১২. নিগ্ৰোধকপ্পসুত্তং

এৱং মে সুতং – একং সমযং ভগৱা আড়ৱিযং ৱিহৰতি অগ্গাড়ৱে চেতিযে. তেন খো পন সমযেন আযস্মতো ৱঙ্গীসস্স উপজ্ঝাযো নিগ্ৰোধকপ্পো নাম থেৰো অগ্গাড়ৱে চেতিযে অচিৰপৰিনিব্বুতো হোতি. অথ খো আযস্মতো ৱঙ্গীসস্স ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘‘পৰিনিব্বুতো নু খো মে উপজ্ঝাযো উদাহু নো পৰিনিব্বুতো’’তি? অথ খো আযস্মা ৱঙ্গীসো সাযন্হসমযং পটিসল্লানা ৱুট্ঠিতো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা ৱঙ্গীসো ভগৱন্তং এতদৱোচ – ‘‘ইধ ময্হং, ভন্তে, ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘পৰিনিব্বুতো নু খো মে উপজ্ঝাযো, উদাহু নো পৰিনব্বুতো’’’তি. অথ খো আযস্মা ৱঙ্গীসো উট্ঠাযাসনা একংসং চীৱৰং কত্ৱা যেন ভগৱা তেনঞ্জলিং পণামেত্ৱা ভগৱন্তং গাথায অজ্ঝভাসি –

৩৪৫. ‘‘পুচ্ছাম [পুচ্ছামি (ক.)] সত্থাৰমনোমপঞ্ঞং, দিট্ঠেৱ ধম্মে যো ৱিচিকিচ্ছানং ছেত্তা;

অগ্গাড়ৱে কালমকাসি ভিক্খু, ঞাতো যসস্সী অভিনিব্বুতত্তো.

৩৪৬. ‘‘নিগ্ৰোধকপ্পো ইতি তস্স নামং, তযা কতং ভগৱা ব্ৰাহ্মণস্স;

সো তং নমস্সং অচৰি মুত্যপেক্খো, আৰদ্ধৱীৰিযো দড়্হধম্মদস্সী.

৩৪৭. ‘‘তং সাৱকং সক্য [সক্ক (সী. স্যা. পী.)] মযম্পি সব্বে, অঞ্ঞাতুমিচ্ছাম সমন্তচক্খু;

সমৱট্ঠিতা নো সৱনায সোতা, তুৱং নো সত্থা ত্ৱমনুত্তৰোসি.

৩৪৮. ‘‘ছিন্দেৱ নো ৱিচিকিচ্ছং ব্ৰূহি মেতং, পৰিনিব্বুতং ৱেদয ভূৰিপঞ্ঞ;

মজ্ঝেৱ [মজ্ঝে চ (স্যা. ক.)] নো ভাস সমন্তচক্খু, সক্কোৱ দেৱান সহস্সনেত্তো.

৩৪৯. ‘‘যে কেচি গন্থা ইধ মোহমগ্গা, অঞ্ঞাণপক্খা ৱিচিকিচ্ছঠানা;

তথাগতং পত্ৱা ন তে ভৱন্তি, চক্খুঞ্হি এতং পৰমং নৰানং.

৩৫০. ‘‘নো চে হি জাতু পুৰিসো কিলেসে, ৱাতো যথা অব্ভধনং ৱিহানে;

তমোৱস্স নিৱুতো সব্বলোকো, ন জোতিমন্তোপি নৰা তপেয্যুং.

৩৫১. ‘‘ধীৰা চ পজ্জোতকৰা ভৱন্তি, তং তং অহং ৱীৰ [ধীৰ (সী. স্যা.)] তথেৱ মঞ্ঞে;

ৱিপস্সিনং জানমুপাগমুম্হা [জানমুপগমম্হা (সী. স্যা.)], পৰিসাসু নো আৱিকৰোহি কপ্পং.

৩৫২. ‘‘খিপ্পং গিৰং এৰয ৱগ্গু ৱগ্গুং, হংসোৱ পগ্গয্হ সণিকং [সণিং (স্যা. পী.)] নিকূজ;

বিন্দুস্সৰেন সুৱিকপ্পিতেন, সব্বেৱ তে উজ্জুগতা সুণোম.

৩৫৩. ‘‘পহীনজাতিমৰণং অসেসং, নিগ্গয্হ ধোনং [ধোতং (সী.)] ৱদেস্সামি ধম্মং;

ন কামকাৰো হি পুথুজ্জনানং, সঙ্খেয্যকাৰো চ [সঙ্খয্যকাৰোৱ (ক.)] তথাগতানং.

৩৫৪. ‘‘সম্পন্নৱেয্যাকৰণং তৱেদং, সমুজ্জুপঞ্ঞস্স [সমুজ্জপঞ্ঞস্স (স্যা. ক.)] সমুগ্গহীতং;

অযমঞ্জলী পচ্ছিমো সুপ্পণামিতো, মা মোহযী জানমনোমপঞ্ঞ.

৩৫৫. ‘‘পৰোৱৰং [ৱৰাৱৰং (কত্থচি)] অৰিযধম্মং ৱিদিত্ৱা, মা মোহযী জানমনোমৱীৰ;

ৱাৰিং যথা ঘম্মনি ঘম্মতত্তো, ৱাচাভিকঙ্খামি সুতং পৱস্স [সুতস্স ৱস্স (স্যা.)].

৩৫৬. ‘‘যদত্থিকং [যদত্থিযং (পী.), যদত্থিতং (ক.)] ব্ৰহ্মচৰিযং অচৰী, কপ্পাযনো কচ্চিস্স তং অমোঘং;

নিব্বাযি সো আদু সউপাদিসেসো, যথা ৱিমুত্তো অহু তং সুণোম’’.

৩৫৭. ‘‘অচ্ছেচ্ছি [অছেজ্জি (ক.)] তণ্হং ইধ নামৰূপে, (ইতি ভগৱা)

কণ্হস্স [তণ্হায (ক.)] সোতং দীঘৰত্তানুসযিতং;

অতাৰি জাতিং মৰণং অসেসং,’’

ইচ্চব্ৰৱী ভগৱা পঞ্চসেট্ঠো.

৩৫৮. ‘‘এস সুত্ৱা পসীদামি, ৱচো তে ইসিসত্তম;

অমোঘং কিৰ মে পুট্ঠং, ন মং ৱঞ্চেসি ব্ৰাহ্মণো.

৩৫৯. ‘‘যথাৱাদী তথাকাৰী, অহু বুদ্ধস্স সাৱকো;

অচ্ছিদা মচ্চুনো জালং, ততং মাযাৱিনো দড়্হং.

৩৬০. ‘‘অদ্দসা ভগৱা আদিং, উপাদানস্স কপ্পিযো;

অচ্চগা ৱত কপ্পাযনো, মচ্চুধেয্যং সুদুত্তৰ’’ন্তি.

নিগ্ৰোধকপ্পসুত্তং দ্ৱাদসমং নিট্ঠিতং.