৪. মেত্তগূমাণৱপুচ্ছা

১০৫৫. ‘‘পুচ্ছামি তং ভগৱা ব্ৰূহি মে তং, (ইচ্চাযস্মা মেত্তগূ)

মঞ্ঞামি তং ৱেদগুং ভাৱিতত্তং;

কুতো নু দুক্খা সমুদাগতা ইমে, যে কেচি লোকস্মিমনেকৰূপা’’.

১০৫৬. ‘‘দুক্খস্স ৱে মং পভৱং অপুচ্ছসি, (মেত্তগূতি ভগৱা)

তং তে পৱক্খামি যথা পজানং;

উপধিনিদানা পভৱন্তি দুক্খা, যে কেচি লোকস্মিমনেকৰূপা.

১০৫৭. ‘‘যো ৱে অৱিদ্ৱা উপধিং কৰোতি, পুনপ্পুনং দুক্খমুপেতি মন্দো;

তস্মা পজানং উপধিং ন কযিৰা, দুক্খস্স জাতিপ্পভৱানুপস্সী’’.

১০৫৮. ‘‘যং তং অপুচ্ছিম্হ অকিত্তযী নো, অঞ্ঞং তং পুচ্ছাম [পুচ্ছামি (সী. পী.)] তদিঙ্ঘ ব্ৰূহি;

কথং নু ধীৰা ৱিতৰন্তি ওঘং, জাতিং জৰং সোকপৰিদ্দৱঞ্চ;

তং মে মুনি সাধু ৱিযাকৰোহি, তথা হি তে ৱিদিতো এস ধম্মো’’.

১০৫৯. ‘‘কিত্তযিস্সামি তে ধম্মং, (মেত্তগূতি ভগৱা)

দিট্ঠে ধম্মে অনীতিহং;

যং ৱিদিত্ৱা সতো চৰং, তৰে লোকে ৱিসত্তিকং’’.

১০৬০. ‘‘তঞ্চাহং অভিনন্দামি, মহেসি ধম্মমুত্তমং;

যং ৱিদিত্ৱা সতো চৰং, তৰে লোকে ৱিসত্তিকং’’.

১০৬১. ‘‘যং কিঞ্চি সম্পজানাসি, (মেত্তগূতি ভগৱা)

উদ্ধং অধো তিৰিযঞ্চাপি মজ্ঝে;

এতেসু নন্দিঞ্চ নিৱেসনঞ্চ, পনুজ্জ ৱিঞ্ঞাণং ভৱে ন তিট্ঠে.

১০৬২. ‘‘এৱংৱিহাৰী সতো অপ্পমত্তো, ভিক্খু চৰং হিত্ৱা মমাযিতানি;

জাতিং জৰং সোকপৰিদ্দৱঞ্চ, ইধেৱ ৱিদ্ৱা পজহেয্য দুক্খং’’.

১০৬৩. ‘‘এতাভিনন্দামি ৱচো মহেসিনো, সুকিত্তিতং গোতমনূপধীকং;

অদ্ধা হি ভগৱা পহাসি দুক্খং, তথা হি তে ৱিদিতো এস ধম্মো.

১০৬৪. ‘‘তে চাপি নূনপ্পজহেয্যু দুক্খং, যে ত্ৱং মুনি অট্ঠিতং ওৱদেয্য;

তং তং নমস্সামি সমেচ্চ নাগ, অপ্পেৱ মং ভগৱা অট্ঠিতং ওৱদেয্য’’.

১০৬৫. ‘‘যং ব্ৰাহ্মণং ৱেদগুমাভিজঞ্ঞা, অকিঞ্চনং কামভৱে অসত্তং;

অদ্ধা হি সো ওঘমিমং অতাৰি, তিণ্ণো চ পাৰং অখিলো অকঙ্খো.

১০৬৬. ‘‘ৱিদ্ৱা চ যো [সো (সী. স্যা. পী.)] ৱেদগূ নৰো ইধ, ভৱাভৱে সঙ্গমিমং ৱিসজ্জ;

সো ৱীততণ্হো অনীঘো নিৰাসো, অতাৰি সো জাতিজৰন্তি ব্ৰূমী’’তি.

মেত্তগূমাণৱপুচ্ছা চতুত্থী নিট্ঠিতা.