৬. সভিযসুত্তং

এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন সভিযস্স পৰিব্বাজকস্স পুৰাণসালোহিতায দেৱতায পঞ্হা উদ্দিট্ঠা হোন্তি – ‘‘যো তে, সভিয, সমণো ৱা ব্ৰাহ্মণো ৱা ইমে পঞ্হে পুট্ঠো ব্যাকৰোতি তস্স সন্তিকে ব্ৰহ্মচৰিযং চৰেয্যাসী’’তি.

অথ খো সভিযো পৰিব্বাজকো তস্সা দেৱতায সন্তিকে তে পঞ্হে উগ্গহেত্ৱা যে তে সমণব্ৰাহ্মণা সঙ্ঘিনো গণিনো গণাচৰিযা ঞাতা যসস্সিনো তিত্থকৰা সাধুসম্মতা বহুজনস্স, সেয্যথিদং – পূৰণো কস্সপো মক্খলিগোসালো অজিতো কেসকম্বলো পকুধো [ককুধো (সী.) পকুদ্ধো (স্যা. কং.)] কচ্চানো সঞ্চযো [সঞ্জযো (সী. স্যা. কং. পী.)] বেলট্ঠপুত্তো [বেল্লট্ঠিপুত্তো (সী. পী.), ৱেড়ট্ঠপুত্তো (স্যা.)] নিগণ্ঠো নাটপুত্তো [নাতপুত্তো (সী. পী.)], তে উপসঙ্কমিত্ৱা তে পঞ্হে পুচ্ছতি. তে সভিযেন পৰিব্বাজকেন পঞ্হে পুট্ঠা ন সম্পাযন্তি; অসম্পাযন্তা কোপঞ্চ দোসঞ্চ অপ্পচ্চযঞ্চ পাতুকৰোন্তি. অপি চ সভিযং যেৱ পৰিব্বাজকং পটিপুচ্ছন্তি.

অথ খো সভিযস্স পৰিব্বাজকস্স এতদহোসি – ‘‘যে খো তে ভোন্তো সমণব্ৰাহ্মণা সঙ্ঘিনো গণিনো গণাচৰিযা ঞাতা যসস্সিনো তিত্থকৰা সাধুসম্মতা বহুজনস্স, সেয্যথিদং – পূৰণো কস্সপো…পে… নিগণ্ঠো নাটপুত্তো, তে মযা পঞ্হে পুট্ঠা ন সম্পাযন্তি, অসম্পাযন্তা কোপঞ্চ দোসঞ্চ অপ্পচ্চযঞ্চ পাতুকৰোন্তি; অপি চ মঞ্ঞেৱেত্থ পটিপুচ্ছন্তি. যন্নূন্নাহং হীনাযাৱত্তিত্ৱা কামে পৰিভুঞ্জেয্য’’ন্তি.

অথ খো সভিযস্স পৰিব্বাজকস্স এতদহোসি – ‘‘অযম্পি খো সমণো গোতমো সঙ্ঘী চেৱ গণী চ গণাচৰিযো চ ঞাতো যসস্সী তিত্থকৰো সাধুসম্মতো বহুজনস্স; যংনূনাহং সমণং গোতমং উপসঙ্কমিত্ৱা ইমে পঞ্হে পুচ্ছেয্য’’ন্তি.

অথ খো সভিযস্স পৰিব্বাজকস্স এতদহোসি – ‘‘যেপি খো তে [যে খো তে (স্যা.), যং খো তে (ক.)] ভোন্তো সমণব্ৰাহ্মণা জিণ্ণা ৱুড্ঢা মহল্লকা অদ্ধগতা ৱযোঅনুপ্পত্তা থেৰা ৰত্তঞ্ঞূ চিৰপব্বজিতা সঙ্ঘিনো গণিনো গণাচৰিযা ঞাতা যসস্সিনো তিত্থকৰা সাধুসম্মতা বহুজনস্স, সেয্যথিদং – পূৰণো কস্সপো…পে. … নিগণ্ঠো নাটপুত্তো, তেপি মযা পঞ্হে পুট্ঠা ন সম্পাযন্তি, অসম্পাযন্তা কোপঞ্চ দোসঞ্চ অপ্পচ্চযঞ্চ পাতুকৰোন্তি, অপি চ মঞ্ঞেৱেত্থ পটিপুচ্ছন্তি; কিং পন মে সমণো গোতমো ইমে পঞ্হে পুট্ঠো ব্যাকৰিস্সতি! সমণো হি গোতমো দহৰো চেৱ জাতিযা, নৱো চ পব্বজ্জাযা’’তি.

অথ খো সভিযস্স পৰিব্বাজকস্স এতদহোসি – ‘‘সমণো খো [সমণো খো গোতমো (স্যা. ক.)] দহৰোতি ন উঞ্ঞাতব্বো ন পৰিভোতব্বো. দহৰোপি চেস সমণো গোতমো মহিদ্ধিকো হোতি মহানুভাৱো, যংনূনাহং সমণং গোতমং উপসঙ্কমিত্ৱা ইমে পঞ্হে পুচ্ছেয্য’’ন্তি.

অথ খো সভিযো পৰিব্বাজকো যেন ৰাজগহং তেন চাৰিকং পক্কামি. অনুপুব্বেন চাৰিকং চৰমানো যেন ৰাজগহং ৱেড়ুৱনং কলন্দকনিৱাপো, যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো সভিযো পৰিব্বাজকো ভগৱন্তং গাথায অজ্ঝভাসি –

৫১৫. ‘‘কঙ্খী ৱেচিকিচ্ছী আগমং, (ইতি সভিযো)

পঞ্হে পুচ্ছিতুং অভিকঙ্খমানো;

তেসন্তকৰো ভৱাহি [ভৱাহি মে (পী. ক.)] পঞ্হে মে পুট্ঠো,

অনুপুব্বং অনুধম্মং ব্যাকৰোহি মে’’.

৫১৬. ‘‘দূৰতো আগতোসি সভিয, (ইতি ভগৱা)

পঞ্হে পুচ্ছিতুং অভিকঙ্খমানো;

তেসন্তকৰো ভৱামি [তেসমন্তকৰোমি তে (ক.)] পঞ্হে তে পুট্ঠো,

অনুপুব্বং অনুধম্মং ব্যাকৰোমি তে.

৫১৭. ‘‘পুচ্ছ মং সভিয পঞ্হং, যং কিঞ্চি মনসিচ্ছসি;

তস্স তস্সেৱ পঞ্হস্স, অহং অন্তং কৰোমি তে’’তি.

অথ খো সভিযস্স পৰিব্বাজকস্স এতদহোসি – ‘‘অচ্ছৰিযং ৱত, ভো, অব্ভুতং ৱত, ভো! যং ৱতাহং অঞ্ঞেসু সমণব্ৰাহ্মণেসু ওকাসকম্মমত্তম্পি [ওকাসমত্তম্পি (সী. পী.)] নালত্থং তং মে ইদং সমণেন গোতমেন ওকাসকম্মং কত’’ন্তি. অত্তমনো পমুদিতো উদগ্গো পীতিসোমনস্সজাতো ভগৱন্তং পঞ্হং অপুচ্ছি –

৫১৮. ‘‘কিং পত্তিনমাহু ভিক্খুনং, (ইতি সভিযো)

সোৰতং কেন কথঞ্চ দন্তমাহু;

বুদ্ধোতি কথং পৱুচ্চতি,

পুট্ঠো মে ভগৱা ব্যাকৰোহি’’.

৫১৯. ‘‘পজ্জেন কতেন অত্তনা, (সভিযাতি ভগৱা)

পৰিনিব্বানগতো ৱিতিণ্ণকঙ্খো;

ৱিভৱঞ্চ ভৱঞ্চ ৱিপ্পহায,

ৱুসিতৱা খীণপুনব্ভৱো স ভিক্খু.

৫২০. ‘‘সব্বত্থ উপেক্খকো সতিমা, ন সো হিংসতি কঞ্চি সব্বলোকে;

তিণ্ণো সমণো অনাৱিলো, উস্সদা যস্স ন সন্তি সোৰতো সো.

৫২১. ‘‘যস্সিন্দ্ৰিযানি ভাৱিতানি, অজ্ঝত্তং বহিদ্ধা চ সব্বলোকে;

নিব্বিজ্ঝ ইমং পৰঞ্চ লোকং, কালং কঙ্খতি ভাৱিতো স দন্তো.

৫২২. ‘‘কপ্পানি ৱিচেয্য কেৱলানি, সংসাৰং দুভযং চুতূপপাতং;

ৱিগতৰজমনঙ্গণং ৱিসুদ্ধং, পত্তং জাতিখযং তমাহু বুদ্ধ’’ন্তি.

অথ খো সভিযো পৰিব্বাজকো ভগৱতো ভাসিতং অভিনন্দিত্ৱা অনুমোদিত্ৱা অত্তমনো পমুদিতো উদগ্গো পীতিসোমনস্সজাতো ভগৱন্তং উত্তৰিং [উত্তৰি (ক.)] পঞ্হং অপুচ্ছি –

৫২৩. ‘‘কিং পত্তিনমাহু ব্ৰাহ্মণং, (ইতি সভিযো)

সমণং কেন কথঞ্চ ন্হাতকোতি;

নাগোতি কথং পৱুচ্চতি,

পুট্ঠো মে ভগৱা ব্যাকৰোহি’’.

৫২৪. ‘‘বাহিত্ৱা সব্বপাপকানি, (সভিযাতি ভগৱা)

ৱিমলো সাধুসমাহিতো ঠিতত্তো;

সংসাৰমতিচ্চ কেৱলী সো,

অসিতো তাদি পৱুচ্চতে স ব্ৰহ্মা.

৫২৫. ‘‘সমিতাৱি পহায পুঞ্ঞপাপং, ৱিৰজো ঞত্ৱা ইমং পৰঞ্চ লোকং;

জাতিমৰণং উপাতিৱত্তো, সমণো তাদি পৱুচ্চতে তথত্তা.

৫২৬. ‘‘নিন্হায [নিনহায (স্যা.)] সব্বপাপকানি, অজ্ঝত্তং বহিদ্ধা চ সব্বলোকে;

দেৱমনুস্সেসু কপ্পিযেসু, কপ্পং নেতি তমাহু ন্হাতকো’’তি.

৫২৭. ‘‘আগুং ন কৰোতি কিঞ্চি লোকে, সব্বসংযোগে [সব্বযোগে (ক.)] ৱিসজ্জ বন্ধনানি;

সব্বত্থ ন সজ্জতী ৱিমুত্তো, নাগো তাদি পৱুচ্চতে তথত্তা’’তি.

অথ খো সভিযো পৰিব্বাজকো…পে… ভগৱন্তং উত্তৰিং পঞ্হং অপুচ্ছি –

৫২৮. ‘‘কং খেত্তজিনং ৱদন্তি বুদ্ধা, (ইতি সভিযো)

কুসলং কেন কথঞ্চ পণ্ডিতোতি;

মুনি নাম কথং পৱুচ্চতি,

পুট্ঠো মে ভগৱা ব্যাকৰোহি’’.

৫২৯. ‘‘খেত্তানি ৱিচেয্য কেৱলানি, (সভিযাতি ভগৱা)

দিব্বং মানুসকঞ্চ ব্ৰহ্মখেত্তং;

সব্বখেত্তমূলবন্ধনা পমুত্তো,

খেত্তজিনো তাদি পৱুচ্চতে তথত্তা.

৫৩০. ‘‘কোসানি ৱিচেয্য কেৱলানি, দিব্বং মানুসকঞ্চ ব্ৰহ্মকোসং;

সব্বকোসমূলবন্ধনা পমুত্তো, কুসলো তাদি পৱুচ্চতে তথত্তা.

৫৩১. ‘‘দুভযানি ৱিচেয্য পণ্ডৰানি, অজ্ঝত্তং বহিদ্ধা চ সুদ্ধিপঞ্ঞো;

কণ্হং সুক্কং উপাতিৱত্তো, পণ্ডিতো তাদি পৱুচ্চতে তথত্তা.

৫৩২. ‘‘অসতঞ্চ সতঞ্চ ঞত্ৱা ধম্মং, অজ্ঝত্তং বহিদ্ধা চ সব্বলোকে;

দেৱমনুস্সেহি পূজনীযো, সঙ্গং জালমতিচ্চ সো মুনী’’তি.

অথ খো সভিযো পৰিব্বাজকো…পে… ভগৱন্তং উত্তৰিং পঞ্হং অপুচ্ছি –

৫৩৩. ‘‘কিং পত্তিনমাহু ৱেদগুং, (ইতি সভিযো)

অনুৱিদিতং কেন কথঞ্চ ৱীৰিযৱাতি;

আজানিযো কিন্তি নাম হোতি,

পুট্ঠো মে ভগৱা ব্যাকৰোহি’’.

৫৩৪. ‘‘ৱেদানি ৱিচেয্য কেৱলানি, (সভিযাতি ভগৱা)

সমণানং যানিধত্থি [যানিপত্থি (সী. স্যা. পী.)] ব্ৰাহ্মণানং;

সব্বৱেদনাসু ৱীতৰাগো,

সব্বং ৱেদমতিচ্চ ৱেদগূ সো.

৫৩৫. ‘‘অনুৱিচ্চ পপঞ্চনামৰূপং, অজ্ঝত্তং বহিদ্ধা চ ৰোগমূলং;

সব্বৰোগমূলবন্ধনা পমুত্তো, অনুৱিদিতো তাদি পৱুচ্চতে তথত্তা.

৫৩৬. ‘‘ৱিৰতো ইধ সব্বপাপকেহি, নিৰযদুক্খং অতিচ্চ ৱীৰিযৱা সো;

সো ৱীৰিযৱা পধানৱা, ধীৰো তাদি পৱুচ্চতে তথত্তা.

৫৩৭. ‘‘যস্সস্সু লুনানি বন্ধনানি, অজ্ঝত্তং বহিদ্ধা চ সঙ্গমূলং;

সব্বসঙ্গমূলবন্ধনা পমুত্তো, আজানিযো তাদি পৱুচ্চতে তথত্তা’’তি.

অথ খো সভিযো পৰিব্বাজকো…পে… ভগৱন্তং উত্তৰিং পঞ্হং অপুচ্ছি –

৫৩৮. ‘‘কিং পত্তিনমাহু সোত্তিযং, (ইতি সভিযো)

অৰিযং কেন কথঞ্চ চৰণৱাতি;

পৰিব্বাজকো কিন্তি নাম হোতি,

পুট্ঠো মে ভগৱা ব্যাকৰোহি’’.

৫৩৯. ‘‘সুত্ৱা সব্বধম্মং অভিঞ্ঞায লোকে, (সভিযাতি ভগৱা)

সাৱজ্জানৱজ্জং যদত্থি কিঞ্চি;

অভিভুং অকথংকথিং ৱিমুত্তং,

অনিঘং সব্বধিমাহু সোত্তিযোতি.

৫৪০. ‘‘ছেত্ৱা আসৱানি আলযানি, ৱিদ্ৱা সো ন উপেতি গব্ভসেয্যং;

সঞ্ঞং তিৱিধং পনুজ্জ পঙ্কং, কপ্পং নেতি তমাহু অৰিযোতি.

৫৪১. ‘‘যো ইধ চৰণেসু পত্তিপত্তো, কুসলো সব্বদা আজানাতি [আজানি (স্যা.)] ধম্মং;

সব্বত্থ ন সজ্জতি ৱিমুত্তচিত্তো [ৱিমুত্তো (সী.)], পটিঘা যস্স ন সন্তি চৰণৱা সো.

৫৪২. ‘‘দুক্খৱেপক্কং যদত্থি কম্মং, উদ্ধমধো তিৰিযং ৱাপি [তিৰিযঞ্চাপি (স্যা.)] মজ্ঝে;

পৰিব্বাজযিত্ৱা পৰিঞ্ঞচাৰী, মাযং মানমথোপি লোভকোধং;

পৰিযন্তমকাসি নামৰূপং, তং পৰিব্বাজকমাহু পত্তিপত্ত’’ন্তি.

অথ খো সভিযো পৰিব্বাজকো ভগৱতো ভাসিতং অভিনন্দিত্ৱা অনুমোদিত্ৱা অত্তমনো পমুদিতো উদগ্গো পীতিসোমনস্সজাতো উট্ঠাযাসনা একংসং উত্তৰাসঙ্গং কৰিত্ৱা যেন ভগৱা তেনঞ্জলিং পণামেত্ৱা ভগৱন্তং সম্মুখা সাৰুপ্পাহি গাথাহি অভিত্থৱি –

৫৪৩. ‘‘যানি চ তীণি যানি চ সট্ঠি, সমণপ্পৱাদসিতানি [সমণপ্পৱাদনিস্সিতানি (স্যা. ক.)] ভূৰিপঞ্ঞ;

সঞ্ঞক্খৰসঞ্ঞনিস্সিতানি, ওসৰণানি ৱিনেয্য ওঘতমগা.

৫৪৪. ‘‘অন্তগূসি পাৰগূ [পাৰগূসি (স্যা. পী. ক.)] দুক্খস্স, অৰহাসি সম্মাসম্বুদ্ধো খীণাসৱং তং মঞ্ঞে;

জুতিমা মুতিমা পহূতপঞ্ঞো, দুক্খস্সন্তকৰং অতাৰেসি মং.

৫৪৫. ‘‘যং মে কঙ্খিতমঞ্ঞাসি, ৱিচিকিচ্ছা মং তাৰযি নমো তে;

মুনি মোনপথেসু পত্তিপত্ত, অখিল আদিচ্চবন্ধু সোৰতোসি.

৫৪৬. ‘‘যা মে কঙ্খা পুৰে আসি, তং মে ব্যাকাসি চক্খুমা;

অদ্ধা মুনীসি সম্বুদ্ধো, নত্থি নীৱৰণা তৱ.

৫৪৭. ‘‘উপাযাসা চ তে সব্বে, ৱিদ্ধস্তা ৱিনড়ীকতা;

সীতিভূতো দমপ্পত্তো, ধিতিমা সচ্চনিক্কমো.

৫৪৮. ‘‘তস্স তে নাগনাগস্স, মহাৱীৰস্স ভাসতো;

সব্বে দেৱানুমোদন্তি, উভো নাৰদপব্বতা.

৫৪৯. ‘‘নমো তে পুৰিসাজঞ্ঞ, নমো তে পুৰিসুত্তম;

সদেৱকস্মিং লোকস্মিং, নত্থি তে পটিপুগ্গলো.

৫৫০. ‘‘তুৱং বুদ্ধো তুৱং সত্থা, তুৱং মাৰাভিভূ মুনি;

তুৱং অনুসযে ছেত্ৱা, তিণ্ণো তাৰেসি মং পজং.

৫৫১. ‘‘উপধী তে সমতিক্কন্তা, আসৱা তে পদালিতা;

সীহোসি অনুপাদানো, পহীনভযভেৰৱো.

৫৫২. ‘‘পুণ্ডৰীকং যথা ৱগ্গু, তোযে ন উপলিম্পতি [তোযেন ন উপলিপ্পতি (সী.), তোযে ন উপলিপ্পতি (পী.), তোযেন ন উপলিম্পতি (ক.)];

এৱং পুঞ্ঞে চ পাপে চ, উভযে ত্ৱং ন লিম্পসি;

পাদে ৱীৰ পসাৰেহি, সভিযো ৱন্দতি সত্থুনো’’তি.

অথ খো সভিযো পৰিব্বাজকো ভগৱতো পাদেসু সিৰসা নিপতিত্ৱা ভগৱন্তং এতদৱোচ – ‘‘অভিক্কন্তং, ভন্তে…পে… এসাহং ভগৱন্তং সৰণং গচ্ছামি ধম্মঞ্চ ভিক্খুসঙ্ঘঞ্চ; লভেয্যাহং, ভন্তে, ভগৱতো সন্তিকে পব্বজ্জং, লভেয্যং উপসম্পদ’’ন্তি.

‘‘যো খো, সভিয, অঞ্ঞতিত্থিযপুব্বো ইমস্মিং ধম্মৱিনযে আকঙ্খতি পব্বজ্জং, আকঙ্খতি উপসম্পদং, সো চত্তাৰো মাসে পৰিৱসতি; চতুন্নং মাসানং অচ্চযেন আৰদ্ধচিত্তা ভিক্খূ পব্বাজেন্তি, উপসম্পাদেন্তি ভিক্খুভাৱায. অপি চ মেত্থ পুগ্গলৱেমত্ততা ৱিদিতা’’তি.

‘‘সচে, ভন্তে, অঞ্ঞতিত্থিযপুব্বা ইমস্মিং ধম্মৱিনযে আকঙ্খন্তা পব্বজ্জং, আকঙ্খন্তা উপসম্পদং চত্তাৰো মাসে পৰিৱসন্তি, চতুন্নং মাসানং অচ্চযেন আৰদ্ধচিত্তা ভিক্খূ পব্বাজেন্তি, উপসম্পাদেন্তি ভিক্খুভাৱায, অহং চত্তাৰি ৱস্সানি পৰিৱসিস্সামি; চতুন্নং ৱস্সানং অচ্চযেন আৰদ্ধচিত্তা ভিক্খূ পব্বাজেন্তু উপসম্পাদেন্তু ভিক্খুভাৱাযা’’তি. অলত্থ খো সভিযো পৰিব্বাজকো ভগৱতো সন্তিকে পব্বজ্জং অলত্থ উপসম্পদং…পে… অঞ্ঞতৰো খো পনাযস্মা সভিযো অৰহতং অহোসীতি.

সভিযসুত্তং ছট্ঠং নিট্ঠিতং.