৩. আনন্দত্থেৰগাথা

১০১৭. ‘‘পিসুণেন চ কোধনেন চ, মচ্ছৰিনা চ ৱিভূতনন্দিনা;

সখিতং ন কৰেয্য পণ্ডিতো, পাপো কাপুৰিসেন সঙ্গমো.

১০১৮. ‘‘সদ্ধেন চ পেসলেন চ, পঞ্ঞৱতা বহুস্সুতেন চ;

সখিতং কৰেয্য পণ্ডিতো, ভদ্দো সপ্পুৰিসেন সঙ্গমো.

১০১৯. ‘‘পস্স চিত্তকতং বিম্বং…পে… যস্স নত্থি ধুৱং ঠিতি.

১০২০. ‘‘পস্স চিত্তকতং বিম্বং…পে… ৱত্থেহি সোভতি.

১০২১. ‘‘অলত্তককতা …পে… নো চ পাৰগৱেসিনো.

১০২২. ‘‘অট্ঠপদকতা…পে… নো চ পাৰগৱেসিনো.

১০২৩. ‘‘অঞ্জনীৱ নৱা…পে… নো চ পাৰগৱেসিনো.

১০২৪. ‘‘বহুস্সুতো চিত্তকথী, বুদ্ধস্স পৰিচাৰকো;

পন্নভাৰো ৱিসঞ্ঞুত্তো, সেয্যং কপ্পেতি গোতমো.

১০২৫. ‘‘খীণাসৱো ৱিসঞ্ঞুত্তো, সঙ্গাতীতো সুনিব্বুতো;

ধাৰেতি অন্তিমং দেহং, জাতিমৰণপাৰগূ.

১০২৬. ‘‘যস্মিং পতিট্ঠিতা ধম্মা, বুদ্ধস্সাদিচ্চবন্ধুনো;

নিব্বানগমনে মগ্গে, সোযং তিট্ঠতি গোতমো.

১০২৭. ‘‘দ্ৱাসীতি বুদ্ধতো গণ্হিং, দ্ৱে সহস্সানি ভিক্খুতো;

চতুৰাসীতিসহস্সানি, যে মে ধম্মা পৱত্তিনো.

১০২৮. ‘‘অপ্পস্সুতাযং পুৰিসো, বলিবদ্দোৱ জীৰতি;

মংসানি তস্স ৱড্ঢন্তি, পঞ্ঞা তস্স ন ৱড্ঢতি.

১০২৯. ‘‘বহুস্সুতো অপ্পস্সুতং, যো সুতেনাতিমঞ্ঞতি;

অন্ধো পদীপধাৰোৱ, তথেৱ পটিভাতি মং.

১০৩০. ‘‘বহুস্সুতং উপাসেয্য, সুতঞ্চ ন ৱিনাসযে;

তং মূলং ব্ৰহ্মচৰিযস্স, তস্মা ধম্মধৰো সিযা.

১০৩১. ‘‘পুব্বাপৰঞ্ঞূ অত্থঞ্ঞূ, নিৰুত্তিপদকোৱিদো;

সুগ্গহীতঞ্চ গণ্হাতি, অত্থঞ্চোপপৰিক্খতি.

১০৩২. ‘‘খন্ত্যা ছন্দিকতো [খন্তিযা ছন্দিতো (?)] হোতি, উস্সহিত্ৱা তুলেতি তং;

সমযে সো পদহতি, অজ্ঝত্তং সুসমাহিতো.

১০৩৩. ‘‘বহুস্সুতং ধম্মধৰং, সপ্পঞ্ঞং বুদ্ধসাৱকং;

ধম্মৱিঞ্ঞাণমাকঙ্খং, তং ভজেথ তথাৱিধং.

১০৩৪. ‘‘বহুস্সুতো ধম্মধৰো, কোসাৰক্খো মহেসিনো;

চক্খু সব্বস্স লোকস্স, পূজনীযো বহুস্সুতো.

১০৩৫. ‘‘ধম্মাৰামো ধম্মৰতো, ধম্মং অনুৱিচিন্তযং;

ধম্মং অনুস্সৰং ভিক্খু, সদ্ধম্মা ন পৰিহাযতি.

১০৩৬. ‘‘কাযমচ্ছেৰগৰুনো [গৰুকো (সী.)], হিয্যমানে [হিয্যমানো (সী.)] অনুট্ঠহে;

সৰীৰসুখগিদ্ধস্স, কুতো সমণফাসুতা.

১০৩৭. ‘‘ন পক্খন্তি দিসা সব্বা, ধম্মা ন পটিভন্তি মং;

গতে কল্যাণমিত্তম্হি, অন্ধকাৰংৱ খাযতি.

১০৩৮. ‘‘অব্ভতীতসহাযস্স, অতীতগতসত্থুনো;

নত্থি এতাদিসং মিত্তং, যথা কাযগতা সতি.

১০৩৯. ‘‘যে পুৰাণা অতীতা তে, নৱেহি ন সমেতি মে;

স্ৱজ্জ একোৱ ঝাযামি, ৱস্সুপেতোৱ পক্খিমা.

১০৪০. ‘‘দস্সনায অভিক্কন্তে, নানাৱেৰজ্জকে বহূ;

মা ৱাৰযিত্থ সোতাৰো, পস্সন্তু সমযো মমং.

১০৪১. ‘‘দস্সনায অভিক্কন্তে, নানাৱেৰজ্জকে পুথু;

কৰোতি সত্থা ওকাসং, ন নিৱাৰেতি চক্খুমা.

১০৪২. ‘‘পণ্ণৱীসতিৱস্সানি, সেখভূতস্স মে সতো;

ন কামসঞ্ঞা উপ্পজ্জি, পস্স ধম্মসুধম্মতং.

১০৪৩. ‘‘পণ্ণৱীসতিৱস্সানি, সেখভূতস্স মে সতো;

ন দোসসঞ্ঞা উপ্পজ্জি, পস্স ধম্মসুধম্মতং.

১০৪৪. ‘‘পণ্ণৱীসতিৱস্সানি, ভগৱন্তং উপট্ঠহিং;

মেত্তেন কাযকম্মেন, ছাযাৱ অনপাযিনী [অনুপাযিনী (স্যা. ক.)].

১০৪৫. ‘‘পণ্ণৱীসতিৱস্সানি, ভগৱন্তং উপট্ঠহিং;

মেত্তেন ৱচীকম্মেন, ছাযাৱ অনপাযিনী.

১০৪৬. ‘‘পণ্ণৱীসতিৱস্সানি, ভগৱন্তং উপট্ঠহিং;

মেত্তেন মনোকম্মেন, ছাযাৱ অনপাযিনী.

১০৪৭. ‘‘বুদ্ধস্স চঙ্কমন্তস্স, পিট্ঠিতো অনুচঙ্কমিং;

ধম্মে দেসিযমানম্হি, ঞাণং মে উদপজ্জথ.

১০৪৮. ‘‘অহং সকৰণীযোম্হি, সেখো অপ্পত্তমানসো;

সত্থু চ পৰিনিব্বানং, যো অম্হং অনুকম্পকো.

১০৪৯. ‘‘তদাসি যং ভিংসনকং, তদাসি লোমহংসনং;

সব্বাকাৰৱৰূপেতে, সম্বুদ্ধে পৰিনিব্বুতে.

১০৫০. ‘‘বহুস্সুতো ধম্মধৰো, কোসাৰক্খো মহেসিনো;

চক্খু সব্বস্স লোকস্স, আনন্দো পৰিনিব্বুতো.

১০৫১. ‘‘বহুস্সুতো ধম্মধৰো, কোসাৰক্খো মহেসিনো;

চক্খু সব্বস্স লোকস্স, অন্ধকাৰে তমোনুদো.

১০৫২. ‘‘গতিমন্তো সতিমন্তো, ধিতিমন্তো চ যো ইসি;

সদ্ধম্মধাৰকো থেৰো, আনন্দো ৰতনাকৰো.

১০৫৩. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, নত্থি দানি পুনব্ভৱো’’তি.

… আনন্দো থেৰো….

তিংসনিপাতো নিট্ঠিতো.