৫. সূচিলোমসুত্তং

এৱং মে সুতং – একং সমযং ভগৱা গযাযং ৱিহৰতি টঙ্কিতমঞ্চে সূচিলোমস্স যক্খস্স ভৱনে. তেন খো পন সমযেন খৰো চ যক্খো সূচিলোমো চ যক্খো ভগৱতো অৱিদূৰে অতিক্কমন্তি. অথ খো খৰো যক্খো সূচিলোমং যক্খং এতদৱোচ – ‘‘এসো সমণো’’তি. ‘‘নেসো সমণো, সমণকো এসো. যাৱাহং জানামি [যাৱ জানামি (সী. পী.)] যদি ৱা সো সমণো [যদি ৱা সমণো (স্যা.)], যদি ৱা সো সমণকো’’তি [যদি ৱা সমণকোতি (সী. স্যা. পী.)].

অথ খো সূচিলোমো যক্খো যেন ভগৱা তেনুপসঙ্কমি; উপসঙ্কমিত্ৱা ভগৱতো কাযং উপনামেসি. অথ খো ভগৱা কাযং অপনামেসি. অথ খো সূচিলোমো যক্খো ভগৱন্তং এতদৱোচ – ‘‘ভাযসি মং, সমণা’’তি? ‘‘ন খ্ৱাহং তং, আৱুসো, ভাযামি; অপি চ তে সপ্ফস্সো পাপকো’’তি.

‘‘পঞ্হং তং, সমণ, পুচ্ছিস্সামি. সচে মে ন ব্যাকৰিস্সসি, চিত্তং ৱা তে খিপিস্সামি, হদযং ৱা তে ফালেস্সামি, পাদেসু ৱা গহেত্ৱা পাৰগঙ্গায খিপিস্সামী’’তি.

‘‘ন খ্ৱাহং তং, আৱুসো, পস্সামি সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায যো মে চিত্তং ৱা খিপেয্য হদযং ৱা ফালেয্য পাদেসু ৱা গহেত্ৱা পাৰগঙ্গায খিপেয্য. অপি চ ত্ৱং, আৱুসো, পুচ্ছ যদাকঙ্খসী’’তি. অথ খো সূচিলোমো যক্খো ভগৱন্তং গাথায অজ্ঝভাসি –

২৭৩. ‘‘ৰাগো চ দোসো চ কুতোনিদানা, অৰতী ৰতী লোমহংসো কুতোজা;

কুতো সমুট্ঠায মনোৱিতক্কা, কুমাৰকা ধঙ্কমিৱোস্সজন্তি’’.

২৭৪. ‘‘ৰাগো চ দোসো চ ইতোনিদানা, অৰতী ৰতী লোমহংসো ইতোজা;

ইতো সমুট্ঠায মনোৱিতক্কা, কুমাৰকা ধঙ্কমিৱোস্সজন্তি.

২৭৪. ‘‘স্নেহজা অত্তসম্ভূতা, নিগ্ৰোধস্সেৱ খন্ধজা;

পুথূ ৱিসত্তা কামেসু, মালুৱাৱ ৱিততাৱনে.

২৭৫. ‘‘যে নং পজানন্তি যতোনিদানং, তে নং ৱিনোদেন্তি সুণোহি যক্খ;

তে দুত্তৰং ওঘমিমং তৰন্তি, অতিণ্ণপুব্বং অপুনব্ভৱাযা’’তি.

সূচিলোমসুত্তং পঞ্চমং নিট্ঠিতং.