্তৰো থেৰো….

২. ভদ্দজিত্থেৰগাথা

১৬৩. ‘‘পনাদো নাম সো ৰাজা, যস্স যূপো সুৱণ্ণযো;

তিৰিযং সোড়সুব্বেধো [সোড়সপব্বেধো (সী. অট্ঠ.), সোড়সব্বাণো (?)], উব্ভমাহু [উদ্ধমাহু (সী.), উচ্চমাহু (স্যা.)] সহস্সধা.

১৬৪. ‘‘সহস্সকণ্ডো সতগেণ্ডু, ধজালু হৰিতামযো;

অনচ্চুং তত্থ গন্ধব্বা, ছসহস্সানি সত্তধা’’তি.

… ভদ্দজিত্থেৰো….

৩. সোভিতত্থেৰগাথা

১৬৫. ‘‘সতিমা পঞ্ঞৱা ভিক্খু, আৰদ্ধবলৱীৰিযো;

পঞ্চ কপ্পসতানাহং, একৰত্তিং অনুস্সৰিং.

১৬৬. ‘‘চত্তাৰো সতিপট্ঠানে, সত্ত অট্ঠ চ ভাৱযং;

পঞ্চ কপ্পসতানাহং, একৰত্তিং অনুস্সৰি’’ন্তি.

… সোভিতো থেৰো….

৪. ৱল্লিযত্থেৰগাথা

১৬৭. ‘‘যং কিচ্চং দড়্হৱীৰিযেন, যং কিচ্চং বোদ্ধুমিচ্ছতা;

কৰিস্সং নাৱৰজ্ঝিস্সং [নাৱৰুজ্ঝিস্সং (ক. সী. ক.)], পস্স ৱীৰিযং পৰক্কম.

১৬৮. ‘‘ত্ৱঞ্চ মে মগ্গমক্খাহি, অঞ্জসং অমতোগধং;

অহং মোনেন মোনিস্সং, গঙ্গাসোতোৱ সাগৰ’’ন্তি.

… ৱল্লিযো থেৰো….

৫. ৱীতসোকত্থেৰগাথা

১৬৯. ‘‘কেসে মে ওলিখিস্সন্তি, কপ্পকো উপসঙ্কমি;

ততো আদাসমাদায, সৰীৰং পচ্চৱেক্খিসং.

১৭০. ‘‘তুচ্ছো কাযো অদিস্সিত্থ, অন্ধকাৰো তমো ব্যগা;

সব্বে চোড়া সমুচ্ছিন্না, নত্থি দানি পুনব্ভৱো’’তি.

… ৱীতসোকো থেৰো….

৬. পুণ্ণমাসত্থেৰগাথা

১৭১. ‘‘পঞ্চ নীৱৰণে হিত্ৱা, যোগক্খেমস্স পত্তিযা;

ধম্মাদাসং গহেত্ৱান, ঞাণদস্সনমত্তনো.

১৭২. ‘‘পচ্চৱেক্খিং ইমং কাযং, সব্বং সন্তৰবাহিৰং;

অজ্ঝত্তঞ্চ বহিদ্ধা চ, তুচ্ছো কাযো অদিস্সথা’’তি.

… পুণ্ণমাসো থেৰো….

৭. নন্দকত্থেৰগাথা

১৭৩. ‘‘যথাপি ভদ্দো আজঞ্ঞো, খলিত্ৱা পতিতিট্ঠতি;

ভিয্যো লদ্দান সংৱেগং, অদীনো ৱহতে ধুৰং.

১৭৪. ‘‘এৱং দস্সনসম্পন্নং, সম্মাসম্বুদ্ধসাৱকং;

আজানীযং মং ধাৰেথ, পুত্তং বুদ্ধস্স ওৰস’’ন্তি.

… নন্দকো থেৰো….

৮. ভৰতত্থেৰগাথা

১৭৫. ‘‘এহি নন্দক গচ্ছাম, উপজ্ঝাযস্স সন্তিকং;

সীহনাদং নদিস্সাম, বুদ্ধসেট্ঠস্স সম্মুখা.

১৭৬. ‘‘যায নো অনুকম্পায, অম্হে পব্বাজযী মুনি;

সো নো অত্থো অনুপ্পত্তো, সব্বসংযোজনক্খযো’’তি.

… ভৰতো থেৰো….

৯. ভাৰদ্ৱাজত্থেৰগাথা

১৭৭. ‘‘নদন্তি এৱং সপ্পঞ্ঞা, সীহাৱ গিৰিগব্ভৰে;

ৱীৰা ৱিজিতসঙ্গামা, জেত্ৱা মাৰং সৱাহনিং [সৱাহনং (বহূসু)].

১৭৮. ‘‘সত্থা চ পৰিচিণ্ণো মে, ধম্মো সঙ্ঘো চ পূজিতো;

অহঞ্চ ৱিত্তো সুমনো, পুত্তং দিস্ৱা অনাসৱ’’ন্তি.

… ভাৰদ্ৱাজো থেৰো….

১০. কণ্হদিন্নত্থেৰগাথা

১৭৯. ‘‘উপাসিতা সপ্পুৰিসা, সুতা ধম্মা অভিণ্হসো;

সুত্ৱান পটিপজ্জিস্সং, অঞ্জসং অমতোগধং.

১৮০. ‘‘ভৱৰাগহতস্স মে সতো, ভৱৰাগো পুন মে ন ৱিজ্জতি;

ন চাহু ন চ মে ভৱিস্সতি, ন চ মে এতৰহি ৱিজ্জতী’’তি.

… কণ্হদিন্নো থেৰো….

ৱগ্গো ততিযো নিট্ঠিতো.

তস্সুদ্দানং –

উত্তৰো ভদ্দজিত্থেৰো, সোভিতো ৱল্লিযো ইসি;

ৱীতসোকো চ যো থেৰো, পুণ্ণমাসো চ নন্দকো;

ভৰতো ভাৰদ্ৱাজো চ, কণ্হদিন্নো মহামুনীতি.