৮. পসূৰসুত্তং

৮৩০. ইধেৱ সুদ্ধি ইতি ৱাদযন্তি [ৱিদিযন্তি (সী. পী.)], নাঞ্ঞেসু ধম্মেসু ৱিসুদ্ধিমাহু;

যং নিস্সিতা তত্থ সুভং ৱদানা, পচ্চেকসচ্চেসু পুথূ নিৱিট্ঠা.

৮৩১. তে ৱাদকামা পৰিসং ৱিগয্হ, বালং দহন্তী মিথু অঞ্ঞমঞ্ঞং;

ৱদন্তি তে অঞ্ঞসিতা কথোজ্জং, পসংসকামা কুসলা ৱদানা.

৮৩২. যুত্তো কথাযং পৰিসায মজ্ঝে, পসংসমিচ্ছং ৱিনিঘাতি হোতি;

অপাহতস্মিং পন মঙ্কু হোতি, নিন্দায সো কুপ্পতি ৰন্ধমেসী.

৮৩৩. যমস্স ৱাদং পৰিহীনমাহু, অপাহতং পঞ্হৱিমংসকাসে;

পৰিদেৱতি সোচতি হীনৱাদো, উপচ্চগা মন্তি অনুত্থুনাতি.

৮৩৪. এতে ৱিৱাদা সমণেসু জাতা, এতেসু উগ্ঘাতি নিঘাতি হোতি;

এতম্পি দিস্ৱা ৱিৰমে কথোজ্জং, ন হঞ্ঞদত্থত্থিপসংসলাভা.

৮৩৫. পসংসিতো ৱা পন তত্থ হোতি, অক্খায ৱাদং পৰিসায মজ্ঝে;

সো হস্সতী উণ্ণমতী [উন্নমতী (?)] চ তেন, পপ্পুয্য তমত্থং যথা মনো অহু.

৮৩৬. যা উণ্ণতী [উন্নতী (?)] সাস্স ৱিঘাতভূমি, মানাতিমানং ৱদতে পনেসো;

এতম্পি দিস্ৱা ন ৱিৱাদযেথ, ন হি তেন সুদ্ধিং কুসলা ৱদন্তি.

৮৩৭. সূৰো যথা ৰাজখাদায পুট্ঠো, অভিগজ্জমেতি পটিসূৰমিচ্ছং;

যেনেৱ সো তেন পলেহি সূৰ, পুব্বেৱ নত্থি যদিদং যুধায.

৮৩৮. যে দিট্ঠিমুগ্গয্হ ৱিৱাদযন্তি [ৱিৱাদিযন্তি (সী. পী.)], ইদমেৱ সচ্চন্তি চ ৱাদযন্তি;

তে ত্ৱং ৱদস্সূ ন হি তেধ অত্থি, ৱাদম্হি জাতে পটিসেনিকত্তা.

৮৩৯. ৱিসেনিকত্ৱা পন যে চৰন্তি, দিট্ঠীহি দিট্ঠিং অৱিৰুজ্ঝমানা;

তেসু ত্ৱং কিং লভেথো পসূৰ, যেসীধ নত্থী পৰমুগ্গহীতং.

৮৪০. অথ ত্ৱং পৱিতক্কমাগমা, মনসা দিট্ঠিগতানি চিন্তযন্তো;

ধোনেন যুগং সমাগমা, ন হি ত্ৱং সক্খসি সম্পযাতৱেতি.

পসূৰসুত্তং অট্ঠমং নিট্ঠিতং.