৭. ব্ৰাহ্মণধম্মিকসুত্তং

এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো সম্বহুলা কোসলকা ব্ৰাহ্মণমহাসালা জিণ্ণা ৱুড্ঢা মহল্লকা অদ্ধগতা ৱযোঅনুপ্পত্তা যেন ভগৱা তেনুপসঙ্কমিংসু; উপসঙ্কমিত্ৱা ভগৱতা সদ্ধিং সম্মোদিংসু. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিংসু. একমন্তং নিসিন্না খো তে ব্ৰাহ্মণমহাসালা ভগৱন্তং এতদৱোচুং – ‘‘সন্দিস্সন্তি নু খো, ভো গোতম, এতৰহি ব্ৰাহ্মণা পোৰাণানং ব্ৰাহ্মণানং ব্ৰাহ্মণধম্মে’’তি? ‘‘ন খো, ব্ৰাহ্মণা, সন্দিস্সন্তি এতৰহি ব্ৰাহ্মণা পোৰাণানং ব্ৰাহ্মণানং ব্ৰাহ্মণধম্মে’’তি. ‘‘সাধু নো ভৱং গোতমো পোৰাণানং ব্ৰাহ্মণানং ব্ৰাহ্মণধম্মং ভাসতু, সচে ভোতো গোতমস্স অগৰূ’’তি. ‘‘তেন হি, ব্ৰাহ্মণা, সুণাথ, সাধুকং মনসি কৰোথ, ভাসিস্সামী’’তি. ‘‘এৱং, ভো’’তি খো তে ব্ৰাহ্মণমহাসালা ভগৱতো পচ্চস্সোসুং. ভগৱা এতদৱোচ –

২৮৬. ‘‘ইসযো পুব্বকা আসুং, সঞ্ঞতত্তা তপস্সিনো;

পঞ্চ কামগুণে হিত্ৱা, অত্তদত্থমচাৰিসুং.

২৮৭. ‘‘ন পসূ ব্ৰাহ্মণানাসুং, ন হিৰঞ্ঞং ন ধানিযং;

সজ্ঝাযধনধঞ্ঞাসুং, ব্ৰহ্মং নিধিমপালযুং.

২৮৮. ‘‘যং নেসং পকতং আসি, দ্ৱাৰভত্তং উপট্ঠিতং;

সদ্ধাপকতমেসানং, দাতৱে তদমঞ্ঞিসুং.

২৮৯. ‘‘নানাৰত্তেহি ৱত্থেহি, সযনেহাৱসথেহি চ;

ফীতা জনপদা ৰট্ঠা, তে নমস্সিংসু ব্ৰাহ্মণে.

২৯০. ‘‘অৱজ্ঝা ব্ৰাহ্মণা আসুং, অজেয্যা ধম্মৰক্খিতা;

ন নে কোচি নিৱাৰেসি, কুলদ্ৱাৰেসু সব্বসো.

২৯১. ‘‘অট্ঠচত্তালীসং ৱস্সানি, (কোমাৰ) ব্ৰহ্মচৰিযং চৰিংসু তে;

ৱিজ্জাচৰণপৰিযেট্ঠিং, অচৰুং ব্ৰাহ্মণা পুৰে.

২৯২. ‘‘ন ব্ৰাহ্মণা অঞ্ঞমগমুং, নপি ভৰিযং কিণিংসু তে;

সম্পিযেনেৱ সংৱাসং, সঙ্গন্ত্ৱা সমৰোচযুং.

২৯৩. ‘‘অঞ্ঞত্ৰ তম্হা সমযা, উতুৱেৰমণিং পতি;

অন্তৰা মেথুনং ধম্মং, নাস্সু গচ্ছন্তি ব্ৰাহ্মণা.

২৯৪. ‘‘ব্ৰহ্মচৰিযঞ্চ সীলঞ্চ, অজ্জৱং মদ্দৱং তপং;

সোৰচ্চং অৱিহিংসঞ্চ, খন্তিঞ্চাপি অৱণ্ণযুং.

২৯৫. ‘‘যো নেসং পৰমো আসি, ব্ৰহ্মা দড়্হপৰক্কমো;

স ৱাপি মেথুনং ধম্মং, সুপিনন্তেপি নাগমা.

২৯৬. ‘‘তস্স ৱত্তমনুসিক্খন্তা, ইধেকে ৱিঞ্ঞুজাতিকা;

ব্ৰহ্মচৰিযঞ্চ সীলঞ্চ, খন্তিঞ্চাপি অৱণ্ণযুং.

২৯৭. ‘‘তণ্ডুলং সযনং ৱত্থং, সপ্পিতেলঞ্চ যাচিয;

ধম্মেন সমোধানেত্ৱা, ততো যঞ্ঞমকপ্পযুং.

২৯৮. ‘‘উপট্ঠিতস্মিং যঞ্ঞস্মিং, নাস্সু গাৱো হনিংসু তে;

যথা মাতা পিতা ভাতা, অঞ্ঞে ৱাপি চ ঞাতকা;

গাৱো নো পৰমা মিত্তা, যাসু জাযন্তি ওসধা.

২৯৯. ‘‘অন্নদা বলদা চেতা, ৱণ্ণদা সুখদা তথা [সুখদা চ তা (ক.)];

এতমত্থৱসং ঞত্ৱা, নাস্সু গাৱো হনিংসু তে.

৩০০. ‘‘সুখুমালা মহাকাযা, ৱণ্ণৱন্তো যসস্সিনো;

ব্ৰাহ্মণা সেহি ধম্মেহি, কিচ্চাকিচ্চেসু উস্সুকা;

যাৱ লোকে অৱত্তিংসু, সুখমেধিত্থযং পজা.

৩০১. ‘‘তেসং আসি ৱিপল্লাসো, দিস্ৱান অণুতো অণুং;

ৰাজিনো চ ৱিযাকাৰং, নাৰিযো সমলঙ্কতা.

৩০২. ‘‘ৰথে চাজঞ্ঞসংযুত্তে, সুকতে চিত্তসিব্বনে;

নিৱেসনে নিৱেসে চ, ৱিভত্তে ভাগসো মিতে.

৩০৩. ‘‘গোমণ্ডলপৰিব্যূড়্হং, নাৰীৱৰগণাযুতং;

উড়াৰং মানুসং ভোগং, অভিজ্ঝাযিংসু ব্ৰাহ্মণা.

৩০৪. ‘‘তে তত্থ মন্তে গন্থেত্ৱা, ওক্কাকং তদুপাগমুং;

পহূতধনধঞ্ঞোসি, যজস্সু বহু তে ৱিত্তং;

যজস্সু বহু তে ধনং.

৩০৫. ‘‘ততো চ ৰাজা সঞ্ঞত্তো, ব্ৰাহ্মণেহি ৰথেসভো;

অস্সমেধং পুৰিসমেধং, সম্মাপাসং ৱাজপেয্যং নিৰগ্গড়ং;

এতে যাগে যজিত্ৱান, ব্ৰাহ্মণানমদা ধনং.

৩০৬. ‘‘গাৱো সযনঞ্চ ৱত্থঞ্চ, নাৰিযো সমলঙ্কতা;

ৰথে চাজঞ্ঞসংযুত্তে, সুকতে চিত্তসিব্বনে.

৩০৭. ‘‘নিৱেসনানি ৰম্মানি, সুৱিভত্তানি ভাগসো;

নানাধঞ্ঞস্স পূৰেত্ৱা, ব্ৰাহ্মণানমদা ধনং.

৩০৮. ‘‘তে চ তত্থ ধনং লদ্ধা, সন্নিধিং সমৰোচযুং;

তেসং ইচ্ছাৱতিণ্ণানং, ভিয্যো তণ্হা পৱড্ঢথ;

তে তত্থ মন্তে গন্থেত্ৱা, ওক্কাকং পুনমুপাগমুং.

৩০৯. ‘‘যথা আপো চ পথৱী চ, হিৰঞ্ঞং ধনধানিযং;

এৱং গাৱো মনুস্সানং, পৰিক্খাৰো সো হি পাণিনং;

যজস্সু বহু তে ৱিত্তং, যজস্সু বহু তে ধনং.

৩১০. ‘‘ততো চ ৰাজা সঞ্ঞত্তো, ব্ৰাহ্মণেহি ৰথেসভো;

নেকা সতসহস্সিযো, গাৱো যঞ্ঞে অঘাতযি.

৩১১. ‘‘ন পাদা ন ৱিসাণেন, নাস্সু হিংসন্তি কেনচি;

গাৱো এড়কসমানা, সোৰতা কুম্ভদূহনা;

তা ৱিসাণে গহেত্ৱান, ৰাজা সত্থেন ঘাতযি.

৩১২. ‘‘ততো দেৱা পিতৰো চ [ততো চ দেৱা পিতৰো (সী. স্যা.)], ইন্দো অসুৰৰক্খসা;

অধম্মো ইতি পক্কন্দুং, যং সত্থং নিপতী গৱে.

৩১৩. ‘‘তযো ৰোগা পুৰে আসুং, ইচ্ছা অনসনং জৰা;

পসূনঞ্চ সমাৰম্ভা, অট্ঠানৱুতিমাগমুং.

৩১৪. ‘‘এসো অধম্মো দণ্ডানং, ওক্কন্তো পুৰাণো অহু;

অদূসিকাযো হঞ্ঞন্তি, ধম্মা ধংসন্তি [ধংসেন্তি (সী. পী.)] যাজকা.

৩১৫. ‘‘এৱমেসো অণুধম্মো, পোৰাণো ৱিঞ্ঞুগৰহিতো;

যত্থ এদিসকং পস্সতি, যাজকং গৰহতী [গৰহী (ক.)] জনো.

৩১৬. ‘‘এৱং ধম্মে ৱিযাপন্নে, ৱিভিন্না সুদ্দৱেস্সিকা;

পুথূ ৱিভিন্না খত্তিযা, পতিং ভৰিযাৱমঞ্ঞথ.

৩১৭. ‘‘খত্তিযা ব্ৰহ্মবন্ধূ চ, যে চঞ্ঞে গোত্তৰক্খিতা;

জাতিৱাদং নিৰংকত্ৱা [নিৰাকত্ৱা (?) যথা অনিৰাকতজ্ঝানোতি], কামানং ৱসমন্ৱগু’’ন্তি.

এৱং ৱুত্তে, তে ব্ৰাহ্মণমহাসালা ভগৱন্তং এতদৱোচুং – ‘‘অভিক্কন্তং, ভো গোতম…পে. … উপাসকে নো ভৱং গোতমো ধাৰেতু অজ্জতগ্গে পাণুপেতে সৰণং গতে’’তি.

ব্ৰাহ্মণধম্মিকসুত্তং সত্তমং নিট্ঠিতং.