১৮. চত্তালীসনিপাতো

১. মহাকস্সপত্থেৰগাথা

১০৫৪. ‘‘ন গণেন পুৰক্খতো চৰে, ৱিমনো হোতি সমাধি দুল্লভো;

নানাজনসঙ্গহো দুখো, ইতি দিস্ৱান গণং ন ৰোচযে.

১০৫৫. ‘‘ন কুলানি উপব্বজে মুনি, ৱিমনো হোতি সমাধি দুল্লভো;

সো উস্সুক্কো ৰসানুগিদ্ধো, অত্থং ৰিঞ্চতি যো সুখাৱহো.

১০৫৬. ‘‘পঙ্কোতি হি নং অৱেদযুং, যাযং ৱন্দনপূজনা কুলেসু;

সুখুমং সল্ল দুৰুব্বহং, সক্কাৰো কাপুৰিসেন দুজ্জহো.

১০৫৭. ‘‘সেনাসনম্হা ওৰুয্হ, নগৰং পিণ্ডায পাৱিসিং;

ভুঞ্জন্তং পুৰিসং কুট্ঠিং, সক্কচ্চং তং উপট্ঠহিং.

১০৫৮. ‘‘সো মে [তং (সী. ক.)] পক্কেন হত্থেন, আলোপং উপনামযি;

আলোপং পক্খিপন্তস্স, অঙ্গুলি চেত্থ [পেত্থ (সী. ক.)] ছিজ্জথ.

১০৫৯. ‘‘কুট্টমূলঞ্চ [কুড্ডমূলঞ্চ (সী. স্যা.)] নিস্সায, আলোপং তং অভুঞ্জিসং;

ভুঞ্জমানে ৱা ভুত্তে ৱা, জেগুচ্ছং মে ন ৱিজ্জতি.

১০৬০. ‘‘উত্তিট্ঠপিণ্ডো আহাৰো, পূতিমুত্তঞ্চ ওসধং;

সেনাসনং ৰুক্খমূলং, পংসুকূলঞ্চ চীৱৰং;

যস্সেতে অভিসম্ভুত্ৱা [অভিভুঞ্জতি (?)], স ৱে চাতুদ্দিসো নৰো.

১০৬১. ‘‘যত্থ একে ৱিহঞ্ঞন্তি, আৰুহন্তা সিলুচ্চযং;

তস্স বুদ্ধস্স দাযাদো, সম্পজানো পতিস্সতো;

ইদ্ধিবলেনুপত্থদ্ধো, কস্সপো অভিৰূহতি.

১০৬২. ‘‘পিণ্ডপাতপটিক্কন্তো, সেলমাৰুয্হ কস্সপো;

ঝাযতি অনুপাদানো, পহীনভযভেৰৱো.

১০৬৩. ‘‘পিণ্ডপাতপটিক্কন্তো, সেলমাৰুয্হ কস্সপো;

ঝাযতি অনুপাদানো, ডয্হমানেসু নিব্বুতো.

১০৬৪. ‘‘পিণ্ডপাতপটিক্কন্তো, সেলমাৰুয্হ কস্সপো;

ঝাযতি অনুপাদানো, কতকিচ্চো অনাসৱো.

১০৬৫. ‘‘কৰেৰিমালাৱিততা, ভূমিভাগা মনোৰমা;

কুঞ্জৰাভিৰুদা ৰম্মা, তে সেলা ৰমযন্তি মং.

১০৬৬. ‘‘নীলব্ভৱণ্ণা ৰুচিৰা, ৱাৰিসীতা সুচিন্ধৰা;

ইন্দগোপকসঞ্ছন্না, তে সেলা ৰমযন্তি মং.

১০৬৭. ‘‘নীলব্ভকূটসদিসা, কূটাগাৰৱৰূপমা;

ৱাৰণাভিৰুদা ৰম্মা, তে সেলা ৰমযন্তি মং.

১০৬৮. ‘‘অভিৱুট্ঠা ৰম্মতলা, নগা ইসিভি সেৱিতা;

অব্ভুন্নদিতা সিখীহি, তে সেলা ৰমযন্তি মং.

১০৬৯. ‘‘অলং ঝাযিতুকামস্স, পহিতত্তস্স মে সতো;

অলং মে অত্থকামস্স [অত্তকামস্স (?)], পহিতত্তস্স ভিক্খুনো.

১০৭০. ‘‘অলং মে ফাসুকামস্স, পহিতত্তস্স ভিক্খুনো;

অলং মে যোগকামস্স, পহিতত্তস্স তাদিনো.

১০৭১. ‘‘উমাপুপ্ফেন সমানা, গগনাৱব্ভছাদিতা;

নানাদিজগণাকিণ্ণা, তে সেলা ৰমযন্তি মং.

১০৭২. ‘‘অনাকিণ্ণা গহট্ঠেহি, মিগসঙ্ঘনিসেৱিতা;

নানাদিজগণাকিণ্ণা, তে সেলা ৰমযন্তি মং.

১০৭৩. ‘‘অচ্ছোদিকা পুথুসিলা, গোনঙ্গুলমিগাযুতা;

অম্বুসেৱালসঞ্ছন্না, তে সেলা ৰমযন্তি মং.

১০৭৪. ‘‘ন পঞ্চঙ্গিকেন তুৰিযেন, ৰতি মে হোতি তাদিসী;

যথা একগ্গচিত্তস্স, সম্মা ধম্মং ৱিপস্সতো.

১০৭৫. ‘‘কম্মং বহুকং ন কাৰযে, পৰিৱজ্জেয্য জনং ন উয্যমে;

উস্সুক্কো সো ৰসানুগিদ্ধো, অত্থং ৰিঞ্চতি যো সুখাৱহো.

১০৭৬. ‘‘কম্মং বহুকং ন কাৰযে, পৰিৱজ্জেয্য অনত্তনেয্যমেতং;

কিচ্ছতি কাযো কিলমতি, দুক্খিতো সো সমথং ন ৱিন্দতি.

১০৭৭. ‘‘ওট্ঠপ্পহতমত্তেন, অত্তানম্পি ন পস্সতি;

পত্থদ্ধগীৱো চৰতি, অহং সেয্যোতি মঞ্ঞতি.

১০৭৮. ‘‘অসেয্যো সেয্যসমানং, বালো মঞ্ঞতি অত্তানং;

ন তং ৱিঞ্ঞূ পসংসন্তি, পত্থদ্ধমানসং নৰং.

১০৭৯. ‘‘যো চ সেয্যোহমস্মীতি, নাহং সেয্যোতি ৱা পন;

হীনো তংসদিসো [তীনোহং সদিসো (স্যা.)] ৱাতি, ৱিধাসু ন ৱিকম্পতি.

১০৮০. ‘‘পঞ্ঞৱন্তং তথা তাদিং, সীলেসু সুসমাহিতং;

চেতোসমথমনুত্তং, তঞ্চে ৱিঞ্ঞূ পসংসৰে.

১০৮১. ‘‘যস্স সব্ৰহ্মচাৰীসু, গাৰৱো নূপলব্ভতি;

আৰকা হোতি সদ্ধম্মা, নভতো পুথৱী যথা.

১০৮২. ‘‘যেসঞ্চ হিৰি ওত্তপ্পং, সদা সম্মা উপট্ঠিতং;

ৱিৰূড়্হব্ৰহ্মচৰিযা তে, তেসং খীণা পুনব্ভৱা.

১০৮৩. ‘‘উদ্ধতো চপলো ভিক্খু, পংসুকূলেন পাৰুতো;

কপীৱ সীহচম্মেন, ন সো তেনুপসোভতি.

১০৮৪. ‘‘অনুদ্ধতো অচপলো, নিপকো সংৱুতিন্দ্ৰিযো;

সোভতি পংসুকূলেন, সীহোৱ গিৰিগব্ভৰে.

১০৮৫. ‘‘এতে সম্বহুলা দেৱা, ইদ্ধিমন্তো যসস্সিনো;

দসদেৱসহস্সানি, সব্বে তে ব্ৰহ্মকাযিকা.

১০৮৬. ‘‘ধম্মসেনাপতিং ৱীৰং, মহাঝাযিং সমাহিতং;

সাৰিপুত্তং নমস্সন্তা, তিট্ঠন্তি পঞ্জলীকতা.

১০৮৭. ‘‘‘নমো তে পুৰিসাজঞ্ঞ, নমো তে পুৰিসুত্তম;

যস্স তে নাভিজানাম, যম্পি নিস্সায ঝাযতি [ঝাযসি (ক. অট্ঠ.)].

১০৮৮. ‘‘‘অচ্ছেৰং ৱত বুদ্ধানং, গম্ভীৰো গোচৰো সকো;

যে মযং নাভিজানাম, ৱালৱেধিসমাগতা’.

১০৮৯. ‘‘তং তথা দেৱকাযেহি, পূজিতং পূজনাৰহং;

সাৰিপুত্তং তদা দিস্ৱা, কপ্পিনস্স সিতং অহু.

১০৯০. ‘‘যাৱতা বুদ্ধখেত্তম্হি, ঠপযিত্ৱা মহামুনিং;

ধুতগুণে ৱিসিট্ঠোহং, সদিসো মে ন ৱিজ্জতি.

১০৯১. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, নত্থি দানি পুনব্ভৱো.

১০৯২. ‘‘ন চীৱৰে ন সযনে, ভোজনে নুপলিম্পতি;

গোতমো অনপ্পমেয্যো, মুড়ালপুপ্ফং ৱিমলংৱ;

অম্বুনা নেক্খম্মনিন্নো, তিভৱাভিনিস্সটো.

১০৯৩. ‘‘সতিপট্ঠানগীৱো সো, সদ্ধাহত্থো মহামুনি;

পঞ্ঞাসীসো মহাঞাণী, সদা চৰতি নিব্বুতো’’তি.

… মহাকস্সপো থেৰো….

চত্তালীসনিপাতো নিট্ঠিতো.