১৩. সম্মাপৰিব্বাজনীযসুত্তং

৩৬১. ‘‘পুচ্ছামি মুনিং পহূতপঞ্ঞং,

তিণ্ণং পাৰঙ্গতং পৰিনিব্বুতং ঠিতত্তং;

নিক্খম্ম ঘৰা পনুজ্জ কামে, কথং ভিক্খু

সম্মা সো লোকে পৰিব্বজেয্য’’.

৩৬২. ‘‘যস্স মঙ্গলা সমূহতা, (ইতি ভগৱা)

উপ্পাতা সুপিনা চ লক্খণা চ;

সো মঙ্গলদোসৱিপ্পহীনো,

সম্মা সো লোকে পৰিব্বজেয্য.

৩৬৩. ‘‘ৰাগং ৱিনযেথ মানুসেসু, দিব্বেসু কামেসু চাপি ভিক্খু;

অতিক্কম্ম ভৱং সমেচ্চ ধম্মং, সম্মা সো লোকে পৰিব্বজেয্য.

৩৬৪. ‘‘ৱিপিট্ঠিকত্ৱান পেসুণানি, কোধং কদৰিযং জহেয্য ভিক্খু;

অনুৰোধৱিৰোধৱিপ্পহীনো, সম্মা সো লোকে পৰিব্বজেয্য.

৩৬৫. ‘‘হিত্ৱান পিযঞ্চ অপ্পিযঞ্চ, অনুপাদায অনিস্সিতো কুহিঞ্চি;

সংযোজনিযেহি ৱিপ্পমুত্তো, সম্মা সো লোকে পৰিব্বজেয্য.

৩৬৬. ‘‘ন সো উপধীসু সাৰমেতি, আদানেসু ৱিনেয্য ছন্দৰাগং;

সো অনিস্সিতো অনঞ্ঞনেয্যো, সম্মা সো লোকে পৰিব্বজেয্য.

৩৬৭. ‘‘ৱচসা মনসা চ কম্মুনা চ, অৱিৰুদ্ধো সম্মা ৱিদিত্ৱা ধম্মং;

নিব্বানপদাভিপত্থযানো, সম্মা সো লোকে পৰিব্বজেয্য.

৩৬৮. ‘‘যো ৱন্দতি মন্তি নুণ্ণমেয্য [নুন্নমেয্য (?)], অক্কুট্ঠোপি ন সন্ধিযেথ ভিক্খু;

লদ্ধা পৰভোজনং ন মজ্জে, সম্মা সো লোকে পৰিব্বজেয্য.

৩৬৯. ‘‘লোভঞ্চ ভৱঞ্চ ৱিপ্পহায, ৱিৰতো ছেদনবন্ধনা চ [ছেদনবন্ধনতো (সী. স্যা.)] ভিক্খু;

সো তিণ্ণকথংকথো ৱিসল্লো, সম্মা সো লোকে পৰিব্বজেয্য.

৩৭০. ‘‘সাৰুপ্পং অত্তনো ৱিদিত্ৱা, নো চ ভিক্খু হিংসেয্য কঞ্চি লোকে;

যথা তথিযং ৱিদিত্ৱা ধম্মং, সম্মা সো লোকে পৰিব্বজেয্য.

৩৭১. ‘‘যস্সানুসযা ন সন্তি কেচি, মূলা চ [মূলা (সী. স্যা.)] অকুসলা সমূহতাসে;

সো নিৰাসো [নিৰাসযো (সী.), নিৰাসসো (স্যা.)] অনাসিসানো [অনাসযানো (সী. পী.), অনাসসানো (স্যা.)], সম্মা সো লোকে পৰিব্বজেয্য.

৩৭২. ‘‘আসৱখীণো পহীনমানো, সব্বং ৰাগপথং উপাতিৱত্তো;

দন্তো পৰিনিব্বুতো ঠিতত্তো, সম্মা সো লোকে পৰিব্বজেয্য.

৩৭৩. ‘‘সদ্ধো সুতৱা নিযামদস্সী, ৱগ্গগতেসু ন ৱগ্গসাৰি ধীৰো;

লোভং দোসং ৱিনেয্য পটিঘং, সম্মা সো লোকে পৰিব্বজেয্য.

৩৭৪. ‘‘সংসুদ্ধজিনো ৱিৱট্টচ্ছদো, ধম্মেসু ৱসী পাৰগূ অনেজো;

সঙ্খাৰনিৰোধঞাণকুসলো, সম্মা সো লোকে পৰিব্বজেয্য.

৩৭৫. ‘‘অতীতেসু অনাগতেসু চাপি, কপ্পাতীতো অতিচ্চসুদ্ধিপঞ্ঞো;

সব্বাযতনেহি ৱিপ্পমুত্তো, সম্মা সো লোকে পৰিব্বজেয্য.

৩৭৬. ‘‘অঞ্ঞায পদং সমেচ্চ ধম্মং, ৱিৱটং দিস্ৱান পহানমাসৱানং;

সব্বুপধীনং পৰিক্খযানো [পৰিক্খযা (পী.)], সম্মা সো লোকে পৰিব্বজেয্য’’.

৩৭৭. ‘‘অদ্ধা হি ভগৱা তথেৱ এতং, যো সো এৱংৱিহাৰী দন্তো ভিক্খু;

সব্বসংযোজনযোগৱীতিৱত্তো [সব্বসংযোজনিযে চ ৱীতিৱত্তো (সী. স্যা. পী.)], সম্মা সো লোকে পৰিব্বজেয্যা’’তি.

সম্মাপৰিব্বাজনীযসুত্তং তেৰসমং নিট্ঠিতং.