১৩. মহাব্যূহসুত্তং

৯০১. যে কেচিমে দিট্ঠিপৰিব্বসানা, ইদমেৱ সচ্চন্তি ৱিৱাদযন্তি [ৱিৱাদিযন্তি (সী. পী.)];

সব্বেৱ তে নিন্দমন্ৱানযন্তি, অথো পসংসম্পি লভন্তি তত্থ.

৯০২. অপ্পঞ্হি এতং ন অলং সমায, দুৱে ৱিৱাদস্স ফলানি ব্ৰূমি;

এতম্পি দিস্ৱা ন ৱিৱাদযেথ, খেমাভিপস্সং অৱিৱাদভূমিং.

৯০৩. যা কাচিমা সম্মুতিযো পুথুজ্জা, সব্বাৱ এতা ন উপেতি ৱিদ্ৱা;

অনূপযো সো উপযং কিমেয্য, দিট্ঠে সুতে খন্তিমকুব্বমানো.

৯০৪. সীলুত্তমা সঞ্ঞমেনাহু সুদ্ধিং, ৱতং সমাদায উপট্ঠিতাসে;

ইধেৱ সিক্খেম অথস্স সুদ্ধিং, ভৱূপনীতা কুসলা ৱদানা.

৯০৫. সচে চুতো সীলৱততো হোতি, পৱেধতী [স ৱেধতি (সী. পী.)] কম্ম ৱিৰাধযিত্ৱা;

পজপ্পতী পত্থযতী চ সুদ্ধিং, সত্থাৱ হীনো পৱসং ঘৰম্হা.

৯০৬. সীলব্বতং ৱাপি পহায সব্বং, কম্মঞ্চ সাৱজ্জনৱজ্জমেতং;

সুদ্ধিং অসুদ্ধিন্তি অপত্থযানো, ৱিৰতো চৰে সন্তিমনুগ্গহায.

৯০৭. তমূপনিস্সায জিগুচ্ছিতং ৱা, অথৱাপি দিট্ঠং ৱ সুতং মুতং ৱা;

উদ্ধংসৰা সুদ্ধিমনুত্থুনন্তি, অৱীততণ্হাসে ভৱাভৱেসু.

৯০৮. পত্থযমানস্স হি জপ্পিতানি, পৱেধিতং ৱাপি পকপ্পিতেসু;

চুতূপপাতো ইধ যস্স নত্থি, স কেন ৱেধেয্য কুহিংৱ জপ্পে [কুহিঞ্চি জপ্পে (সী. স্যা. ক.), কুহিং পজপ্পে (পী.) নিদ্দেসো পস্সিতব্বো].

৯০৯. যমাহু ধম্মং পৰমন্তি একে, তমেৱ হীনন্তি পনাহু অঞ্ঞে;

সচ্চো নু ৱাদো কতমো ইমেসং, সব্বেৱ হীমে কুসলা ৱদানা.

৯১০. সকঞ্হি ধম্মং পৰিপুণ্ণমাহু, অঞ্ঞস্স ধম্মং পন হীনমাহু;

এৱম্পি ৱিগ্গয্হ ৱিৱাদযন্তি, সকং সকং সম্মুতিমাহু সচ্চং.

৯১১. পৰস্স চে ৱম্ভযিতেন হীনো, ন কোচি ধম্মেসু ৱিসেসি অস্স;

পুথূ হি অঞ্ঞস্স ৱদন্তি ধম্মং, নিহীনতো সম্হি দড়্হং ৱদানা.

৯১২. সদ্ধম্মপূজাপি নেসং তথেৱ, যথা পসংসন্তি সকাযনানি;

সব্বেৱ ৱাদা [সব্বে পৱাদা (স্যা.)] তথিযা [তথিৱা (সব্বত্থ)] ভৱেয্যুং, সুদ্ধী হি নেসং পচ্চত্তমেৱ.

৯১৩. ন ব্ৰাহ্মণস্স পৰনেয্যমত্থি, ধম্মেসু নিচ্ছেয্য সমুগ্গহীতং;

তস্মা ৱিৱাদানি উপাতিৱত্তো, ন হি সেট্ঠতো পস্সতি ধম্মমঞ্ঞং.

৯১৪. জানামি পস্সামি তথেৱ এতং, দিট্ঠিযা একে পচ্চেন্তি সুদ্ধিং;

অদ্দক্খি চে কিঞ্হি তুমস্স তেন, অতিসিত্ৱা অঞ্ঞেন ৱদন্তি সুদ্ধিং.

৯১৫. পস্সং নৰো দক্খতি [দক্খিতি (সী.)] নামৰূপং, দিস্ৱান ৱা ঞস্সতি তানিমেৱ;

কামং বহুং পস্সতু অপ্পকং ৱা, ন হি তেন সুদ্ধিং কুসলা ৱদন্তি.

৯১৬. নিৱিস্সৱাদী ন হি সুব্বিনাযো, পকপ্পিতং দিট্ঠি পুৰেক্খৰানো;

যং নিস্সিতো তত্থ সুভং ৱদানো, সুদ্ধিংৱদো তত্থ তথদ্দসা সো.

৯১৭. ন ব্ৰাহ্মণো কপ্পমুপেতি সঙ্খা [সঙ্খং (সী. স্যা. পী.)], ন দিট্ঠিসাৰী নপি ঞাণবন্ধু;

ঞত্ৱা চ সো সম্মুতিযো [সম্মতিযো (স্যা.)] পুথুজ্জা, উপেক্খতী উগ্গহণন্তি মঞ্ঞে.

৯১৮. ৱিস্সজ্জ গন্থানি মুনীধ লোকে, ৱিৱাদজাতেসু ন ৱগ্গসাৰী;

সন্তো অসন্তেসু উপেক্খকো সো, অনুগ্গহো উগ্গহণন্তি মঞ্ঞে.

৯১৯. পুব্বাসৱে হিত্ৱা নৱে অকুব্বং, ন ছন্দগূ নোপি নিৱিস্সৱাদী;

স ৱিপ্পমুত্তো দিট্ঠিগতেহি ধীৰো, ন লিম্পতি [ন লিপ্পতি (সী. পী.)] লোকে অনত্তগৰহী.

৯২০. স সব্বধম্মেসু ৱিসেনিভূতো, যং কিঞ্চি দিট্ঠং ৱ সুতং মুতং ৱা;

স পন্নভাৰো মুনি ৱিপ্পমুত্তো, ন কপ্পিযো নূপৰতো ন পত্থিযোতি.

মহাব্যূহসুত্তং তেৰসমং নিট্ঠিতং.