৬. ধম্মচৰিযসুত্তং

২৭৬. ধম্মচৰিযং ব্ৰহ্মচৰিযং, এতদাহু ৱসুত্তমং;

পব্বজিতোপি চে হোতি, অগাৰা অনগাৰিযং.

২৭৭. সো চে মুখৰজাতিকো, ৱিহেসাভিৰতো মগো;

জীৱিতং তস্স পাপিযো, ৰজং ৱড্ঢেতি অত্তনো.

২৭৮. কলহাভিৰতো ভিক্খু, মোহধম্মেন আৱুতো;

অক্খাতম্পি ন জানাতি, ধম্মং বুদ্ধেন দেসিতং.

২৭৯. ৱিহেসং ভাৱিতত্তানং, অৱিজ্জায পুৰক্খতো;

সংকিলেসং ন জানাতি, মগ্গং নিৰযগামিনং.

২৮০. ৱিনিপাতং সমাপন্নো, গব্ভা গব্ভং তমা তমং;

স ৱে তাদিসকো ভিক্খু, পেচ্চ দুক্খং নিগচ্ছতি.

২৮১. গূথকূপো যথা অস্স, সম্পুণ্ণো গণৱস্সিকো;

যো চ এৱৰূপো অস্স, দুব্বিসোধো হি সাঙ্গণো.

২৮২. যং এৱৰূপং জানাথ, ভিক্খৱো গেহনিস্সিতং;

পাপিচ্ছং পাপসঙ্কপ্পং, পাপআচাৰগোচৰং.

২৮৩. সব্বে সমগ্গা হুত্ৱান, অভিনিব্বজ্জিযাথ [অভিনিব্বজ্জযাথ (সী. পী. অ. নি. ৮.১০)] নং;

কাৰণ্ডৱং [কাৰণ্ডং ৱ (স্যা. ক.) অ. নি. ৮.১০] নিদ্ধমথ, কসম্বুং অপকস্সথ [অৱকস্সথ (সী. স্যা. ক.)].

২৮৪. ততো পলাপে [পলাসে (ক.)] ৱাহেথ, অস্সমণে সমণমানিনে;

নিদ্ধমিত্ৱান পাপিচ্ছে, পাপআচাৰগোচৰে.

২৮৫. সুদ্ধা সুদ্ধেহি সংৱাসং, কপ্পযৱ্হো পতিস্সতা;

ততো সমগ্গা নিপকা, দুক্খস্সন্তং কৰিস্সথাতি.

ধম্মচৰিযসুত্তং [কপিলসুত্তং (অট্ঠ.)] ছট্ঠং নিট্ঠিতং.