১১. নালকসুত্তং

৬৮৪. আনন্দজাতে তিদসগণে পতীতে, সক্কঞ্চ ইন্দং সুচিৱসনে চ দেৱে;

দুস্সং গহেত্ৱা অতিৰিৱ থোমযন্তে, অসিতো ইসি অদ্দস দিৱাৱিহাৰে.

৬৮৫. দিস্ৱান দেৱে মুদিতমনে উদগ্গে, চিত্তিং কৰিত্ৱান ইদমৱোচ [কৰিত্ৱা ইদমৱোচাসি (সী.)] তত্থ;

‘‘কিং দেৱসঙ্ঘো অতিৰিৱ কল্যৰূপো, দুস্সং গহেত্ৱা ৰমযথ [ভমযথ (সী.)] কিং পটিচ্চ.

৬৮৬. ‘‘যদাপি আসী অসুৰেহি সঙ্গমো, জযো সুৰানং অসুৰা পৰাজিতা.

তদাপি নেতাদিসো লোমহংসনো, কিমব্ভুতং দট্ঠু মৰূ পমোদিতা.

৬৮৭. ‘‘সেড়েন্তি গাযন্তি চ ৱাদযন্তি চ, ভুজানি ফোটেন্তি [পোঠেন্তি (সী. পী.), পোথেন্তি (ক.)] চ নচ্চযন্তি চ;

পুচ্ছামি ৱোহং মেৰুমুদ্ধৱাসিনে, ধুনাথ মে সংসযং খিপ্প মাৰিসা’’.

৬৮৮. ‘‘সো বোধিসত্তো ৰতনৱৰো অতুল্যো, মনুস্সলোকে হিতসুখত্থায [হিতসুখতায (সী. স্যা. পী.)] জাতো;

সক্যান গামে জনপদে লুম্বিনেয্যে, তেনম্হ তুট্ঠা অতিৰিৱ কল্যৰূপা.

৬৮৯. ‘‘সো সব্বসত্তুত্তমো অগ্গপুগ্গলো, নৰাসভো সব্বপজানমুত্তমো;

ৱত্তেস্সতি চক্কমিসিৱ্হযে ৱনে, নদংৱ সীহো বলৱা মিগাভিভূ’’.

৬৯০. তং সদ্দং সুত্ৱা তুৰিতমৱসৰী সো, সুদ্ধোদনস্স তদ ভৱনং উপাৱিসি [উপাগমি (সী. পী.)];

নিসজ্জ তত্থ ইদমৱোচাসি সক্যে, ‘‘কুহিং কুমাৰো অহমপি দট্ঠুকামো’’.

৬৯১. ততো কুমাৰং জলিতমিৱ সুৱণ্ণং, উক্কামুখেৱ সুকুসলসম্পহট্ঠং [সুকুসলেন সম্পহট্ঠং (ক.)];

দদ্দল্লমানং [দদ্দড়্হমানং (ক.)] সিৰিযা অনোমৱণ্ণং, দস্সেসু পুত্তং অসিতৱ্হযস্স সক্যা.

৬৯২. দিস্ৱা কুমাৰং সিখিমিৱ পজ্জলন্তং, তাৰাসভংৱ নভসিগমং ৱিসুদ্ধং;

সূৰিযং তপন্তং সৰদৰিৱব্ভমুত্তং, আনন্দজাতো ৱিপুলমলত্থ পীতিং.

৬৯৩. অনেকসাখঞ্চ সহস্সমণ্ডলং, ছত্তং মৰূ ধাৰযুমন্তলিক্খে;

সুৱণ্ণদণ্ডা ৱীতিপতন্তি চামৰা, ন দিস্সৰে চামৰছত্তগাহকা.

৬৯৪. দিস্ৱা জটী কণ্হসিৰিৱ্হযো ইসি, সুৱণ্ণনিক্খং ৱিয পণ্ডুকম্বলে;

সেতঞ্চ ছত্তং ধৰিযন্ত [ধাৰিযন্ত (স্যা.), ধাৰযন্তং (সী. ক.)] মুদ্ধনি, উদগ্গচিত্তো সুমনো পটিগ্গহে.

৬৯৫. পটিগ্গহেত্ৱা পন সক্যপুঙ্গৱং, জিগীসতো [জিগিংসকো (সী. স্যা. পী.)] লক্খণমন্তপাৰগূ;

পসন্নচিত্তো গিৰমব্ভুদীৰযি, ‘‘অনুত্তৰাযং দ্ৱিপদানমুত্তমো’’ [দিপদানমুত্তমো (সী. স্যা. পী.)].

৬৯৬. অথত্তনো গমনমনুস্সৰন্তো, অকল্যৰূপো গড়যতি অস্সুকানি;

দিস্ৱান সক্যা ইসিমৱোচুং ৰুদন্তং,

‘‘নো চে কুমাৰে ভৱিস্সতি অন্তৰাযো’’.

৬৯৭. দিস্ৱান সক্যে ইসিমৱোচ অকল্যে, ‘‘নাহং কুমাৰে অহিতমনুস্সৰামি;

ন চাপিমস্স ভৱিস্সতি অন্তৰাযো, ন ওৰকাযং অধিমানসা [অধিমনসা (সী. স্যা.)] ভৱাথ.

৬৯৮. ‘‘সম্বোধিযগ্গং ফুসিস্সতাযং কুমাৰো, সো ধম্মচক্কং পৰমৱিসুদ্ধদস্সী;

ৱত্তেস্সতাযং বহুজনহিতানুকম্পী, ৱিত্থাৰিকস্স ভৱিস্সতি ব্ৰহ্মচৰিযং.

৬৯৯. ‘‘মমঞ্চ আযু ন চিৰমিধাৱসেসো, অথন্তৰা মে ভৱিস্সতি কালকিৰিযা;

সোহং ন সোস্সং [সুস্সং (সী. স্যা.)] অসমধুৰস্স ধম্মং, তেনম্হি অট্টো ব্যসনংগতো অঘাৱী’’.

৭০০. সো সাকিযানং ৱিপুলং জনেত্ৱা পীতিং, অন্তেপুৰম্হা নিগ্গমা [নিৰগমা (সী. স্যা.), নিগমা (ক. সী.), নিৰগম (পী.)] ব্ৰহ্মচাৰী;

সো ভাগিনেয্যং সযং অনুকম্পমানো, সমাদপেসি অসমধুৰস্স ধম্মে.

৭০১. ‘‘বুদ্ধোতি ঘোসং যদ [যদি (স্যা. ক.)] পৰতো সুণাসি, সম্বোধিপত্তো ৱিৱৰতি ধম্মমগ্গং;

গন্ত্ৱান তত্থ সমযং পৰিপুচ্ছমানো [সযং পৰিপুচ্ছিযানো (সী. স্যা.)], চৰস্সু তস্মিং ভগৱতি ব্ৰহ্মচৰিযং’’.

৭০২. তেনানুসিট্ঠো হিতমনেন তাদিনা, অনাগতে পৰমৱিসুদ্ধদস্সিনা;

সো নালকো উপচিতপুঞ্ঞসঞ্চযো, জিনং পতিক্খং [পতি + ইক্খং = পতিক্খং] পৰিৱসি ৰক্খিতিন্দ্ৰিযো.

৭০৩. সুত্ৱান ঘোসং জিনৱৰচক্কৱত্তনে, গন্ত্ৱান দিস্ৱা ইসিনিসভং পসন্নো;

মোনেয্যসেট্ঠং মুনিপৱৰং অপুচ্ছি, সমাগতে অসিতাৱ্হযস্স সাসনেতি.

ৱত্থুগাথা নিট্ঠিতা.

৭০৪. ‘‘অঞ্ঞাতমেতং ৱচনং, অসিতস্স যথাতথং;

তং তং গোতম পুচ্ছামি, সব্বধম্মান পাৰগুং.

৭০৫. ‘‘অনগাৰিযুপেতস্স, ভিক্খাচৰিযং জিগীসতো;

মুনি পব্ৰূহি মে পুট্ঠো, মোনেয্যং উত্তমং পদং’’.

৭০৬. ‘‘মোনেয্যং তে উপঞ্ঞিস্সং, (ইতি ভগৱা) দুক্কৰং দুৰভিসম্ভৱং;

হন্দ তে নং পৱক্খামি, সন্থম্ভস্সু দড়্হো ভৱ.

৭০৭. ‘‘সমানভাগং কুব্বেথ, গামে অক্কুট্ঠৱন্দিতং;

মনোপদোসং ৰক্খেয্য, সন্তো অনুণ্ণতো চৰে.

৭০৮. ‘‘উচ্চাৱচা নিচ্ছৰন্তি, দাযে অগ্গিসিখূপমা;

নাৰিযো মুনিং পলোভেন্তি, তাসু তং মা পলোভযুং.

৭০৯. ‘‘ৱিৰতো মেথুনা ধম্মা, হিত্ৱা কামে পৰোপৰে [পৰোৱৰে (সী. পী.), ৱৰাৱৰে (স্যা.)];

অৱিৰুদ্ধো অসাৰত্তো, পাণেসু তসথাৱৰে.

৭১০. ‘‘যথা অহং তথা এতে, যথা এতে তথা অহং;

অত্তানং উপমং কত্ৱা, ন হনেয্য ন ঘাতযে.

৭১১. ‘‘হিত্ৱা ইচ্ছঞ্চ লোভঞ্চ, যত্থ সত্তো পুথুজ্জনো;

চক্খুমা পটিপজ্জেয্য, তৰেয্য নৰকং ইমং.

৭১২. ‘‘ঊনূদৰো মিতাহাৰো, অপ্পিচ্ছস্স অলোলুপো;

সদা [স ৱে (পী.)] ইচ্ছায নিচ্ছাতো, অনিচ্ছো হোতি নিব্বুতো.

৭১৩. ‘‘স পিণ্ডচাৰং চৰিত্ৱা, ৱনন্তমভিহাৰযে;

উপট্ঠিতো ৰুক্খমূলস্মিং, আসনূপগতো মুনি.

৭১৪. ‘‘স ঝানপসুতো ধীৰো, ৱনন্তে ৰমিতো সিযা;

ঝাযেথ ৰুক্খমূলস্মিং, অত্তানমভিতোসযং.

৭১৫. ‘‘ততো ৰত্যা ৱিৱসানে [ৱিৱসনে (সী. স্যা. পী.)], গামন্তমভিহাৰযে;

অৱ্হানং নাভিনন্দেয্য, অভিহাৰঞ্চ গামতো.

৭১৬. ‘‘ন মুনী গামমাগম্ম, কুলেসু সহসা চৰে;

ঘাসেসনং ছিন্নকথো, ন ৱাচং পযুতং ভণে.

৭১৭. ‘‘অলত্থং যদিদং সাধু, নালত্থং কুসলং ইতি;

উভযেনেৱ সো তাদী, ৰুক্খংৱুপনিৱত্ততি [ৰুক্খংৱু’পতিৱত্ততি (ক.), ৰুক্খংৱ উপাতিৱত্ততি (স্যা.)].

৭১৮. ‘‘স পত্তপাণি ৱিচৰন্তো, অমূগো মূগসম্মতো;

অপ্পং দানং ন হীড়েয্য, দাতাৰং নাৱজানিযা.

৭১৯. ‘‘উচ্চাৱচা হি পটিপদা, সমণেন পকাসিতা;

ন পাৰং দিগুণং যন্তি, নযিদং একগুণং মুতং.

৭২০. ‘‘যস্স চ ৱিসতা নত্থি, ছিন্নসোতস্স ভিক্খুনো;

কিচ্চাকিচ্চপ্পহীনস্স, পৰিড়াহো ন ৱিজ্জতি.

৭২১. ‘‘মোনেয্যং তে উপঞ্ঞিস্সং, খুৰধাৰূপমো ভৱে;

জিৱ্হায তালুমাহচ্চ, উদৰে সঞ্ঞতো সিযা.

৭২২. ‘‘অলীনচিত্তো চ সিযা, ন চাপি বহু চিন্তযে;

নিৰামগন্ধো অসিতো, ব্ৰহ্মচৰিযপৰাযণো.

৭২৩. ‘‘একাসনস্স সিক্খেথ, সমণূপাসনস্স চ;

একত্তং মোনমক্খাতং, একো চে অভিৰমিস্সসি;

অথ ভাহিসি [ভাসিহি (সী. স্যা. পী.)] দসদিসা.

৭২৪. ‘‘সুত্ৱা ধীৰানং নিগ্ঘোসং, ঝাযীনং কামচাগিনং;

ততো হিৰিঞ্চ সদ্ধঞ্চ, ভিয্যো কুব্বেথ মামকো.

৭২৫. ‘‘তং নদীহি ৱিজানাথ, সোব্ভেসু পদৰেসু চ;

সণন্তা যন্তি কুসোব্ভা [কুস্সুব্ভা (সী.)], তুণ্হীযন্তি মহোদধী.

৭২৬. ‘‘যদূনকং তং সণতি, যং পূৰং সন্তমেৱ তং;

অড্ঢকুম্ভূপমো বালো, ৰহদো পূৰোৱ পণ্ডিতো.

৭২৭. ‘‘যং সমণো বহুং ভাসতি, উপেতং অত্থসঞ্হিতং;

জানং সো ধম্মং দেসেতি, জানং সো বহু ভাসতি.

৭২৮. ‘‘যো চ জানং সংযতত্তো, জানং ন বহু ভাসতি;

স মুনী মোনমৰহতি, স মুনী মোনমজ্ঝগা’’তি.

নালকসুত্তং একাদসমং নিট্ঠিতং.