১৪. ধম্মিকসুত্তং

এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো ধম্মিকো উপাসকো পঞ্চহি উপাসকসতেহি সদ্ধিং যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো ধম্মিকো উপাসকো ভগৱন্তং গাথাহি অজ্ঝভাসি –

৩৭৮. ‘‘পুচ্ছামি তং গোতম ভূৰিপঞ্ঞ, কথংকৰো সাৱকো সাধু হোতি;

যো ৱা অগাৰা অনগাৰমেতি, অগাৰিনো ৱা পনুপাসকাসে.

৩৭৯. ‘‘তুৱঞ্হি লোকস্স সদেৱকস্স, গতিং পজানাসি পৰাযণঞ্চ;

ন চত্থি তুল্যো নিপুণত্থদস্সী, তুৱঞ্হি বুদ্ধং পৱৰং ৱদন্তি.

৩৮০. ‘‘সব্বং তুৱং ঞাণমৱেচ্চ ধম্মং, পকাসেসি সত্তে অনুকম্পমানো;

ৱিৱট্টচ্ছদোসি সমন্তচক্খু, ৱিৰোচসি ৱিমলো সব্বলোকে.

৩৮১. ‘‘আগঞ্ছি তে সন্তিকে নাগৰাজা, এৰাৱণো নাম জিনোতি সুত্ৱা;

সোপি তযা মন্তযিত্ৱাজ্ঝগমা, সাধূতি সুত্ৱান পতীতৰূপো.

৩৮২. ‘‘ৰাজাপি তং ৱেস্সৱণো কুৱেৰো, উপেতি ধম্মং পৰিপুচ্ছমানো;

তস্সাপি ত্ৱং পুচ্ছিতো ব্ৰূসি ধীৰ, সো চাপি সুত্ৱান পতীতৰূপো.

৩৮৩. ‘‘যে কেচিমে তিত্থিযা ৱাদসীলা, আজীৱকা ৱা যদি ৱা নিগণ্ঠা;

পঞ্ঞায তং নাতিতৰন্তি সব্বে, ঠিতো ৱজন্তং ৱিয সীঘগামিং.

৩৮৪. ‘‘যে কেচিমে ব্ৰাহ্মণা ৱাদসীলা, ৱুদ্ধা চাপি ব্ৰাহ্মণা সন্তি কেচি;

সব্বে তযি অত্থবদ্ধা ভৱন্তি, যে চাপি অঞ্ঞে ৱাদিনো মঞ্ঞমানা.

৩৮৫. ‘‘অযঞ্হি ধম্মো নিপুণো সুখো চ, যোযং তযা ভগৱা সুপ্পৱুত্তো;

তমেৱ সব্বেপি [সব্বে মযং (স্যা.)] সুস্সূসমানা, তং নো ৱদ পুচ্ছিতো বুদ্ধসেট্ঠ.

৩৮৬. ‘‘সব্বেপি মে ভিক্খৱো সন্নিসিন্না, উপাসকা চাপি তথেৱ সোতুং;

সুণন্তু ধম্মং ৱিমলেনানুবুদ্ধং, সুভাসিতং ৱাসৱস্সেৱ দেৱা’’.

৩৮৭. ‘‘সুণাথ মে ভিক্খৱো সাৱযামি ৱো, ধম্মং ধুতং তঞ্চ চৰাথ সব্বে;

ইৰিযাপথং পব্বজিতানুলোমিকং, সেৱেথ নং অত্থদসো মুতীমা.

৩৮৮. ‘‘নো ৱে ৱিকালে ৱিচৰেয্য ভিক্খু, গামে চ পিণ্ডায চৰেয্য কালে;

অকালচাৰিঞ্হি সজন্তি সঙ্গা, তস্মা ৱিকালে ন চৰন্তি বুদ্ধা.

৩৮৯. ‘‘ৰূপা চ সদ্দা চ ৰসা চ গন্ধা, ফস্সা চ যে সম্মদযন্তি সত্তে;

এতেসু ধম্মেসু ৱিনেয্য ছন্দং, কালেন সো পৱিসে পাতৰাসং.

৩৯০. ‘‘পিণ্ডঞ্চ ভিক্খু সমযেন লদ্ধা, একো পটিক্কম্ম ৰহো নিসীদে;

অজ্ঝত্তচিন্তী ন মনো বহিদ্ধা, নিচ্ছাৰযে সঙ্গহিতত্তভাৱো.

৩৯১. ‘‘সচেপি সো সল্লপে সাৱকেন, অঞ্ঞেন ৱা কেনচি ভিক্খুনা ৱা;

ধম্মং পণীতং তমুদাহৰেয্য, ন পেসুণং নোপি পৰূপৱাদং.

৩৯২. ‘‘ৱাদঞ্হি একে পটিসেনিযন্তি, ন তে পসংসাম পৰিত্তপঞ্ঞে;

ততো ততো নে পসজন্তি সঙ্গা, চিত্তঞ্হি তে তত্থ গমেন্তি দূৰে.

৩৯৩. ‘‘পিণ্ডং ৱিহাৰং সযনাসনঞ্চ, আপঞ্চ সঙ্ঘাটিৰজূপৱাহনং;

সুত্ৱান ধম্মং সুগতেন দেসিতং, সঙ্খায সেৱে ৱৰপঞ্ঞসাৱকো.

৩৯৪. ‘‘তস্মা হি পিণ্ডে সযনাসনে চ, আপে চ সঙ্ঘাটিৰজূপৱাহনে;

এতেসু ধম্মেসু অনূপলিত্তো, ভিক্খু যথা পোক্খৰে ৱাৰিবিন্দু.

৩৯৫. ‘‘গহট্ঠৱত্তং পন ৱো ৱদামি, যথাকৰো সাৱকো সাধু হোতি;

ন হেস [ন হেসো (সী.)] লব্ভা সপৰিগ্গহেন, ফস্সেতুং যো কেৱলো ভিক্খুধম্মো.

৩৯৬. ‘‘পাণং ন হনে [ন হানে (সী.)] ন চ ঘাতযেয্য, ন চানুজঞ্ঞা হনতং পৰেসং;

সব্বেসু ভূতেসু নিধায দণ্ডং, যে থাৱৰা যে চ তসা সন্তি [তসন্তি (সী. পী.)] লোকে.

৩৯৭. ‘‘ততো অদিন্নং পৰিৱজ্জযেয্য, কিঞ্চি ক্ৱচি সাৱকো বুজ্ঝমানো;

ন হাৰযে হৰতং নানুজঞ্ঞা, সব্বং অদিন্নং পৰিৱজ্জযেয্য.

৩৯৮. ‘‘অব্ৰহ্মচৰিযং পৰিৱজ্জযেয্য, অঙ্গাৰকাসুং জলিতংৱ ৱিঞ্ঞূ;

অসম্ভুণন্তো পন ব্ৰহ্মচৰিযং, পৰস্স দাৰং ন অতিক্কমেয্য.

৩৯৯. ‘‘সভগ্গতো ৱা পৰিসগ্গতো ৱা, একস্স ৱেকো [চেতো (সী. স্যা.)] ন মুসা ভণেয্য;

ন ভাণযে ভণতং নানুজঞ্ঞা, সব্বং অভূতং পৰিৱজ্জযেয্য.

৪০০. ‘‘মজ্জঞ্চ পানং ন সমাচৰেয্য, ধম্মং ইমং ৰোচযে যো গহট্ঠো;

ন পাযযে পিৱতং নানুজঞ্ঞা, উম্মাদনন্তং ইতি নং ৱিদিত্ৱা.

৪০১. ‘‘মদা হি পাপানি কৰোন্তি বালা, কাৰেন্তি চঞ্ঞেপি জনে পমত্তে;

এতং অপুঞ্ঞাযতনং ৱিৱজ্জযে, উম্মাদনং মোহনং বালকন্তং.

৪০২. ‘‘পাণং ন হনে ন চাদিন্নমাদিযে, মুসা ন ভাসে ন চ মজ্জপো সিযা;

অব্ৰহ্মচৰিযা ৱিৰমেয্য মেথুনা, ৰত্তিং ন ভুঞ্জেয্য ৱিকালভোজনং.

৪০৩. ‘‘মালং ন ধাৰে ন চ গন্ধমাচৰে, মঞ্চে ছমাযং ৱ সযেথ সন্থতে;

এতঞ্হি অট্ঠঙ্গিকমাহুপোসথং, বুদ্ধেন দুক্খন্তগুনা পকাসিতং.

৪০৪. ‘‘ততো চ পক্খস্সুপৱস্সুপোসথং, চাতুদ্দসিং পঞ্চদসিঞ্চ অট্ঠমিং;

পাটিহাৰিযপক্খঞ্চ পসন্নমানসো, অট্ঠঙ্গুপেতং সুসমত্তৰূপং.

৪০৫. ‘‘ততো চ পাতো উপৱুত্থুপোসথো, অন্নেন পানেন চ ভিক্খুসঙ্ঘং;

পসন্নচিত্তো অনুমোদমানো, যথাৰহং সংৱিভজেথ ৱিঞ্ঞূ.

৪০৬. ‘‘ধম্মেন মাতাপিতৰো ভৰেয্য, পযোজযে ধম্মিকং সো ৱণিজ্জং;

এতং গিহী ৱত্তযমপ্পমত্তো, সযম্পভে নাম উপেতি দেৱে’’তি.

ধম্মিকসুত্তং চুদ্দসমং নিট্ঠিতং.

চূড়ৱগ্গো দুতিযো নিট্ঠিতো.