১. ৰতনসুত্তং

২২৪. যানীধ ভূতানি সমাগতানি, ভুম্মানি [ভূমানি (ক.)] ৱা যানি ৱ অন্তলিক্খে;

সব্বেৱ ভূতা সুমনা ভৱন্তু, অথোপি সক্কচ্চ সুণন্তু ভাসিতং.

২২৫. তস্মা হি ভূতা নিসামেথ সব্বে, মেত্তং কৰোথ মানুসিযা পজায;

দিৱা চ ৰত্তো চ হৰন্তি যে বলিং, তস্মা হি নে ৰক্খথ অপ্পমত্তা.

২২৬. যং কিঞ্চি ৱিত্তং ইধ ৱা হুৰং ৱা, সগ্গেসু ৱা যং ৰতনং পণীতং;

ন নো সমং অত্থি তথাগতেন, ইদম্পি বুদ্ধে ৰতনং পণীতং;

এতেন সচ্চেন সুৱত্থি হোতু.

২২৭. খযং ৱিৰাগং অমতং পণীতং, যদজ্ঝগা সক্যমুনী সমাহিতো;

ন তেন ধম্মেন সমত্থি কিঞ্চি, ইদম্পি ধম্মে ৰতনং পণীতং;

এতেন সচ্চেন সুৱত্থি হোতু.

২২৮. যং বুদ্ধসেট্ঠো পৰিৱণ্ণযী সুচিং, সমাধিমানন্তৰিকঞ্ঞমাহু;

সমাধিনা তেন সমো ন ৱিজ্জতি, ইদম্পি ধম্মে ৰতনং পণীতং;

এতেন সচ্চেন সুৱত্থি হোতু.

২২৯. যে পুগ্গলা অট্ঠ সতং পসত্থা, চত্তাৰি এতানি যুগানি হোন্তি;

তে দক্খিণেয্যা সুগতস্স সাৱকা, এতেসু দিন্নানি মহপ্ফলানি;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩০. যে সুপ্পযুত্তা মনসা দড়্হেন, নিক্কামিনো গোতমসাসনম্হি;

তে পত্তিপত্তা অমতং ৱিগয্হ, লদ্ধা মুধা নিব্বুতিং [নিব্বুতি (ক.)] ভুঞ্জমানা;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩১. যথিন্দখীলো পথৱিস্সিতো [পদৱিস্সিতো (ক. সী.), পঠৱিং সিতো (ক. সী. স্যা. কং. পী.)] সিযা, চতুব্ভি ৱাতেহি অসম্পকম্পিযো;

তথূপমং সপ্পুৰিসং ৱদামি, যো অৰিযসচ্চানি অৱেচ্চ পস্সতি;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩২. যে অৰিযসচ্চানি ৱিভাৱযন্তি, গম্ভীৰপঞ্ঞেন সুদেসিতানি;

কিঞ্চাপি তে হোন্তি ভুসং পমত্তা, ন তে ভৱং অট্ঠমমাদিযন্তি;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩৩. সহাৱস্স দস্সনসম্পদায [সহাৱসদ্দস্সনসম্পদায (ক.)], তযস্সু ধম্মা জহিতা ভৱন্তি;

সক্কাযদিট্ঠি ৱিচিকিচ্ছিতঞ্চ, সীলব্বতং ৱাপি যদত্থি কিঞ্চি.

২৩৪. চতূহপাযেহি চ ৱিপ্পমুত্তো, ছচ্চাভিঠানানি [ছ চাভিঠানানি (সী. স্যা.)] ভব্ব কাতুং [অভব্বো কাতুং (সী.)];

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩৫. কিঞ্চাপি সো কম্ম [কম্মং (সী. স্যা. কং. পী.)] কৰোতি পাপকং, কাযেন ৱাচা উদ চেতসা ৱা;

অভব্ব [অভব্বো (বহূসু)] সো তস্স পটিচ্ছদায [পটিচ্ছাদায (সী.)], অভব্বতা দিট্ঠপদস্স ৱুত্তা;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩৬. ৱনপ্পগুম্বে যথ [যথা (সী. স্যা.)] ফুস্সিতগ্গে, গিম্হানমাসে পঠমস্মিং [পঠমস্মি (?)] গিম্হে;

তথূপমং ধম্মৱৰং অদেসযি [অদেসযী (সী.)], নিব্বানগামিং পৰমং হিতায;

ইদম্পি বুদ্ধে ৰতনং পণীতং, এতেন সচ্চেন সুৱত্থি হোতু.

২৩৭. ৱৰো ৱৰঞ্ঞূ ৱৰদো ৱৰাহৰো, অনুত্তৰো ধম্মৱৰং অদেসযি;

ইদম্পি বুদ্ধে ৰতনং পণীতং, এতেন সচ্চেন সুৱত্থি হোতু.

২৩৮. খীণং পুৰাণং নৱ নত্থি সম্ভৱং, ৱিৰত্তচিত্তাযতিকে ভৱস্মিং;

তে খীণবীজা অৱিৰূড়্হিছন্দা, নিব্বন্তি ধীৰা যথাযং [যথযং (ক.)] পদীপো;

ইদম্পি সঙ্ঘে ৰতনং পণীতং, এতেন সচ্চেন সুৱত্থি হোতু.

২৩৯. যানীধ ভূতানি সমাগতানি, ভুম্মানি ৱা যানি ৱ অন্তলিক্খে;

তথাগতং দেৱমনুস্সপূজিতং, বুদ্ধং নমস্সাম সুৱত্থি হোতু.

২৪০. যানীধ ভূতানি সমাগতানি, ভুম্মানি ৱা যানি ৱ অন্তলিক্খে;

তথাগতং দেৱমনুস্সপূজিতং, ধম্মং নমস্সাম সুৱত্থি হোতু.

২৪১. যানীধ ভূতানি সমাগতানি, ভুম্মানি ৱা যানি ৱ অন্তলিক্খে;

তথাগতং দেৱমনুস্সপূজিতং, সঙ্ঘং নমস্সাম সুৱত্থি হোতূতি.

ৰতনসুত্তং পঠমং নিট্ঠিতং.