৫. মাঘসুত্তং

এৱং মে সুতং – এক সমযং ভগৱা ৰাজগহে ৱিহৰতি গিজ্ঝকূটে পব্বতে. অথ খো মাঘো মাণৱো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো মাঘো মাণৱো ভগৱন্তং এতদৱোচ –

‘‘অহঞ্হি, ভো গোতম, দাযকো দানপতি ৱদঞ্ঞূ যাচযোগো; ধম্মেন ভোগে পৰিযেসামি; ধম্মেন ভোগে পৰিযেসিত্ৱা ধম্মলদ্ধেহি ভোগেহি ধম্মাধিগতেহি একস্সপি দদামি দ্ৱিন্নম্পি তিণ্ণম্পি চতুন্নম্পি পঞ্চন্নম্পি ছন্নম্পি সত্তন্নম্পি অট্ঠন্নম্পি নৱন্নম্পি দসন্নম্পি দদামি, ৱীসাযপি তিংসাযপি চত্তালীসাযপি পঞ্ঞাসাযপি দদামি, সতস্সপি দদামি, ভিয্যোপি দদামি. কচ্চাহং, ভো গোতম, এৱং দদন্তো এৱং যজন্তো বহুং পুঞ্ঞং পসৱামী’’তি?

‘‘তগ্ঘ ত্ৱং, মাণৱ, এৱং দদন্তো এৱং যজন্তো বহুং পুঞ্ঞং পসৱসি. যো খো, মাণৱ, দাযকো দানপতি ৱদঞ্ঞূ যাচযোগো; ধম্মেন ভোগে পৰিযেসতি; ধম্মেন ভোগে পৰিযেসিত্ৱা ধম্মলদ্ধেহি ভোগেহি ধম্মাধিগতেহি একস্সপি দদাতি…পে… সতস্সপি দদাতি, ভিয্যোপি দদাতি, বহুং সো পুঞ্ঞং পসৱতী’’তি. অথ খো মাঘো মাণৱো ভগৱন্তং গাথায অজ্ঝভাসি –

৪৯১. ‘‘পুচ্ছামহং গোতমং ৱদঞ্ঞুং, (ইতি মাঘো মাণৱো)

কাসাযৱাসিং অগহং [অগিহং (সী.), অগেহং (পী.)] চৰন্তং;

যো যাচযোগো দানপতি [দানপতী (সী. স্যা. পী.)] গহট্ঠো, পুঞ্ঞত্থিকো [পুঞ্ঞপেখো (সী. পী. ক.)] যজতি পুঞ্ঞপেক্খো;

দদং পৰেসং ইধ অন্নপানং, কথং হুতং যজমানস্স সুজ্ঝে’’.

৪৯২. ‘‘যো যাচযোগো দানপতি গহট্ঠো, (মাঘাতি ভগৱা)

পুঞ্ঞত্থিকো যজতি পুঞ্ঞপেক্খো;

দদং পৰেসং ইধ অন্নপানং, আৰাধযে দক্খিণেয্যেভি তাদি’’.

৪৯৩. ‘‘যো যাচযোগো দানপতি গহট্ঠো, (ইতি মাঘো মাণৱো)

পুঞ্ঞত্থিকো যজতি পুঞ্ঞপেক্খো;

দদং পৰেসং ইধ অন্নপানং, অক্খাহি মে ভগৱা দক্খিণেয্যে’’.

৪৯৪. ‘‘যে ৱে অসত্তা [অলগ্গা (স্যা.)] ৱিচৰন্তি লোকে, অকিঞ্চনা কেৱলিনো যতত্তা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৪৯৫. ‘‘যে সব্বসংযোজনবন্ধনচ্ছিদা, দন্তা ৱিমুত্তা অনীঘা নিৰাসা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৪৯৬. ‘‘যে সব্বসংযোজনৱিপ্পমুত্তা, দন্তা ৱিমুত্তা অনীঘা নিৰাসা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৪৯৭. ‘‘ৰাগঞ্চ দোসঞ্চ পহায মোহং, খীণাসৱা ৱূসিতব্ৰহ্মচৰিযা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৪৯৮. ‘‘যেসু ন মাযা ৱসতি ন মানো, খীণাসৱা ৱূসিতব্ৰহ্মচৰিযা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৪৯৯. ‘‘যে ৱীতলোভা অমমা নিৰাসা, খীণাসৱা ৱূসিতব্ৰহ্মচৰিযা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০০. ‘‘যে ৱে ন তণ্হাসু উপাতিপন্না, ৱিতৰেয্য ওঘং অমমা চৰন্তি;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০১. ‘‘যেসং তণ্হা নত্থি কুহিঞ্চি লোকে, ভৱাভৱায ইধ ৱা হুৰং ৱা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০২. ‘‘যে কামে হিত্ৱা অগহা চৰন্তি, সুসঞ্ঞতত্তা তসৰংৱ উজ্জুং;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৩. ‘‘যে ৱীতৰাগা সুসমাহিতিন্দ্ৰিযা, চন্দোৱ ৰাহুগ্গহণা পমুত্তা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৪. ‘‘সমিতাৱিনো ৱীতৰাগা অকোপা, যেসং গতী নত্থিধ ৱিপ্পহায;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৫. ‘‘জহিত্ৱা জাতিমৰণং অসেসং, কথংকথিং সব্বমুপাতিৱত্তা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৬. ‘‘যে অত্তদীপা ৱিচৰন্তি লোকে, অকিঞ্চনা সব্বধি ৱিপ্পমুত্তা;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৭. ‘‘যে হেত্থ জানন্তি যথা তথা ইদং, অযমন্তিমা নত্থি পুনব্ভৱোতি;

কালেন তেসু হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ.

৫০৮. ‘‘যো ৱেদগূ ঝানৰতো সতীমা, সম্বোধিপত্তো সৰণং বহূনং;

কালেন তম্হি হব্যং পৱেচ্ছে, যো ব্ৰাহ্মণো পুঞ্ঞপেক্খো যজেথ’’.

৫০৯. ‘‘অদ্ধা অমোঘা মম পুচ্ছনা অহু, অক্খাসি মে ভগৱা দক্খিণেয্যে;

ত্ৱঞ্হেত্থ জানাসি যথা তথা ইদং, তথা হি তে ৱিদিতো এস ধম্মো.

৫১০. ‘‘যো যাচযোগো দানপতি গহট্ঠো, (ইতি মাঘো মাণৱো)

পুঞ্ঞত্থিকো যজতি পুঞ্ঞপেক্খো;

দদং পৰেসং ইধ অন্নপানং,

অক্খাহি মে ভগৱা যঞ্ঞসম্পদং’’.

৫১১. ‘‘যজস্সু যজমানো মাঘাতি ভগৱা, সব্বত্থ চ ৱিপ্পসাদেহি চিত্তং;

আৰম্মণং যজমানস্স যঞ্ঞো, এত্থপ্পতিট্ঠায জহাতি দোসং.

৫১২. ‘‘সো ৱীতৰাগো পৱিনেয্য দোসং, মেত্তং চিত্তং ভাৱযমপ্পমাণং;

ৰত্তিন্দিৱং সততমপ্পমত্তো, সব্বা দিসা ফৰতি অপ্পমঞ্ঞং’’.

৫১৩. ‘‘কো সুজ্ঝতি মুচ্চতি বজ্ঝতী চ, কেনত্তনা গচ্ছতি [কেনত্থেনা গচ্ছতি (ক.)] ব্ৰহ্মলোকং;

অজানতো মে মুনি ব্ৰূহি পুট্ঠো, ভগৱা হি মে সক্খি ব্ৰহ্মজ্জদিট্ঠো;

তুৱঞ্হি নো ব্ৰহ্মসমোসি সচ্চং, কথং উপপজ্জতি ব্ৰহ্মলোকং জুতিম’’.

৫১৪. ‘‘যো যজতি তিৱিধং যঞ্ঞসম্পদং, (মাঘাতি ভগৱা)

আৰাধযে দক্খিণেয্যেভি তাদি;

এৱং যজিত্ৱা সম্মা যাচযোগো,

উপপজ্জতি ব্ৰহ্মলোকন্তি ব্ৰূমী’’তি.

এৱং ৱুত্তে, মাঘো মাণৱো ভগৱন্তং এতদৱোচ – ‘‘অভিক্কন্তং, ভো গোতম…পে… অজ্জতগ্গে পাণুপেতং সৰণং গত’’ন্তি.

মাঘসুত্তং পঞ্চমং নিট্ঠিতং.