১২. চূড়ব্যূহসুত্তং [চূড়ৱিযূহসুত্তং (সী. স্যা. নিদ্দেস)]

৮৮৪. সকংসকংদিট্ঠিপৰিব্বসানা, ৱিগ্গয্হ নানা কুসলা ৱদন্তি;

যো এৱং জানাতি স ৱেদি ধম্মং, ইদং পটিক্কোসমকেৱলী সো.

৮৮৫. এৱম্পি ৱিগ্গয্হ ৱিৱাদযন্তি, বালো পৰো অক্কুসলোতি [অকুসলোতি (সী. স্যা. পী.)] চাহু;

সচ্চো নু ৱাদো কতমো ইমেসং, সব্বেৱ হীমে কুসলা ৱদানা.

৮৮৬. পৰস্স চে ধম্মমনানুজানং, বালোমকো [বালো মগো (সী. স্যা. ক.)] হোতি নিহীনপঞ্ঞো;

সব্বেৱ বালা সুনিহীনপঞ্ঞা, সব্বেৱিমে দিট্ঠিপৰিব্বসানা.

৮৮৭. সন্দিট্ঠিযা চেৱ ন ৱীৱদাতা, সংসুদ্ধপঞ্ঞা কুসলা মুতীমা;

ন তেসং কোচি পৰিহীনপঞ্ঞো [কোচিপি নিহীনপঞ্ঞো (সী. স্যা. ক.)], দিট্ঠী হি তেসম্পি তথা সমত্তা.

৮৮৮. ন ৱাহমেতং তথিযন্তি [তথিৱন্তি (স্যা. ক.)] ব্ৰূমি, যমাহু বালা মিথু অঞ্ঞমঞ্ঞং;

সকংসকংদিট্ঠিমকংসু সচ্চং, তস্মা হি বালোতি পৰং দহন্তি.

৮৮৯. যমাহু সচ্চং তথিযন্তি একে, তমাহু অঞ্ঞে [অঞ্ঞেপি (স্যা.), অঞ্ঞে চ (?)] তুচ্ছং মুসাতি;

এৱম্পি ৱিগয্হ ৱিৱাদযন্তি, কস্মা ন একং সমণা ৱদন্তি.

৮৯০. একঞ্হি সচ্চং ন দুতীযমত্থি, যস্মিং পজা নো ৱিৱদে পজানং;

নানা তে [নানাতো (ক.)] সচ্চানি সযং থুনন্তি, তস্মা ন একং সমণা ৱদন্তি.

৮৯১. কস্মা নু সচ্চানি ৱদন্তি নানা, পৱাদিযাসে কুসলা ৱদানা;

সচ্চানি সুতানি বহূনি নানা, উদাহু তে তক্কমনুস্সৰন্তি.

৮৯২. ন হেৱ সচ্চানি বহূনি নানা, অঞ্ঞত্ৰ সঞ্ঞায নিচ্চানি লোকে;

তক্কঞ্চ দিট্ঠীসু পকপ্পযিত্ৱা, সচ্চং মুসাতি দ্ৱযধম্মমাহু.

৮৯৩. দিট্ঠে সুতে সীলৱতে মুতে ৱা, এতে চ নিস্সায ৱিমানদস্সী;

ৱিনিচ্ছযে ঠত্ৱা পহস্সমানো, বালো পৰো অক্কুসলোতি চাহ.

৮৯৪. যেনেৱ বালোতি পৰং দহাতি, তেনাতুমানং কুসলোতি চাহ;

সযমত্তনা সো কুসলো ৱদানো, অঞ্ঞং ৱিমানেতি তদেৱ পাৱ.

৮৯৫. অতিসাৰদিট্ঠিযাৱ সো সমত্তো, মানেন মত্তো পৰিপুণ্ণমানী;

সযমেৱ সামং মনসাভিসিত্তো, দিট্ঠী হি সা তস্স তথা সমত্তা.

৮৯৬. পৰস্স চে হি ৱচসা নিহীনো, তুমো সহা হোতি নিহীনপঞ্ঞো;

অথ চে সযং ৱেদগূ হোতি ধীৰো, ন কোচি বালো সমণেসু অত্থি.

৮৯৭. অঞ্ঞং ইতো যাভিৱদন্তি ধম্মং, অপৰদ্ধা সুদ্ধিমকেৱলী তে [সুদ্ধিমকেৱলীনো (সী.)];

এৱম্পি তিত্থ্যা পুথুসো ৱদন্তি, সন্দিট্ঠিৰাগেন হি তেভিৰত্তা [ত্যাভিৰত্তা (স্যা. ক.)].

৮৯৮. ইধেৱ সুদ্ধি ইতি ৱাদযন্তি, নাঞ্ঞেসু ধম্মেসু ৱিসুদ্ধিমাহু;

এৱম্পি তিত্থ্যা পুথুসো নিৱিট্ঠা, সকাযনে তত্থ দড়্হং ৱদানা.

৮৯৯. সকাযনে ৱাপি দড়্হং ৱদানো, কমেত্থ বালোতি পৰং দহেয্য;

সযমেৱ সো মেধগমাৱহেয্য [মেধকং আৱহেয্য (সী. পী.)], পৰং ৱদং বালমসুদ্ধিধম্মং.

৯০০. ৱিনিচ্ছযে ঠত্ৱা সযং পমায, উদ্ধং স [উদ্দং সো (সী. স্যা. পী.)] লোকস্মিং ৱিৱাদমেতি;

হিত্ৱান সব্বানি ৱিনিচ্ছযানি, ন মেধগং কুব্বতি জন্তু লোকেতি.

চূড়ব্যূহসুত্তং দ্ৱাদসমং নিট্ঠিতং.