১৭. তিংসনিপাতো

১. ফুস্সত্থেৰগাথা

৯৪৯. পাসাদিকে বহূ দিস্ৱা, ভাৱিতত্তে সুসংৱুতে;

ইসি পণ্ডৰসগোত্তো [পণ্ডৰস্স গোত্তো (সী.)], অপুচ্ছি ফুস্সসৱ্হযং.

৯৫০. ‘‘কিংছন্দা কিমধিপ্পাযা, কিমাকপ্পা ভৱিস্সৰে;

অনাগতম্হি কালম্হি, তং মে অক্খাহি পুচ্ছিতো’’.

৯৫১. ‘‘সুণোহি ৱচনং ময্হং, ইসিপণ্ডৰসৱ্হয;

সক্কচ্চং উপধাৰেহি, আচিক্খিস্সাম্যনাগতং.

৯৫২. ‘‘কোধনা উপনাহী চ, মক্খী থম্ভী সঠা বহূ;

উস্সুকী নানাৱাদা চ, ভৱিস্সন্তি অনাগতে.

৯৫৩. ‘‘অঞ্ঞাতমানিনো ধম্মে, গম্ভীৰে তীৰগোচৰা;

লহুকা অগৰু ধম্মে, অঞ্ঞমঞ্ঞমগাৰৱা.

৯৫৪. ‘‘বহূ আদীনৱা লোকে, উপ্পজ্জিস্সন্ত্যনাগতে;

সুদেসিতং ইমং ধম্মং, কিলেসেস্সন্তি [কিলেসিস্সন্তি (সী.), কিলিসিস্সন্তি (স্যা. ক.)] দুম্মতী.

৯৫৫. ‘‘গুণহীনাপি সঙ্ঘম্হি, ৱোহৰন্তা ৱিসাৰদা;

বলৱন্তো ভৱিস্সন্তি, মুখৰা অস্সুতাৱিনো.

৯৫৬. ‘‘গুণৱন্তোপি সঙ্ঘম্হি, ৱোহৰন্তা যথাত্থতো;

দুব্বলা তে ভৱিস্সন্তি, হিৰীমনা অনত্থিকা.

৯৫৭. ‘‘ৰজতং জাতৰূপঞ্চ, খেত্তং ৱত্থুমজেড়কং;

দাসিদাসঞ্চ দুম্মেধা, সাদিযিস্সন্ত্যনাগতে.

৯৫৮. ‘‘উজ্ঝানসঞ্ঞিনো বালা, সীলেসু অসমাহিতা;

উন্নড়া ৱিচৰিস্সন্তি, কলহাভিৰতা মগা.

৯৫৯. ‘‘উদ্ধতা চ ভৱিস্সন্তি, নীলচীৱৰপাৰুতা;

কুহা থদ্ধা লপা সিঙ্গী, চৰিস্সন্ত্যৰিযা ৱিয.

৯৬০. ‘‘তেলসণ্ঠেহি কেসেহি, চপলা অঞ্জনক্খিকা;

ৰথিযায গমিস্সন্তি, দন্তৱণ্ণিকপাৰুতা.

৯৬১. ‘‘অজেগুচ্ছং ৱিমুত্তেহি, সুৰত্তং অৰহদ্ধজং;

জিগুচ্ছিস্সন্তি কাসাৱং, ওদাতেসু সমুচ্ছিতা [ওদাতে সুসমুচ্ছিতা (সী.)].

৯৬২. ‘‘লাভকামা ভৱিস্সন্তি, কুসীতা হীনৱীৰিযা;

কিচ্ছন্তা ৱনপত্থানি, গামন্তেসু ৱসিস্সৰে.

৯৬৩. ‘‘যে যে লাভং লভিস্সন্তি, মিচ্ছাজীৱৰতা সদা;

তে তেৱ অনুসিক্খন্তা, ভজিস্সন্তি অসংযতা.

৯৬৪. ‘‘যে যে অলাভিনো লাভং, ন তে পুজ্জা ভৱিস্সৰে;

সুপেসলেপি তে ধীৰে, সেৱিস্সন্তি ন তে তদা.

৯৬৫. ‘‘মিলক্খুৰজনং ৰত্তং [পিলক্খৰজনং ৰত্তং (?)], গৰহন্তা সকং ধজং;

তিত্থিযানং ধজং কেচি, ধাৰিস্সন্ত্যৱদাতকং.

৯৬৬. ‘‘অগাৰৱো চ কাসাৱে, তদা তেসং ভৱিস্সতি;

পটিসঙ্খা চ কাসাৱে, ভিক্খূনং ন ভৱিস্সতি.

৯৬৭. ‘‘অভিভূতস্স দুক্খেন, সল্লৱিদ্ধস্স ৰুপ্পতো;

পটিসঙ্খা মহাঘোৰা, নাগস্সাসি অচিন্তিযা.

৯৬৮. ‘‘ছদ্দন্তো হি তদা দিস্ৱা, সুৰত্তং অৰহদ্ধজং;

তাৱদেৱ ভণী গাথা, গজো অত্থোপসংহিতা’’.

৯৬৯. [ধ. প. ৯; জা. ১.২.১৪১; ১.১৬.১২২] ‘‘অনিক্কসাৱো কাসাৱং, যো ৱত্থং পৰিধস্সতি [পৰিদহিস্সতি (সী. স্যা.)];

অপেতো দমসচ্চেন, ন সো কাসাৱমৰহতি.

৯৭০. ‘‘যো চ ৱন্তকাসাৱস্স, সীলেসু সুসমাহিতো;

উপেতো দমসচ্চেন, স ৱে কাসাৱমৰহতি.

৯৭১. ‘‘ৱিপন্নসীলো দুম্মেধো, পাকটো কামকাৰিযো;

ৱিব্ভন্তচিত্তো নিস্সুক্কো, ন সো কাসাৱমৰহতি.

৯৭২. ‘‘যো চ সীলেন সম্পন্নো, ৱীতৰাগো সমাহিতো;

ওদাতমনসঙ্কপ্পো, স ৱে কাসাৱমৰহতি.

৯৭৩. ‘‘উদ্ধতো উন্নড়ো বালো, সীলং যস্স ন ৱিজ্জতি;

ওদাতকং অৰহতি, কাসাৱং কিং কৰিস্সতি.

৯৭৪. ‘‘ভিক্খূ চ ভিক্খুনিযো চ, দুট্ঠচিত্তা অনাদৰা;

তাদীনং মেত্তচিত্তানং, নিগ্গণ্হিস্সন্ত্যনাগতে.

৯৭৫. ‘‘সিক্খাপেন্তাপি থেৰেহি, বালা চীৱৰধাৰণং;

ন সুণিস্সন্তি দুম্মেধা, পাকটা কামকাৰিযা.

৯৭৬. ‘‘তে তথা সিক্খিতা বালা, অঞ্ঞমঞ্ঞং অগাৰৱা;

নাদিযিস্সন্তুপজ্ঝাযে, খড়ুঙ্কো ৱিয সাৰথিং.

৯৭৭. ‘‘এৱং অনাগতদ্ধানং, পটিপত্তি ভৱিস্সতি;

ভিক্খূনং ভিক্খুনীনঞ্চ, পত্তে কালম্হি পচ্ছিমে.

৯৭৮. ‘‘পুৰা আগচ্ছতে এতং, অনাগতং মহব্ভযং;

সুব্বচা হোথ সখিলা, অঞ্ঞমঞ্ঞং সগাৰৱা.

৯৭৯. ‘‘মেত্তচিত্তা কাৰুণিকা, হোথ সীলেসু সংৱুতা;

আৰদ্ধৱীৰিযা পহিতত্তা, নিচ্চং দড়্হপৰক্কমা.

৯৮০. ‘‘পমাদং ভযতো দিস্ৱা, অপ্পমাদঞ্চ খেমতো;

ভাৱেথট্ঠঙ্গিকং মগ্গং, ফুসন্তা অমতং পদ’’ন্তি.

… ফুস্সো থেৰো….

২. সাৰিপুত্তত্থেৰগাথা

৯৮১. ‘‘যথাচাৰী যথাসতো সতীমা, যতসঙ্কপ্পজ্ঝাযি অপ্পমত্তো;

অজ্ঝত্তৰতো সমাহিতত্তো, একো সন্তুসিতো তমাহু ভিক্খুং.

৯৮২. ‘‘অল্লং সুক্খং ৱা ভুঞ্জন্তো, ন বাড়্হং সুহিতো সিযা;

ঊনূদৰো মিতাহাৰো, সতো ভিক্খু পৰিব্বজে.

৯৮৩. ‘‘চত্তাৰো পঞ্চ আলোপে, অভুত্ৱা উদকং পিৱে;

অলং ফাসুৱিহাৰায, পহিতত্তস্স ভিক্খুনো.

৯৮৪. ‘‘কপ্পিযং তং চে ছাদেতি, চীৱৰং ইদমত্থিকং [ইদমত্থিতং (সী.)];

অলং ফাসুৱিহাৰায, পহিতত্তস্স ভিক্খুনো.

৯৮৫. ‘‘পল্লঙ্কেন নিসিন্নস্স, জণ্ণুকে নাভিৱস্সতি;

অলং ফাসুৱিহাৰায, পহিতত্তস্স ভিক্খুনো.

৯৮৬. [সং. নি. ৪.২৫৩; ইতিৱু. ৫৩] ‘‘যো সুখং দুক্খতো অদ্দ, দুক্খমদ্দক্খি সল্লতো;

উভযন্তৰেন [উভযমন্তৰে (সী.)] নাহোসি, কেন লোকস্মি কিং সিযা.

৯৮৭. ‘‘মা মে কদাচি পাপিচ্ছো, কুসীতো হীনৱীৰিযো;

অপ্পস্সুতো অনাদৰো, কেন লোকস্মি কিং সিযা.

৯৮৮. ‘‘বহুস্সুতো চ মেধাৱী, সীলেসু সুসমাহিতো;

চেতোসমথমনুযুত্তো, অপি মুদ্ধনি তিট্ঠতু.

৯৮৯. ‘‘যো পপঞ্চমনুযুত্তো, পপঞ্চাভিৰতো মগো;

ৱিৰাধযী সো নিব্বানং, যোগক্খেমং অনুত্তৰং.

৯৯০. ‘‘যো চ পপঞ্চং হিত্ৱান, নিপ্পপঞ্চপথে ৰতো;

আৰাধযী সো নিব্বানং, যোগক্খেমং অনুত্তৰং.

৯৯১. [ধ. প. ৯৮] ‘‘গামে ৱা যদি ৱাৰঞ্ঞে, নিন্নে ৱা যদি ৱা থলে;

যত্থ অৰহন্তো ৱিহৰন্তি, তং ভূমিৰামণেয্যকং.

৯৯২. ‘‘ৰমণীযানি অৰঞ্ঞানি, যত্থ ন ৰমতী জনো;

ৱীতৰাগা ৰমিস্সন্তি, ন তে কামগৱেসিনো.

৯৯৩. [ধ. প. ৭৬] ‘‘নিধীনংৱ পৱত্তাৰং, যং পস্সে ৱজ্জদস্সিনং;

নিগ্গয্হৱাদিং মেধাৱিং, তাদিসং পণ্ডিতং ভজে;

তাদিসং ভজমানস্স, সেয্যো হোতি ন পাপিযো.

৯৯৪. [ধ. প. ৭৭] ‘‘ওৱদেয্যানুসাসেয্য, অসব্ভা চ নিৱাৰযে;

সতঞ্হি সো পিযো হোতি, অসতং হোতি অপ্পিযো.

৯৯৫. ‘‘অঞ্ঞস্স ভগৱা বুদ্ধো, ধম্মং দেসেসি চক্খুমা;

ধম্মে দেসিযমানম্হি, সোতমোধেসিমত্থিকো;

তং মে অমোঘং সৱনং, ৱিমুত্তোম্হি অনাসৱো.

৯৯৬. ‘‘নেৱ পুব্বেনিৱাসায, নপি দিব্বস্স চক্খুনো;

চেতোপৰিযায ইদ্ধিযা, চুতিযা উপপত্তিযা;

সোতধাতুৱিসুদ্ধিযা, পণিধী মে ন ৱিজ্জতি [কথা. ৩৭৮].

৯৯৭. ‘‘ৰুক্খমূলংৱ নিস্সায, মুণ্ডো সঙ্ঘাটিপাৰুতো;

পঞ্ঞায উত্তমো থেৰো, উপতিস্সোৱ [উপতিস্সো চ (সী. ক.)] ঝাযতি.

৯৯৮. ‘‘অৱিতক্কং সমাপন্নো, সম্মাসম্বুদ্ধসাৱকো;

অৰিযেন তুণ্হীভাৱেন, উপেতো হোতি তাৱদে.

৯৯৯. [উদা. ২৪] ‘‘যথাপি পব্বতো সেলো, অচলো সুপ্পতিট্ঠিতো;

এৱং মোহক্খযা ভিক্খু, পব্বতোৱ ন ৱেধতি.

১০০০. ‘‘অনঙ্গণস্স পোসস্স, নিচ্চং সুচিগৱেসিনো;

ৱালগ্গমত্তং পাপস্স, অব্ভমত্তংৱ খাযতি.

১০০১. ‘‘নাভিনন্দামি মৰণং, নাভিনন্দামি জীৱিতং;

নিক্খিপিস্সং ইমং কাযং, সম্পজানো পতিস্সতো.

১০০২. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, নিব্বিসং ভতকো যথা.

১০০৩. ‘‘উভযেন মিদং মৰণমেৱ, নামৰণং পচ্ছা ৱা পুৰে ৱা;

পটিপজ্জথ মা ৱিনস্সথ, খণো ৱো মা উপচ্চগা.

১০০৪. ‘‘নগৰং যথা পচ্চন্তং, গুত্তং সন্তৰবাহিৰং;

এৱং গোপেথ অত্তানং, খণো ৱো মা উপচ্চগা;

খণাতীতা হি সোচন্তি, নিৰযম্হি সমপ্পিতা.

১০০৫. ‘‘উপসন্তো উপৰতো, মন্তভাণী [মত্তভাণী (সী.)] অনুদ্ধতো;

ধুনাতি পাপকে ধম্মে, দুমপত্তংৱ মালুতো.

১০০৬. ‘‘উপসন্তো উপৰতো, মন্তভাণী অনুদ্ধতো;

অপ্পাসি [অব্বহি (স্যা.), অভাসি (?)] পাপকে ধম্মে, দুমপত্তংৱ মালুতো.

১০০৭. ‘‘উপসন্তো অনাযাসো, ৱিপ্পসন্নো অনাৱিলো;

কল্যাণসীলো মেধাৱী, দুক্খস্সন্তকৰো সিযা.

১০০৮. ‘‘ন ৱিস্সসে একতিযেসু এৱং, অগাৰিসু পব্বজিতেসু চাপি;

সাধূপি হুত্ৱা ন অসাধু হোন্তি, অসাধু হুত্ৱা পুন সাধু হোন্তি.

১০০৯. ‘‘কামচ্ছন্দো চ ব্যাপাদো, থিনমিদ্ধঞ্চ ভিক্খুনো;

উদ্ধচ্চং ৱিচিকিচ্ছা চ, পঞ্চেতে চিত্তকেলিসা.

১০১০. ‘‘যস্স সক্কৰিযমানস্স, অসক্কাৰেন চূভযং;

সমাধি ন ৱিকম্পতি, অপ্পমাদৱিহাৰিনো.

১০১১. ‘‘তং ঝাযিনং সাততিকং, সুখুমদিট্ঠিৱিপস্সকং;

উপাদানক্খযাৰামং, আহু সপ্পুৰিসো ইতি.

১০১২. ‘‘মহাসমুদ্দো পথৱী, পব্বতো অনিলোপি চ;

উপমায ন যুজ্জন্তি, সত্থু ৱৰৱিমুত্তিযা.

১০১৩. ‘‘চক্কানুৱত্তকো থেৰো, মহাঞাণী সমাহিতো;

পথৱাপগ্গিসমানো, ন ৰজ্জতি ন দুস্সতি.

১০১৪. ‘‘পঞ্ঞাপাৰমিতং পত্তো, মহাবুদ্ধি মহামতি;

অজড়ো জড়সমানো, সদা চৰতি নিব্বুতো.

১০১৫. ‘‘পৰিচিণ্ণো মযা সত্থা…পে… ভৱনেত্তি সমূহতা.

১০১৬. ‘‘সম্পাদেথপ্পমাদেন, এসা মে অনুসাসনী;

হন্দাহং পৰিনিব্বিস্সং, ৱিপ্পমুত্তোম্হি সব্বধী’’তি.

… সাৰিপুত্তো থেৰো….

৩. আনন্দত্থেৰগাথা

১০১৭. ‘‘পিসুণেন চ কোধনেন চ, মচ্ছৰিনা চ ৱিভূতনন্দিনা;

সখিতং ন কৰেয্য পণ্ডিতো, পাপো কাপুৰিসেন সঙ্গমো.

১০১৮. ‘‘সদ্ধেন চ পেসলেন চ, পঞ্ঞৱতা বহুস্সুতেন চ;

সখিতং কৰেয্য পণ্ডিতো, ভদ্দো সপ্পুৰিসেন সঙ্গমো.

১০১৯. ‘‘পস্স চিত্তকতং বিম্বং…পে… যস্স নত্থি ধুৱং ঠিতি.